വൈദ്യുതി വളരെ കുറച്ച് മാത്രം ആവശ്യമുള്ള ബി.എൽ.ഡി.സി ഫാനുകൾ നിർമ്മിച്ച് പള്ളിമുക്ക് മീറ്റർ കമ്പനി

ഇൻഡക്ഷൻ മോട്ടർ ഉപയോഗിച്ച് പ്രവർത്തിക്കുന്ന ഫാനുകൾ കുറഞ്ഞ വേഗതയിലും പരമാവധി വേഗതയിലും ഒരേ വൈദ്യുതി ചെലവായിരിക്കും. ഡി.സി മോട്ടോർ ഉപയോഗിച്ച് പ്രവർത്തിക്കുന്ന ബി.എൽ.ഡി.സി ഫാനുകൾക്ക് വേഗതയ്ക്ക് ആനുപാതികമായ വൈദ്യുതിയേ ആവശ്യമുള്ളു. ഏറ്റവും കുറഞ്ഞ വേഗതയിൽ ബി.എൽ.ഡി.സിക്ക്, സാധാരണ ഫാനുകൾക്ക് ആവശ്യമായതിന്റെ പത്തിലൊന്ന് വൈദ്യുതി മതിയാകും. സാധാരണ ഫാൻ പ്രവർത്തിപ്പിക്കാൻ ഒരു ദിവസം ആവശ്യമായി വരുന്ന വൈദ്യുതി കൊണ്ട് പത്ത് ദിവസം ബി.എൽ.ഡി.സി ഫാൻ പ്രവർത്തിപ്പിക്കാം. ഇലക്ട്രിക് വാഹനങ്ങളുടെ എണ്ണം വർദ്ധിച്ചുവരുന്ന സാഹചര്യത്തിൽ കമ്പനി വളപ്പിൽ ഇലക്ട്രിക് വാഹനങ്ങളുടെ ചാർജ്ജിംഗ് സ്റ്റേഷൻ സ്ഥാപിക്കാനുള്ള മീറ്റർ കമ്പനിയുടെ നിർദ്ദേശത്തിന് വ്യവസായ വകുപ്പ് അനുമതി നൽകി. നിലവിൽ കൊല്ലം ഹൈസ്കൂൾ ജംഗ്ഷനിൽ മാത്രമാണ് ഇലക്ട്രിക് വാഹനങ്ങളുടെ ചാർജ്ജിംഗ് സ്റ്റേഷനുള്ളത്. കൂടുതൽ വാഹനങ്ങൾ കടന്നുപോകുന്ന റോഡായതിനാൽ ഭാവിയിൽ ലാഭകരമായി മാറുമെന്നാണ് പ്രതീക്ഷ. 200 കിലോവാട്ടിന്റെ സ്റ്റേഷനാണ് ലക്ഷ്യമിടുന്നത്. ഇതിനായി വ്യവസായ വകുപ്പ് 75 ലക്ഷം രൂപ മീറ്റർ കമ്പനിക്ക് അനുവദിച്ചിട്ടുണ്ട്.