അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പൊതുവിദ്യാഭ്യാസ വകുപ്പിന് കീഴിലുള്ള വിവിധ ഓഫിസുകളിൽ വ്യാപക ക്രമക്കേടുകളും അഴിമതിയും നടക്കുന്നതായി ലഭിച്ച വിവരത്തെ തുടർന്ന് വിജിലൻസിന്റെ മിന്നൽ പരിശോധന. ‘ഓപ്പറേഷൻ ബ്ലാക്ക് ബോർഡ്’ എന്ന പേരിലാണ് സംസ്ഥാനത്തെ പ്രധാന വിദ്യാഭ്യാസ ഓഫിസുകളിൽ റെയ്ഡ് ആരംഭിച്ചത്. ഇന്ന് രാവിലെ 10.30 ഓടെയാണ് പരിശോധന തുടങ്ങിയത്.
ഹയർ സെക്കൻഡറി വിദ്യാഭ്യാസത്തിന്റെ ചുമതലയുള്ള റീജിയണൽ ഡെപ്യൂട്ടി ഡയറക്ടർ (ആർ.ഡി.ഡി) ഓഫിസുകളിലും വൊക്കേഷണൽ ഹയർ സെക്കൻഡറി സ്കൂളുകളുടെ ചുമതലയുള്ള അസിസ്റ്റന്റ് ഡയറക്ടർ ഓഫിസുകളിലുമാണ് പ്രധാനമായും പരിശോധന നടക്കുന്നത്. കൂടാതെ, ഹൈസ്കൂളുകളുടെ ചുമതലയുള്ള ജില്ലാ വിദ്യാഭ്യാസ ഓഫിസുകളിലും (ഡി.ഇ.ഒ) റെയ്ഡ് നടക്കുന്നുണ്ട്.
എയ്ഡഡ് സ്കൂളുകളിലെ അധ്യാപക-അനധ്യാപകരുടെ സർവീസ് സംബന്ധമായ വിഷയങ്ങളിൽ ക്രമക്കേടുകളും അഴിമതിയും നടക്കുന്നുണ്ടെന്ന വിവരത്തിന്റെ അടിസ്ഥാനത്തിലാണ് വിജിലൻസ് സംഘം മിന്നൽ പരിശോധന നടത്തിയത്. സംസ്ഥാനത്തെ 41 ജില്ലാ വിദ്യാഭ്യാസ ഓഫിസുകൾ, 7 റീജിയണൽ ഡെപ്യൂട്ടി ഡയറക്ടർ ഓഫിസുകൾ, 7 അസിസ്റ്റന്റ് ഡയറക്ടർ ഓഫിസുകൾ എന്നിവിടങ്ങളിലാണ് ഒരേ സമയം റെയ്ഡ് നടക്കുന്നത്. പരിശോധന തുടരുകയാണ്.
