അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലയാള സിനിമാ പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് ‘വരവ്’. സംവിധായകൻ ഷാജി കൈലാസും നടൻ ജോജു ജോർജും ആദ്യമായി ഒന്നിക്കുന്ന ഈ ചിത്രം ഒരു ആക്ഷൻ സർവൈവൽ ത്രില്ലർ വിഭാഗത്തിൽപ്പെടുന്നതാണ്. ഓൾഗാ പ്രൊഡക്ഷൻസിൻ്റെ ബാനറിൽ റെജി പ്രോത്താസിസ്, നൈസി റെജി എന്നിവർ ചേർന്നാണ് ചിത്രം നിർമ്മിക്കുന്നത്.
അടുത്തിടെ പുറത്തിറങ്ങിയ ചിത്രത്തിൻ്റെ ഫസ്റ്റ് ലുക്ക് പോസ്റ്റർ വലിയ ശ്രദ്ധ നേടിയിരുന്നു; ജീപ്പിൻ്റെ തകർന്ന ഗ്ലാസുകളിലൂടെ തീവ്രമായി നോക്കുന്ന ജോജു ജോർജിന്റെ ചിത്രം ആരാധകർ ഏറ്റെടുത്തു കഴിഞ്ഞു.
‘വരവ്’ മലയോര മേഖലയുടെ പശ്ചാത്തലത്തിൽ കഥ പറയുന്ന സിനിമയാണ്. പോളി എന്ന വിളിപ്പേരുള്ള പോളച്ചൻ എന്ന കഥാപാത്രത്തിൻ്റെ ജീവിതത്തിലെ പോരാട്ടങ്ങളാണ് ചിത്രത്തിൻ്റെ പ്രധാന ഇതിവൃത്തം.
ദീർഘനാളത്തെ ഇടവേളക്ക് ശേഷം മലയാളത്തിൻ്റെ പ്രിയ നടി വാണി വിശ്വനാഥ് ഒരു സുപ്രധാന കഥാപാത്രത്തെ അവതരിപ്പിക്കുന്നു എന്നതും, നടി സുകന്യയുടെ തിരിച്ചുവരവും ഈ സിനിമയുടെ ശ്രദ്ധേയമായ ഘടകങ്ങളാണ്. മൂന്നാർ, മറയൂർ, തേനി, കോട്ടയം എന്നിവയായിരുന്നു ചിത്രത്തിൻ്റെ പ്രധാന ലൊക്കേഷനുകൾ.
വമ്പൻ താരനിരയാണ് ചിത്രത്തിനായി അണിനിരക്കുന്നത്. മുരളി ഗോപി, അർജുൻ അശോകൻ, ബാബുരാജ്, വിൻസി അലോഷ്യസ്, സാനിയ ഇയ്യപ്പൻ, അശ്വിൻ കുമാർ, അഭിമന്യു ഷമ്മി തിലകൻ, ബിജു പപ്പൻ, ബോബി കുര്യൻ, അസീസ് നെടുമങ്ങാട്, ശ്രീജിത്ത് രവി, ദീപക് പറമ്പോൽ, കോട്ടയം രമേഷ്, ബാലാജി ശർമ്മ, ചാലി പാലാ, രാധികാ രാധാകൃഷ്ണൻ എന്നിവരും പ്രധാന വേഷങ്ങളിലുണ്ട്.
ദക്ഷിണേന്ത്യയിലെ മുൻനിര സ്റ്റണ്ട് മാസ്റ്റർമാരായ അൻപ് അറിവ്, സ്റ്റണ്ട് സിൽവ, കലൈ കിംഗ്സൺ, ജാക്കി ജോൺസൺ, ഫീനിക്സ് പ്രഭു, കനൽ കണ്ണൻ എന്നിവർ ഒരുക്കുന്ന ആക്ഷൻ രംഗങ്ങൾ ചിത്രത്തിൻ്റെ പ്രധാന ആകർഷണങ്ങളിൽ ഒന്നായിരിക്കും.
ഷാജി കൈലാസിൻ്റെ മുൻ വിജയ ചിത്രങ്ങളായ ‘ചിന്താമണി കൊലക്കേസ്’, ‘റെഡ് ചില്ലീസ്’, ‘ദ്രോണ’ എന്നിവയ്ക്ക് തിരക്കഥ ഒരുക്കിയ എ.കെ. സാജനാണ് ‘വരവി’നും തിരക്കഥ രചിച്ചിരിക്കുന്നത്. എസ്. ശരവണനാണ് ഛായാഗ്രഹണം നിർവഹിക്കുന്നത്. ഷമീർ മുഹമ്മദ് എഡിറ്റിംഗും സാബു റാം കലാസംവിധാനവും നിർവ്വഹിക്കുന്നു. സജി കാട്ടാക്കട മേക്കപ്പും സമീര സനിഷ് കോസ്റ്റ്യൂം ഡിസൈനും ചെയ്യുന്നു. വിനോദ് മംഗലത്താണ് പ്രൊഡക്ഷൻ കൺട്രോളർ.
