അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലയാളികൾ ഏറെ ആകാംഷയോടെ കാത്തിരിക്കുന്ന യുവതാരം നിവിൻ പോളിയും സംവിധായകൻ അഖിൽ സത്യനും ഒന്നിക്കുന്ന പുതിയ ചിത്രമായ ‘സർവ്വംമായ’യുടെ റിലീസ് തീയതി പ്രഖ്യാപിച്ചു. ‘പാച്ചുവും അത്ഭുതവിളക്കും’ എന്ന ചിത്രത്തിലൂടെ പ്രേക്ഷക മനസ്സിൽ ഇടം നേടിയ അഖിൽ സത്യൻ, ഈ ചിത്രത്തിലൂടെ ഒരു ഫാന്റസി ഹൊറർ കോമഡി ജോണറാണ് അവതരിപ്പിക്കുന്നത്. പ്രതീക്ഷകൾ ഇരട്ടി മധുരമാക്കിക്കൊണ്ട്, ചിത്രം ഈ വർഷത്തെ ക്രിസ്മസ് ദിനത്തിൽ ഡിസംബർ 25-ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും.
ചിത്രത്തിൻ്റെ ഔദ്യോഗിക ടീസർ അടുത്തിടെ പുറത്തിറങ്ങിയതോടെ ആരാധകരുടെ ആവേശം വാനോളമുയർന്നു. പ്രേക്ഷകർ കാണാനാഗ്രഹിച്ച ചന്ദനക്കുറിയണിഞ്ഞ, നിഷ്കളങ്കനായ ഗ്രാമീണൻ എന്ന രൂപത്തിലാണ് നിവിൻ പോളി ചിത്രത്തിൽ അവതരിക്കുന്നത് എന്ന സൂചന ടീസർ നൽകി. ഗൗരവമുള്ള ഭാവത്തിൽ നിന്നും ഈ ഗ്രാമീണ കഥാപാത്രത്തിലേക്കുള്ള നിവിൻ്റെ വേഷപ്പകർച്ചകൾ ചർച്ചാവിഷയമായിരുന്നു. സ്വാഭാവിക നർമ്മത്തിന് പ്രാധാന്യം നൽകുന്ന അഖിൽ സത്യൻ്റെ സംവിധാനത്തിൽ, ഈ ചിത്രം തിയേറ്ററുകളിൽ ചിരിയുടെ മാലപ്പടക്കം തീർക്കുമെന്നാണ് പ്രതീക്ഷ.
തമാശകളുടെ മറ്റൊരു ലോകം പ്രേക്ഷകർക്ക് മുന്നിൽ തുറന്നുകാട്ടാൻ നിവിൻ പോളിക്കൊപ്പം സ്ഥിരം കോമ്പിനേഷനായ അജു വർഗീസും കൈകോർക്കുന്നുണ്ട്. ഇരുവരും ഒന്നിക്കുന്ന പത്താമത്തെ ചിത്രം എന്ന പ്രത്യേകതയും ‘സർവ്വംമായ’ക്കുണ്ട്. നിവിൻ പോളിക്കും അജു വർഗീസിനുമൊപ്പം മലയാളത്തിന്റെ പ്രിയതാരങ്ങളായ ജനാർദ്ദനൻ, രഘുനാഥ് പലേരി, മധു വാര്യർ, അൽതാഫ് സലിം, പ്രീതി മുകുന്ദൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.
ഫയർഫ്ളൈ ഫിലിംസിന്റെ ബാനറിൽ അജയ്യ കുമാർ, രാജീവ് മേനോൻ എന്നിവരാണ് ‘സർവ്വംമായ’ നിർമ്മിക്കുന്നത്. ജസ്റ്റിൻ പ്രഭാകരന്റെ ഈണവും, ശരൺ വേലായുധന്റെ ഛായാഗ്രഹണവും, എഡിറ്റിംഗ് വിഭാഗം കൈകാര്യം ചെയ്യുന്ന അഖിൽ സത്യൻ്റെ സാന്നിധ്യവും ചിത്രത്തിന് മികച്ച സാങ്കേതിക നിലവാരം ഉറപ്പാക്കുന്നു. ഗ്രാമീണ പശ്ചാത്തലത്തിൽ, സംഗീതത്തിന് ഏറെ പ്രാധാന്യം നൽകി ഒരുക്കിയിരിക്കുന്ന ഈ ഫാന്റസി കോമഡി ചിത്രം ക്രിസ്മസ് അവധിക്കാലത്ത് കുടുംബസമേതം ആസ്വദിക്കാൻ സാധിക്കുന്ന ഒരു ദൃശ്യവിസ്മയമായിരിക്കുമെന്നാണ് അണിയറപ്രവർത്തകർ നൽകുന്ന സൂചന.
