അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഫെഡറൽ അവകാശങ്ങൾ സംരക്ഷിക്കുന്നതു മുതൽ സാമൂഹിക നീതിയെയും മതേതരത്വത്തെയും പ്രതിരോധിക്കുന്നതുവരെ തമിഴ്നാട് നടത്തിവരുന്ന “നിരവധി പോരാട്ടങ്ങൾ” അക്കമിട്ട് നിരത്തി, തമിഴ്നാട് മുഖ്യമന്ത്രി എം കെ സ്റ്റാലിൻ ഞായറാഴ്ച ഗവർണർ ആർ എൻ രവിക്ക് മറുപടി നൽകി.
നേരത്തെ, സംസ്ഥാനത്തെ മതിലുകളിൽ ‘തമിഴ്നാട് പോരാടും’ (‘Tamil Nadu poraadum’) പോലുള്ള മുദ്രാവാക്യങ്ങൾ കണ്ടെന്നും “ആരോടാണ് പോരാടുന്നത്? തമിഴ്നാടിനെതിരെ ആരും പോരാടുന്നില്ലല്ലോ,” എന്നും ഗവർണർ രവി ചോദിച്ചിരുന്നു.
“ആർക്കെതിരെയാണ് തമിഴ്നാട് പോരാടുന്നത്?” എന്ന ഗവർണറുടെ ചോദ്യത്തിന് മറുപടിയായി, വിദ്യാഭ്യാസം, സമത്വം, ജനാധിപത്യം എന്നിവയെ ദുർബലപ്പെടുത്തുന്ന അഹങ്കാരം, മതഭ്രാന്ത്, ഗൂഢാലോചനകൾ എന്നിവയ്ക്കെതിരെയാണ് സംസ്ഥാനം പോരാടുന്നതെന്ന് സ്റ്റാലിൻ എക്സിലെ ഒരു പോസ്റ്റിൽ പറഞ്ഞു.
“ഹിന്ദി അംഗീകരിച്ചാൽ മാത്രമേ വിദ്യാഭ്യാസ ഫണ്ടുകൾ നൽകൂ എന്ന് പറയുന്ന അഹങ്കാരത്തിനെതിരെയാണ് തമിഴ്നാട് പോരാടുന്നത്,” സ്റ്റാലിൻ വിശദമായ പ്രസ്താവനയിൽ പറഞ്ഞു. ഹിന്ദി അടിച്ചേൽപ്പിക്കാനും ശാസ്ത്രീയ ചിന്തയെ പ്രോത്സാഹിപ്പിക്കേണ്ട സ്ഥാപനങ്ങളിലേക്ക് അന്ധവിശ്വാസം കൊണ്ടുവരാനും കേന്ദ്രം ശ്രമിക്കുകയാണെന്ന് അദ്ദേഹം ആരോപിച്ചു.
“ജനങ്ങളാൽ തിരഞ്ഞെടുക്കപ്പെട്ട സർക്കാരുകളെ അടിച്ചമർത്തുന്ന ജനാധിപത്യ വിരുദ്ധ ശക്തികളോടും”, “ഭരണഘടനയുടെ അന്തസ്സ് കുറയ്ക്കാൻ ശ്രമിക്കുന്നവരോടും” തമിഴ്നാട് പോരാടുകയാണെന്നും മുഖ്യമന്ത്രി പറഞ്ഞു. ഗവർണറുടെ “അധികാര അതിർവരമ്പുകൾ ലംഘിക്കുന്നതിനെതിരെ” തങ്ങളുടെ അവകാശങ്ങൾ സംരക്ഷിക്കാൻ സംസ്ഥാനം ആവർത്തിച്ച് കോടതികളെ സമീപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
“മതഭ്രാന്ത് നിറഞ്ഞ തന്ത്രശാലികളായ ഗ്രൂപ്പുകൾ” ഇന്ത്യയുടെ പുരോഗതിക്ക് തടസ്സം നിൽക്കുകയാണെന്നും തമിഴ്നാട്ടിലെ വ്യവസായങ്ങളെയും ജോലികളെയും മറ്റ് സംസ്ഥാനങ്ങളിലേക്ക് മാറ്റാൻ ശ്രമിക്കുന്നുണ്ടെന്നും സ്റ്റാലിൻ ആരോപിച്ചു. “ആർഎസ്എസ് പിന്തുണയുള്ള ആധിപത്യ മതഭ്രാന്തന്മാർ” “ഇന്ത്യൻ ജനതയുടെ ഐക്യം തകർക്കാനും മനുസ്മൃതി പുനഃസ്ഥാപിക്കാനും” ശ്രമിക്കുന്നുണ്ടെന്നും അദ്ദേഹം കുറ്റപ്പെടുത്തി.
നീറ്റ്, ഡീലിമിറ്റേഷൻ, തിരുവള്ളുവർ, കീഴ്ഡി ഖനനങ്ങൾ പോലുള്ള സാംസ്കാരിക ചിഹ്നങ്ങളുടെ കാവിവൽക്കരണം തുടങ്ങിയ വിഷയങ്ങളും തമിഴ്നാട് എതിർക്കുന്നതിന് ഉദാഹരണങ്ങളായി അദ്ദേഹം ചൂണ്ടിക്കാട്ടി.
“നാഗാലാൻഡിലെ ജനങ്ങൾ തിരസ്കരിച്ച് തിരിച്ചയച്ചതിന് ശേഷവും, തമിഴ്നാട്ടിലെ ജനങ്ങൾക്കിടയിൽ ആശയക്കുഴപ്പങ്ങൾ സൃഷ്ടിക്കാൻ മാത്രം പ്രവർത്തിക്കുന്ന ഗവർണർക്കെതിരെയും പോരാടുന്നു. അവസാനം, തമിഴ്നാട് വിജയിക്കുകയും ഇന്ത്യയെ മുഴുവൻ സംരക്ഷിക്കുകയും ചെയ്യും.” തൻ്റെ പ്രസ്താവന ഉപസംഹരിച്ചുകൊണ്ട് സ്റ്റാലിൻ പറഞ്ഞു.
