അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഗൂഡല്ലൂർ: ഓവാലി പഞ്ചായത്തിലെ വിവിധ പ്രദേശങ്ങളിലായി 12 പേരുടെ ജീവൻ കാട്ടാന കൊലപ്പെടുത്തിയ കാട്ടാനയെ ‘രാധാകൃഷ്ണൻ’ ചരിഞ്ഞ നിലയിൽ കണ്ടെത്തി. വനം വകുപ്പ് പിടികൂടി റേഡിയോ കോളർ ഘടിപ്പിച്ച് വനത്തിലേക്ക് തിരിച്ചുവിട്ടതിന് ഏതാനും ആഴ്ചകൾക്കുപിന്നാലെയാണ് ഇത്.
സെപ്റ്റംബർ 23-ന് എല്ലമലയിലെ കുറുമ്പർ പള്ളത്തിൽ വനം വകുപ്പ് സംഘം മയക്കുവെടിവച്ച് കാട്ടാനയെ തളർത്തി. തുടർന്ന് അതിനെ മുതുമല കടുവാ സങ്കേതത്തിനടുത്തുള്ള ആനപന്തിയിലെ കൊട്ടിലിലേക്ക് മാറ്റി. ഒരു മാസം നിരീക്ഷണവും വിശ്രമവും നൽകിയ ശേഷം സ്വഭാവത്തിൽ മാറ്റം വന്നതോടെ ഒക്ടോബർ 26-ന് കളക്കാട് മുണ്ടംതുറൈ കടുവാ സങ്കേതത്തിലെ കോതയാർ വനത്തിലേക്ക് റേഡിയോ കോളർ ഘടിപ്പിച്ച് സ്വതന്ത്രമാക്കി.
വനപാലകരുടെ നിരീക്ഷണത്തിനിടെ കനത്ത മഴമൂലം 20 അടി ഉയരമുള്ള ചരിവിൽ നിന്ന് തെന്നി റോഡിലേക്ക് വീണതോടെ കാട്ടാനക്ക് ഗുരുതര പരുക്കേറ്റു. വായിലും തുമ്പിക്കൈയിലും നിന്നും ശക്തമായ രക്തസ്രാവം ഉണ്ടായതായി റിപ്പോർട്ടിൽ പറയുന്നു. പ്രദേശത്ത് കഴിഞ്ഞ രണ്ട് ദിവസങ്ങളായി കനത്ത മഴ തുടരുകയുമായിരുന്നു.
വനംവകുപ്പ് ചീഫ് സെക്രട്ടറി സുപ്രിയ ഷാഹു സ്ഥലത്തെത്തി പ്രാഥമിക റിപ്പോർട്ട് നൽകി. പോസ്റ്റ്മോർട്ടം നടപടികൾ പൂർത്തിയായി.
ഓവാലി ഗ്രാമീണരുടെ തുടർച്ചയായ പരാതികളെത്തുടർന്നാണ് രാധാകൃഷ്ണനെ ബാർവുഡ് മേഖലയിൽ നിന്ന് പിടികൂടി മാറ്റിയത്. പ്രകൃതി ദുരന്തത്തിലാണ് കാട്ടാന മരിച്ചതെങ്കിലും, ഇതിനുള്ള ഉത്തരവാദിത്വം വനം വകുപ്പിനാണെന്ന വിമർശനമുയരുന്നു. മനുഷ്യരിലേക്കുള്ള ആക്രമണങ്ങൾ നടത്തുന്ന കാട്ടാനകളെ പിടികൂടി മറ്റിടങ്ങളിലേക്ക് മാറ്റുന്ന പദ്ധതികൾക്ക് ഇതോടെ കൂടുതൽ തടസ്സങ്ങൾ നേരിടാൻ സാധ്യതയുണ്ടെന്ന് സൂചന.
