അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പൃഥ്വിരാജിനെ കേന്ദ്ര കഥാപാത്രമാക്കി ഡോക്‌ടർ എസ് മഹേഷ് സംവിധാനം ചെയ്യുന്ന പീരിയോഡിക് എപ്പിക് ഡ്രാമ ചിത്രമാണ് കാളിയൻ. ബി ടി അനിൽകുമാർ ആണ് രചന. 2017ലായിരുന്നു ചിത്രം അനൗൺസ് ചെയ്‌തത്. സാങ്കേതിക പ്രശ്‌നങ്ങൾ കാരണം സിനിമയുടെ ചിത്രീകരണം നീണ്ടുപോയി. കൊവിഡിനു ശേഷം പ്രൊഡക്ഷൻ സംബന്ധമായ ജോലികൾ ഉടൻ ആരംഭിക്കും എന്ന രീതിയിൽ അപ്ഡേറ്റുകൾ പുറത്തു വന്നെങ്കിലും കാളിയൻ്റെ ചിത്രീകരണം എന്നു തുടങ്ങും എന്നതിൽ വ്യക്തതയില്ലായിരുന്നു. . എന്നാൽ കാളിയനുമായി ബന്ധപ്പെട്ട ചില പുതിയ അപ്ഡേറ്റുകൾ ഒരു പ്രമുഖ ചാനൽ പുറത്ത് വിട്ടിരിക്കുകയാണ്.
2026 ജനുവരിയിൽ കാളിയൻ ചിത്രീകരണം ആരംഭിക്കുമെന്നാണ് റിപ്പോർട്ട്. അഭിനേതാക്കൾക്ക് വേണ്ടിയുള്ള ആയോധന കലാമുറകളുടെ പരിശീലനവും മറ്റ് പ്രീപ്രൊഡക്ഷൻ ജോലികളും 2025 സെപ്റ്റംബറോടെ ആരംഭിക്കും. ചിത്രീകരണവുമായി ബന്ധപ്പെട്ട വിശദമായ ചർച്ചകൾക്ക് വേണ്ടി സംവിധായകൻ മഹേഷ്, തിരക്കഥാകൃത്ത് ബി ടി അനിൽകുമാർ നിർമാതാവ് രാജീവ് ഗോവിന്ദൻ തുടങ്ങിയവർ കഴിഞ്ഞദിവസം കൊച്ചിയിൽ പൃഥ്വിരാജുമായി കൂടിക്കാഴ്‌ച നടത്തിയിരുന്നു. നൂറുകണക്കിന് ആർട്ടിസ്‌റ്റുകളെ കഥാപാത്രങ്ങളാക്കി രൂപപ്പെടുത്തുന്നതിനും ഇവർക്ക് ആയോധനകലകളിൽ പരിശീലനം നൽകുന്നതിനും ധാരാളം സമയം ആവശ്യമായിരുന്നു. മാത്രമല്ല സിനിമയുടെ വലിയ ക്യാൻവാസ് വളരെ പെട്ടെന്നുതന്നെ സിനിമയുടെ ചിത്രീകരണം ആരംഭിക്കുന്നതിന് വിലങ്ങു തടിയായിയെന്നും വാർത്തയിൽ പറയുന്നു.
2017 ൽ പ്രഖ്യാപിച്ച ചിത്രം 2018 പകുതിയോടെ ചിത്രീകരണം ആരംഭിക്കും എന്നാണ് പറഞ്ഞിരുന്നത്. എന്നാൽ മേൽപ്പറഞ്ഞ കാര്യങ്ങൾ സാധ്യമാക്കി എടുക്കുന്നതിനുള്ള കാലതാമസവും ലൂസിഫർ അടക്കമുള്ള സിനിമകളിൽ പ്രവൃത്തിച്ചുകൊണ്ടിരുന്ന പൃഥ്വിരാജിൻ്റെ ഡേറ്റും സിനിമയുടെ ചിത്രീകരണം നീണ്ടു പോകാൻ കാരണമായി. ഇതിനിടയിൽ പ്രൊഡക്ഷൻ സംബന്ധമായ ചില പ്രശ്‌നങ്ങളും ചലച്ചിത്രം നേരിട്ടിരുന്നു. അതിനിടയിൽ കോവിഡ് കടന്നുവന്നതോടെ ചിത്രീകരണം അനിശ്ചിതത്വത്തിൽ ആയി. കോവിഡിന് ശേഷം സിനിമ പുനരാരംഭിക്കുവാൻ ഇരുന്നെങ്കിലും ആടുജീവിതം അടക്കമുള്ള സിനിമകൾ പൃഥ്വിരാജിനെ കാളിയനിൽ നിന്ന് അകറ്റിനിർത്തി. ഒരു വീരനായകൻ്റെ ശരീരപ്രകൃതിയിലേക്ക് കാളിയന് വേണ്ടി പൃഥ്വിരാജിന് ഒരു ട്രാൻസ്‌ഫർമേഷൻ നടത്തണമായിരുന്നു. അതിനിടയിൽ മറ്റൊരു സിനിമയുടെ ചിത്രീകരണവുമായി ബന്ധപ്പെട്ട് പൃഥ്വിരാജിൻ്റെ കാലിന് പരിക്ക് പറ്റുന്നു. പിന്നെയും കാളിയൻ മുടങ്ങി. പൃഥ്വിരാജിൻ്റെ ഹിന്ദി പ്രോജക്‌ടുകളും എമ്പുരാൻ എന്ന സംവിധാന സംരംഭവും അദ്ദേഹത്തെ കാളിയൻ എന്ന പ്രോജക്‌ടിലേക്കുള്ള ദൈർഘ്യം കൂട്ടി.
2023 ൽ തെന്നിന്ത്യ ഒട്ടാകെ ഈ സിനിമയ്ക്ക് വേണ്ടി ഓഡിഷനുകൾ വരെ സംഘടിപ്പിച്ചു. നൂറുകണക്കിന് ആർട്ടിസ്‌റ്റുകളെ ഓഡിഷന്‍ വഴി തിരഞ്ഞെടുത്തിട്ടുണ്ട്. എന്തായാലും അനിശ്ചിതത്വങ്ങൾക്ക് വിരാമം ഇട്ടുകൊണ്ട് 2026 തുടക്കത്തിൽ സിനിമയുടെ ചിത്രീകരണം ആരംഭിക്കും. നിരവധി ഷെഡ്യുളുകളിലായാകും ചിത്രീകരണം. 2026 അവസാനത്തോടെ ചിത്രീകരണം പൂർത്തിയാക്കാനാണ് പദ്ധതി. രവി ബസ്റൂർ ആണ് സംഗീതം.
