അന്താരാഷ്ട്ര ഖനിജ സമ്മേളനം 'ധാതുക്കളുടെ ഭാവി' റിയാദിൽ തുടക്കം

വ്യവസായാഭിവൃദ്ധിയും ശുദ്ധമായ ഊര്‍ജ്ജവും പൂജ്യം കാര്‍ബണ്‍ പുറന്തള്ളലും എന്നീ അഭിലാഷങ്ങള്‍ നിറവേറ്റുന്നതിന് ആഗോളതലത്തില്‍ തന്നെ​ ഖനിജ വസ്തുക്കളുടെ ആവശ്യം ഏറെ വര്‍ധിച്ചിട്ടുണ്ട്​. ഇതിന്​ തക്ക ഖനന നിര്‍വഹണം ഒരു വെല്ലുവിളിയാണ്​​. ഭരണകൂടങ്ങള്‍, നിക്ഷേപകര്‍, ധനകാര്യ സ്ഥാപനങ്ങള്‍, സേവന ദാതാക്കള്‍, നിര്‍മാതാക്കള്‍ തുടങ്ങിയ പങ്കാളികളെ ഒരുമിച്ച്‌ കൊണ്ടുവന്ന് ഖനന മേഖലയുടെ ഭാവി ആവശ്യങ്ങളോട് പ്രതികരിക്കാനാണ്​ സൗദി അറേബ്യ ലക്ഷ്യമിടുന്നത്​. അതിനാണ്​ 'ധാതുക്കളുടെ ഭാവി' എന്ന ഈ സമ്മേളനം.

ഭാവിയിലെ ഒരു റോഡ്‌മാപ്പ് വരയ്ക്കുന്നതിനും അവര്‍ക്കിടയില്‍ സഹകരണത്തിനൊരു വേദിയുണ്ടാക്കുന്നതിനും വേണ്ടിയാണിത്​​. സുപ്രധാന ഖനിജ വസ്തുക്കളുടെ വിതരണത്തില്‍ സംഭാവന നല്‍കാനും ഖനന മേഖലയില്‍ നിന്ന് പ്രയോജനം നേടാനും ഈ മേഖലയിലെ രാജ്യങ്ങളില്‍ ഒരു പ്രധാന സാമ്പത്തിക പ്രേരകമാകാനുള്ള മികച്ച അവസരം സൗദിക്കുണ്ട്​.​ 

പര്യവേക്ഷണം വര്‍ധിപ്പിക്കുക, മതിയായ അടിസ്ഥാന സൗകര്യങ്ങള്‍ ഒരുക്കുക, ഗുണമേന്മയുള്ള നിക്ഷേപങ്ങള്‍ ആകര്‍ഷിക്കുക തുടങ്ങിയ ആവശ്യങ്ങളെ നേരിടുന്നതോടൊപ്പം അവസരം മുതലെടുക്കാനും വിവിധ രാജ്യങ്ങളിലെ ഖനനത്തിന്‍റെ സുസ്ഥിര വികസനത്തിന് ഊന്നല്‍ നല്‍കാനും ലക്ഷ്യമിടാമെന്ന്​ മന്ത്രി പറഞ്ഞു.

ലോകത്തിലെ ഖനന മേഖലയുടെ പ്രാധാന്യം, കോവിഡിന്​ ശേഷമുള്ള സാമ്ബത്തിക വീണ്ടെടുപ്പില്‍ അതി​ന്‍റെ സ്വാധീനം, വ്യവസായങ്ങളുടെ ഭാവിയില്‍ അതി​ന്‍റെ നിര്‍ണായക സ്വാധീനം എന്നിവ സംബന്ധിച്ച്‌​ ബോധവല്‍കരണം ആവശ്യമായ സാഹചര്യത്തിലാണ് ഇങ്ങനെയൊരു സമ്മേളനം നടക്കുന്നത്​. പശ്ചിമേഷ്യ, മധ്യേഷ്യ, പശ്ചാത്യ മേഖല, ആഫ്രിക്ക എന്നിവിടങ്ങളിലെ ധാതുനിക്ഷേപങ്ങളും ഖനനവും അതുമായി ബന്ധപ്പെട്ട വ്യവസായങ്ങളും സംബന്ധിച്ച സാധ്യതകള്‍ ഉയര്‍ത്തിക്കാട്ടുകയും സമ്മേളനത്തിന്‍റെ ലക്ഷ്യമാണ്​​. ഈ രാജ്യങ്ങള്‍ക്കിടയില്‍ സൗദി അറേബ്യ തന്ത്രപ്രധാനമായ സ്ഥാനമാണ്​ വഹിക്കുന്നതെന്നും മന്ത്രി പറഞ്ഞു. ഖനനമേഖലയിലെ ലക്ഷ്യങ്ങള്‍ കൈവരിക്കുന്നതിനുള്ള യാത്രയില്‍ സൗദി ധാതുവിഭവ മന്ത്രാലയത്തിന്​ നിരവധി നേട്ടങ്ങള്‍ ആര്‍ജ്ജിക്കാനായിട്ടുണ്ട്​​. രാജ്യത്ത്​ ഇതുവരെ നല്‍കിയ ഖനന ലൈസന്‍സുകളുടെ എണ്ണം 1,967 ആയി. വിവിധ ധാതു അയിരുകള്‍ പര്യവേക്ഷണം ചെയ്യുന്നതിനും കണ്ടെത്തുന്നതിനും നല്‍കിയ ലൈസന്‍സുകളാണിവ. ഇതില്‍ 25 ശതമാനവും 2021-ല്‍ നല്‍കിയതാണ്​. പര്യവേക്ഷണത്തിന്​ ആവശ്യമായ പിന്തുണയും സഹായവും നല്‍കുക, ഖനന വ്യവസായങ്ങളില്‍ എക്​സലന്‍സ്​ കേന്ദ്രം സ്ഥാപിക്കുക തുടങ്ങിയ നിരവധി സംരംഭങ്ങള്‍ക്കായി മന്ത്രാലയം പ്രവര്‍ത്തിച്ചുവരികയാണ്​. 2030-ഓടെ ജി.ഡി.പിയില്‍ ഖനന മേഖലയുടെ സംഭാവന 17 ശതകോടി ഡോളറില്‍ നിന്ന് 64 ശതകോടി ഡോളറായി ഉയര്‍ത്താന്‍ ലക്ഷ്യമിടുന്നതായും മന്ത്രി കൂട്ടിചേർത്തു.