അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പറവൂർ: ബ്രൗൺഷുഗർ വിൽപനയ്ക്കായി കൈവശം വെച്ച കേസിൽ അസം സ്വദേശിക്ക് കോടതി കഠിന ശിക്ഷ വിധിച്ചു. അസം നഗോൺ ജില്ലയിലെ അഥകൊണ്ട് വില്ലേജിൽ സ്വദേശിയായ ഉബൈദ് റഹ്മാൻ (25) ആണ് മൂന്ന് വർഷം കഠിന തടവും 15,000 രൂപ പിഴയും ഉൾപ്പെടെ ലഭിച്ചത്. ശിക്ഷ അഡീഷണൽ സെഷൻസ് കോടതി-1 ജഡ്ജ് എം.പി. ജയരാജാണ് വിധിച്ചത്.
2023 നവംബർ 3നാണ് സംഭവം നടന്നത്. വിൽപന ലക്ഷ്യമിട്ട് 47.950 ഗ്രാം ബ്രൗൺഷുഗർ കൈവശം വെച്ചിരുന്ന ഉബൈദ് റഹ്മാൻ ആലുവ റെയിൽവേ സ്റ്റേഷനിൽ നിന്ന് കെ.എസ്.ആർ.ടി.സി സ്റ്റാൻഡിലേക്കു നടന്നുപോകുകയായിരുന്നപ്പോൾ എക്സൈസ് റേഞ്ച് ഇൻസ്പെക്ടർ എം. സുരേഷിന്റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.
അന്വേഷണം പൂർത്തിയാക്കി കുറ്റപത്രം സമർപ്പിച്ചത് എക്സൈസ് റേഞ്ച് ഇൻസ്പെക്ടർ പി. അഭിദാസാണ്. കേസിൽ പ്രോസിക്യൂഷന് വേണ്ടി അഡീഷണൽ പബ്ലിക് പ്രോസിക്യൂട്ടർ അഡ്വ. എൻ.കെ. ഹരി ഹാജരായി വാദിച്ചു.
