×

സ്കൂൾ കലോത്സവ വേദികളിൽ ഡ്രോൺ നിരോധിച്ചു

google news
drone

കൊല്ലം: സംസ്ഥാന സ്കൂൾ കലോത്സവ വേദികളിൽ ഡ്രോൺ പറത്തുന്നത്​ അനുവദിക്കില്ലെന്ന്​ മന്ത്രി വി. ശിവൻകുട്ടി. കലോത്സവ സംഘാടനത്തിന്‍റെ അവസാന ഒരുക്കം പൂർത്തിയായിവരുകയാണെന്നും അദ്ദേഹം വ്യക്തമാക്കി.

കൃത്യസമയത്തുതന്നെ ആരംഭിക്കുകയും അവസാനിക്കുകയും ചെയ്യുന്ന സ്വഭാവത്തിലാണ്​ മത്സരങ്ങൾ സംവിധാനം ചെയ്തിരിക്കുന്നത്​. മൂന്ന്​ മുന്നറിയിപ്പ്​ ലഭിച്ചിട്ടും വേദിയിൽ ഹാജരാകാതിരുന്നാൽ മത്സരാർഥികളെ​ അയോഗ്യരാക്കും. ആദ്യ നമ്പറുകാരായി മത്സരിക്കാൻ പലരും മടികാട്ടുകയും മാറിനിൽക്കുകയും ചെയ്യുന്ന സാഹചര്യം ഉണ്ടാകാറുണ്ട്​. അതു​ മത്സര ഷെഡ്യൂളിനെ ബാധിക്കുന്നതിനാലാണ്​ നമ്പർ വിളിക്കുമ്പോൾതന്നെ വേദിയിൽ എത്തണമെന്ന്​ കർശന നിർദേശം നൽകിയത്​. ഇതുവ​രെ പതിനായിരത്തോളം മത്സരാർഥികൾ പേര്​ രജിസ്റ്റർ ചെയ്​തെന്നും അദ്ദേഹം പറഞ്ഞു.

കലോത്സവം പൂർണമായും മാലിന്യമുക്തമായി നടത്തുന്നതിന്​ മുന്നോടിയായുള്ള ക്ലീൻ ഡ്രൈവും ഹരിത വിളംബര ജാഥയും കൊല്ലത്ത്​ നടന്നു. 1500 ​വളന്‍റിയർമാരും സ്കൂൾ വിദ്യാർഥികളും​ പ​ങ്കെടുത്തു​. സ്വകാര്യ ഓഡിറ്റോറിയങ്ങൾ ഒഴികെയുള്ള വേദികളുടെ നിർമാണപ്രവർത്തനങ്ങൾ പൂർത്തിയായിവരുകയാണ്​. തിങ്കളാഴ്ച അവ പൂർത്തീകരിച്ച്​ സംഘാടക സമിതിക്ക്​ കൈമാറും.

60,000 ചതുരശ്ര അടി വിസ്തീർണമുള്ള പന്തലാണ്​ പ്രധാനവേദിയായ ആശ്രാമം മൈതാനത്ത്​ ഒരുങ്ങുന്നത്​. 12,000 പേർക്ക്​ ഇരിക്കാവുന്നതാണ്​ പന്തൽ. പ്രോഗ്രാം കമ്മിറ്റി ഓഫിസ്​ ഗവ. ഹയർസെക്കൻഡറി സ്കൂളിൽ മന്ത്രി വി. ശിവൻകുട്ടി ഉദ്​ഘാടനം ചെയ്തു. എം.എൽ.എമാരായ എം. മുകേഷ്​, എം. നൗഷാദ്​, പൊതുവിദ്യാഭ്യാസ വകുപ്പ്​ ഡയറക്ടർ എസ്​. ഷാനവാസ്​ എന്നിവർ പ​ങ്കെടുത്തു.

അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു