അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പട്നയിൽ പ്രതിപക്ഷ ഐക്യമുന്നണിയായ ‘ഇന്ത്യ’ സഖ്യത്തിൽ സീറ്റ് ധാരണ പൂർത്തിയാകാത്തതിലുള്ള തർക്കങ്ങൾക്കിടെ, രാഷ്ട്രീയ ജനതാദൾ (ആർജെഡി) 143 നിയമസഭാ മണ്ഡലങ്ങളിലേക്കുള്ള സ്ഥാനാർഥിപ്പട്ടിക പ്രഖ്യാപിച്ചു. രണ്ടാം ഘട്ടത്തിൽ പത്രിക സമർപ്പിക്കാനുള്ള അവസാന ദിവസമായ തിങ്കളാഴ്ചയാണ് ആർജെഡി സ്ഥാനാർഥികളെ പ്രഖ്യാപിച്ചത്. മുന്നണിക്കുള്ളിലെ സീറ്റ് വിഭജനത്തെച്ചൊല്ലിയുള്ള കടുത്ത തർക്കങ്ങളാണ് സ്ഥാനാർഥി പ്രഖ്യാപനം വൈകാൻ കാരണമായതെന്നാണ് സൂചന.
ആർജെഡി നേതാവും പ്രതിപക്ഷ നേതാവുമായ തേജസ്വി യാദവ് ഇത്തവണയും ലാലു കുടുംബത്തിൻ്റെ ശക്തികേന്ദ്രമായ രാഘോപുർ മണ്ഡലത്തിൽ നിന്നാണ് മത്സരിക്കുന്നത്. കഴിഞ്ഞ രണ്ട് തവണയും അദ്ദേഹം ഈ മണ്ഡലത്തിൽ നിന്ന് വിജയിച്ചിരുന്നു. പ്രമുഖ നേതാക്കളിൽ, ചന്ദ്രശേഖർ മാധേപുരയിലും, വീണ ദേവി മൊകാമയിലും, ഉദയ് നാരായൺ ചൗധരി ജാഝയിലും മത്സരിക്കും.
ആർജെഡിയുടെ പ്രധാന സഖ്യകക്ഷിയായ കോൺഗ്രസ് ഇതുവരെ 60 സ്ഥാനാർഥികളുടെ പട്ടികയാണ് പുറത്തുവിട്ടിട്ടുള്ളത്. തിങ്കളാഴ്ച ആറുപേരുടെ പട്ടിക അവർ പ്രഖ്യാപിച്ചിരുന്നു. എന്നാൽ, സഖ്യത്തിനുള്ളിൽ സീറ്റ് പങ്കുവെക്കുന്നതുമായി ബന്ധപ്പെട്ട് ഔദ്യോഗികമായ ഒരു ധാരണയും ഉണ്ടാകാത്തത് തിരഞ്ഞെടുപ്പിന് മുന്നേ തന്നെ ‘ഇന്ത്യ’ സഖ്യത്തിന് കനത്ത തിരിച്ചടിയായിരിക്കുകയാണ്. കുറഞ്ഞത് എട്ട് മണ്ഡലങ്ങളിലെങ്കിലും സഖ്യത്തിലെ സ്ഥാനാർഥികൾ പരസ്പരം മത്സരിക്കുന്ന സാഹചര്യം നിലവിലുണ്ട്.
മറ്റ് ചെറു കക്ഷികൾക്ക് നൽകിയ സീറ്റുകളുടെ എണ്ണവും ധാരണയിലെ പ്രശ്നങ്ങൾ സൂചിപ്പിക്കുന്നു. സി.പി.ഐ.(എം.എൽ.) ലിബറേഷന് 20 സീറ്റും, സി.പി.ഐക്ക് ആറും, സി.പി.എമ്മിന് നാലും സീറ്റുകളാണ് ‘ഇന്ത്യ’ സഖ്യം നൽകിയിട്ടുള്ളത്.
അതേസമയം, ഭരണകക്ഷിയായ എൻ.ഡി.എ. (NDA) മുന്നണി സീറ്റ് വിഭജനം നേരത്തേ പൂർത്തിയാക്കിയതിൻ്റെ ആശ്വാസത്തിലാണ്. എൻഡിഎയിൽ ബി.ജെ.പി.യും ജെ.ഡി.യുവും 101 സീറ്റുകൾ വീതമാണ് പങ്കുവെച്ചത്. ചിരാഗ് പാസ്വാന്റെ ലോക് ജനശക്തി പാർട്ടിക്ക് (എൽ.ജെ.പി.) 29 സീറ്റുകളും, ജിതൻ റാം മാഞ്ചിയുടെ ഹിന്ദുസ്ഥാനി ആവാം മോർച്ച, ഉപേന്ദ്ര കുശ്വാഹയുടെ രാഷ്ട്രീയ ലോക മോർച്ച എന്നീ പാർട്ടികൾക്ക് 6 സീറ്റുകൾ വീതവുമാണ് നൽകിയിട്ടുള്ളത്.
