അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊയിലാണ്ടി: ഹയർ സെക്കണ്ടറി വിഭാഗത്തിലെ മൈമിംഗ് മത്സരത്തിൽ വിധി ഫലത്തെ തുടർന്ന് വിവാദം. തിരുവങ്ങൂർ ഹയർ സെക്കണ്ടറി സ്കൂളിന് ഒന്നാം സ്ഥാനം നൽകിയതിനെതിരെ മറ്റു മത്സരാർത്ഥി സ്കൂളുകൾ ശക്തമായ എതിർപ്പുമായി രംഗത്തെത്തി. വിധികർത്താവിൽ ഒരാൾ പക്ഷപാതപരമായ സമീപനം സ്വീകരിച്ചതാണ് പ്രധാനമായും ഉന്നയിച്ച ആക്ഷേപം.
വളയം ജി എച്ച് എസ് എസ് , വടക്കുമ്പാട് വി എച്ച് എസ്, കോഴിക്കോട് ബി ഇ എം സ്കൂൾ തുടങ്ങിയ സ്ഥാപനങ്ങളിലെ മത്സരാർത്ഥികൾ ചേർന്നാണ് പ്രതിഷേധം രേഖപ്പെടുത്തിയത്. വിധികർത്താക്കളും വിദ്യാർത്ഥികളും തമ്മിൽ വാക്കുതർക്കം മൂർഛിച്ചതോടെ സ്ഥിതിഗതികൾ കടുത്തതാവുകയും പോലീസ് എത്തി ഇടപെട്ട് രംഗം ശാന്തമാക്കുകയും ചെയ്യേണ്ടിവന്നു.
സംഭവവുമായി ബന്ധപ്പെട്ട് ഡിഡിഇയുൾപ്പെടെയുള്ള അധികാരികൾക്ക് പരാതി നൽകിയതായി റിപ്പോർട്ടുകളുണ്ട്. മത്സരത്തിൽ പങ്കെടുത്ത 17 സ്കൂളുകൾക്കും എ ഗ്രേഡ് നൽകിയിരുന്നു, എന്നാൽ ഒന്നാം സ്ഥാനത്തിന് തിരുവങ്ങൂർ സ്കൂൾ തിരഞ്ഞെടുക്കപ്പെട്ടതാണ് വിവാദത്തിൽ കലാശിച്ചത്.
ഹയർ സെക്കണ്ടറി വിഭാഗത്തിൽ തിരുവങ്ങൂർ ആദ്യമായാണ് വിജയിക്കപ്പെടുന്നത്. വിജയത്തിന് പിന്നിൽ സനൽകണ്ടോത്ത്, അഖിലേഷ് പൈക്ക, ഗോകുൽ മഞ്ചക്കൽ തുടങ്ങിയവരുടെ പരിശീലനമാണ് നിർണായകമായതെന്ന് സംഘാടകർ വ്യക്തമാക്കി.
