അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കുട്ടിക്കാലത്ത് താൻ ലൈംഗികാതിക്രമത്തിന് ഇരയായെന്ന് വെളിപ്പെടുത്തലുമായി നടി വരലക്ഷ്മി. തമിഴ് റിയാലിറ്റി ഷോ വേദിയിലാണ് താരത്തിന്റെ തുറന്ന് പറച്ചിൽ. റിയാലിറ്റി ഷോയിലെ മത്സരാർഥി തന്റെ ജീവിത കഥ പറഞ്ഞതിനു ശേഷമാണ് പൊള്ളുന്ന ജീവിതാനുഭവം വരലക്ഷ്മി പങ്കുവെച്ചത്.
“ഞാനും നിന്നെപ്പോലെ തന്നെയാണ്. എന്റെ മാതാപിതാക്കൾ (നടൻ ശരത്കുമാർ, ഛായ) അന്ന് ജോലി ചെയ്യുന്നവരായിരുന്നു. അതുകൊണ്ട് തന്നെ എന്നെ നോക്കാൻ അവർ വേറെ ആളുകളെ നിയമിച്ചിരുന്നു. ഞാൻ കുട്ടിയായിരുന്ന സമയത്ത് അഞ്ചോ ആറോ പേർ എന്നെ ലൈംഗിക ചൂഷണത്തിന് ഇരയാക്കിയിട്ടുണ്ട്. നിന്റെ കഥ എന്റെയുമാണ്.
എനിക്ക് കുട്ടികളില്ല. പക്ഷേ, ഗുഡ് ടച്ചും ബാഡ് ടച്ചും എന്താണെന്ന് എല്ലാ മാതാപിതാക്കളും കുട്ടികളെ പഠിപ്പിക്കണമെന്ന് ഞാൻ പറയുന്നു”.- വരലക്ഷ്മി ശരത്കുമാർ പറഞ്ഞു. വരലക്ഷ്മിയെ പിന്തുണച്ച് നിരവധി പേരാണ് രംഗത്തെത്തിയിരിക്കുന്നത്.
മുൻപും താൻ നേരിട്ട ലൈംഗികാതിക്രമത്തെക്കുറിച്ച് വരലക്ഷ്മി തുറന്നുപറഞ്ഞിട്ടുണ്ട്. തന്റെ സേവ് ശക്തി ഫൗണ്ടേഷനിലൂടെ അതിജീവിതകൾക്ക് പിന്തുണ നൽകുന്നതിനേക്കുറിച്ചും വരലക്ഷ്മി പലപ്പോഴായി സംസാരിക്കാറുണ്ട്. 12 വർഷങ്ങൾക്ക് മുൻപ് ചിത്രീകരണം പൂർത്തിയാക്കിയ മധ ഗജ രാജ എന്ന ചിത്രമാണ് വരലക്ഷ്മിയുടേതായി ഒടുവിൽ പ്രേക്ഷകരിലേക്കെത്തിയത്. ഈ പൊങ്കലിനാണ് ചിത്രം തിയറ്ററുകളിലെത്തിയത്. ചിത്രം സർപ്രൈസ് ഹിറ്റായി മാറുകയായിരുന്നു.
content highlight: Actress Varalakshmi
