അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മല്ലിക സാരാഭായിയുടെ നൃത്തപ്പൊലിമയോടെ കേരള ആട്സ് ആൻഡ് ക്രാഫ്റ്റ്സ് വില്ലേജിൽ ‘വൗ’ (World of Women) വനിതാവാരത്തിനു ചൊവ്വാഴ്ച (മാർച്ച് 5) തുടക്കമാകും. ജൻഡർ സംബന്ധിച്ചതോ വനിതകൾ ആവിഷ്ക്കരിച്ചതോ അവതരിപ്പിക്കുന്നതോ ആയ കലാസാംസ്ക്കാരികപരിപാടികളുടെ നിറവിരുന്നാണ് ഇത്തവണയും ക്രാഫ്റ്റ് വില്ലേജിന്റെ വനിതാദിനാഘോഷമായ വൗ വീക്ക്. ‘പാസ്റ്റ് ഫോർവാഡ്’ എന്ന നൃത്തശില്പമാണ് മല്ലിക സാരാഭായ് അവതരിപ്പിക്കുന്നത്. വൈകിട്ട് ഏഴിനാണു പരിപാടി.
ചിത്ര, അഖില കൂട്ടുകെട്ടിന്റെ മോഹിനിയാട്ടവും ശ്രുതിയുടെ ഭരതനാട്യവുമാണ് രണ്ടാം ദിവസം വൈകിട്ട് 7-നും 7 15-നും. തുടർന്ന് എട്ടിന് ലോകത്തേതന്നെ ആദ്യ സയൻസ് ഫിക്‌ഷൻ നോവലായ ‘സോംനിയം’ ഗായത്രി മധുസൂദൻ മോഹിനിയാട്ടത്തിലൂടെ ‘നിലാക്കനവ്’ എന്ന പേരിൽ അരങ്ങിലെത്തിക്കും. പതിനേഴാം നൂറ്റാണ്ടിൽ പ്രശസ്ത ജർമ്മൻ ശാസ്ത്രജ്ഞൻ ജോഹന്നാസ് കെപ്ലർ നോവലിലൂടെ സ്വപ്നം കണ്ട ചാന്ദ്രയാത്ര യാഥാർത്ഥ്യമായതിന്റെ ആഘോഷമാണു നിലാക്കനവ്. വിനോദ് മങ്കരയുടെ മേൽനോട്ടത്തിൽ സേതുവും മാനവും എഴുതി രമേഷ് നാരായണന്റെ സംഗീതത്തിൽ സദനം ജ്യോതിഷ് ബാബുവിന്റെ പാട്ടും പ്രഗത്ഭസംഗീതകാരരുടെ പിന്നണിയും നിലാക്കനവിനു മികവേറ്റും.
