അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കുറ്റ്യാടി: തൊട്ടിൽപാലം ടൗണിലെ രണ്ട് കടകളിലാണ് ശനിയാഴ്ച പുലർച്ചയിൽ കവർച്ച നടന്നത്. കുറ്റ്യാടി റോഡിലുള്ള ‘അനശ്വര ജ്വല്ലറി വർക്സ്’ എന്ന സ്വർണ്ണ കടയുടെ പൂട്ട് തകർത്താണ് കള്ളന്മാർ അകത്തുകയറിയത്. ഒരു സ്വർണ മോതിരവും 12 വെള്ളിയാഭരണങ്ങളും മോഷണം പോയതായി ഉടമ അറിയിച്ചു. ഈ മോഷണം സംഭവിച്ചത് പുലർച്ചെ 1.30ഓടെയാണ്.
അതിനു ശേഷം അതേ റോഡിലുള്ള ‘സൂര്യ ഇലക്ട്രിക്കൽസ്’ എന്ന ഇലക്ട്രിക്കൽ ഷോപ്പിലാണ് മോഷണം. ഇവിടത്തെ സി സി ടി വി ക്യാമറ തകർത്ത ശേഷം, കൗണ്ടറിൽ സൂക്ഷിച്ചിരുന്ന പണം കവർന്നെടുത്തു. ഈ മോഷണം പുലർച്ചെ 3 മണിയോടെയാണ് നടന്നത്.
സംഭവത്തിൽ തൊട്ടിൽപാലം പൊലീസ് കേസെടുത്ത് അന്വേഷണം ആരംഭിച്ചു.
ജ്വല്ലറിയിലും ഇലക്ട്രിക്കൽ ഷോപ്പിലും വിരലടയാള വിദഗ്ധരും ഡോഗ് സ്ക്വാഡും തെളിവെടുപ്പിന് എത്തിയിരുന്നു.
സൂര്യ ഇലക്ട്രിക്കൽസിൽ നാലുവർഷം മുമ്പും മോഷണം നടന്നിരുന്നു. അന്ന് നാല് ലക്ഷം രൂപ നഷ്ടപ്പെട്ടിരുന്നു എന്ന് ഉടമകൾ പറഞ്ഞു. കടകളിൽ തുടർച്ചയായി മോഷണങ്ങൾ നടക്കുന്നത് ആശങ്കാജനകമാണെന്ന് വ്യാപാരികൾ പറഞ്ഞു.
മോഷ്ടാക്കളെ വേഗത്തിൽ പിടികൂടി നിയമത്തിനു മുന്നിൽ കൊണ്ടുവരണമെന്ന് അവർ ആവശ്യപ്പെട്ടു.
