അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കരിപ്പൂർ: ദുബായിൽ നിന്നെത്തിയ രണ്ട് വിമാന യാത്രക്കാരുടെ ലഗേജ് പൊട്ടിച്ചെടുക്കുകയും പണവും സാധനങ്ങളും മോഷ്ടിക്കപ്പെട്ടെന്ന പരാതിയിൽ പൊലീസ് വിമാനത്താവളത്തിലെ സിസിടിവി ദൃശ്യങ്ങൾ യാത്രക്കാരുടെ സാന്നിധ്യത്തിൽ പരിശോധിച്ചു. പാലക്കാട് തൃത്താല സ്വദേശികളായ പടിഞ്ഞാറങ്ങാടി ചുങ്കത്ത് വീട്ടിൽ ഇബ്രാഹിം ബാദുഷയും ബന്ധു മുഹമ്മദ് ബാസിൽഉമാണ് ലഗേജ് മോഷണപരാതി നൽകിയത്.
യാത്രക്കാർ പറയുന്നതനുസരിച്ച്, വിമാനം നിർത്തിയ സ്ഥാനത്തുനിന്ന് ലഗേജ് വിമാനത്താവളത്തിനുള്ളിലേക്കെത്തുന്നതുവരെ ഉള്ള ദൃശ്യങ്ങൾ ലഭ്യമല്ല. ഈ ഇടവേളയിൽ ദൃശ്യങ്ങൾ റെക്കോർഡ് ചെയ്യുന്നതിനുള്ള സംവിധാനമില്ലെന്നു അവർ ചൂണ്ടിക്കാട്ടി. വിമാനത്താവളത്തിനുള്ളിലെ സിസിടിവികൾ പരിശോധിച്ചുവെങ്കിലും മോഷണത്തിന്റെ വ്യക്തമായ ദൃശ്യങ്ങൾ കണ്ടെത്താനായില്ല എന്നും ഇബ്രാഹിം ബാദുഷ അറിയിച്ചു.
കൺവെയർ ബെൽറ്റിൽനിന്ന് ലഗേജ് ലഭിക്കുമ്പോൾ പെട്ടികളുടെ പൂട്ട് തകർന്ന നിലയിലായിരുന്നു. ഇബ്രാഹിം ബാദുഷയുടെ പരാതിയനുസരിച്ച് 26,500 രൂപ പണവും മറ്റുസാധനങ്ങളും നഷ്ടപ്പെട്ടു. മുഹമ്മദ് ബാസിലിന്റെ ലഗേജിൽ നിന്ന് ഏകദേശം 23,000 രൂപ വിലവരുന്ന എയർപോഡും മിഠായികളും കാണാതായി.
ദുബായിൽ നടത്തിയ ലഗേജിന്റെ ഭാര പരിശോധനാ കണക്കുകൾ കരിപ്പൂരിലെത്തിയ ശേഷമുള്ള കണക്കുമായി താരതമ്യം ചെയ്തപ്പോൾ തൂക്കം കുറഞ്ഞ നിലയിൽ ആയിരുന്നുവെന്നത് യാത്രക്കാർ സ്ഥിരീകരിച്ചു. എന്നാൽ മോഷണം നടന്ന കൃത്യസ്ഥലം വ്യക്തമായിട്ടില്ല.
വിമാനത്തിനുള്ളിലെ സിസിടിവി ദൃശ്യങ്ങൾ ലഭ്യമാക്കാൻ വിമാനക്കമ്പനിയോട് ആവശ്യപ്പെട്ടിട്ടുണ്ടെന്ന് ഇബ്രാഹിം ബാദുഷ അറിയിച്ചു. സംഭവത്തിൽ നിയമ നടപടികൾ തുടർന്നുകൊണ്ടുപോകുമെന്നും അദ്ദേഹം വ്യക്തമാക്കി.
