അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കക്കട്ടിൽ: തദ്ദേശ തിരഞ്ഞെടുപ്പിന്റെ ചൂട് ഉയരുന്നതിനിടെ പ്രചാരണ പ്രവർത്തനങ്ങൾ വാർഡുകളിലുടനീളം സജീവമാകുന്നു. വിവിധ തൊഴിലിടങ്ങളിലും തിരക്കേറിയ മേഖലകളിലും നേരിട്ട് എത്തി വോട്ടർമാരുടെ പിന്തുണ തേടുകയാണ് സ്ഥാനാർത്ഥികൾ.
വെള്ളിയാഴ്ച് ജുമാ നമസ്കാരത്തിന് ശേഷം മസ്ജിദുകളിൽ നിന്ന് പുറത്ത് വരുന്നവരുമായി സൗഹൃദം പുതുക്കിയും പുതുതായി പരിചയപ്പെടുന്നവരോട് കൈകോർക്കിയും സ്ഥാനാർത്ഥികൾ വോട്ടഭ്യർഥന നടത്തി. ക്ഷേത്രോത്സവങ്ങളുടേയും മറ്റ് ജനസാന്നിദ്ധ്യമുള്ള പരിപാടികളുടേയും വേദികളിലും സ്ഥാനാർത്ഥികളുടെ സാന്നിധ്യം ശക്തമായി.
കുന്നുമ്മൽ 15-ാം വാർഡ് യുഡിഎഫ് സ്ഥാനാർത്ഥി എലയാറ ആനന്ദൻ, വട്ടോളിപ്പള്ളി പരിസരങ്ങളിൽ എത്തി വീടുതോറും വോട്ടർമാരെ സമീപിച്ച് പിന്തുണ തേടി. അതേ വാർഡിലെ എൽഡിഎഫ് സ്ഥാനാർത്ഥി ഇല്ലത്ത് പ്രേമനും കഴിഞ്ഞ ദിവസം പള്ളിക്ക് സമീപമെത്തി വോട്ടഭ്യർഥന നടത്തി.
വോട്ടർമാരുമായി ആവേശഭരിതമായ സംഭാഷണങ്ങളിലൂടെ സൗഹൃദം പുതുക്കി, ജനങ്ങളുടെ പ്രശ്നങ്ങളും ആശങ്കകളും കേട്ടറിയാനുള്ള ശ്രമത്തിലാണ് സ്ഥാനാർഥികൾ. പ്രചാരണത്തിന്റെ എല്ലാ ഘട്ടങ്ങളിലും നിറച്ചിരിയോടെ ജനമുഖം കാണാൻ സ്ഥാനാർത്ഥികൾ എത്തുന്നതും ഉത്സാഹകരമായ ദൃശ്യങ്ങൾ സൃഷ്ടിക്കുന്നു.
ഒരു വോട്ടും വിലപ്പെട്ടതാകുന്ന വാർഡ് തെരഞ്ഞെടുപ്പിൽ, നേരിട്ടുള്ള കാണലും ആശയവിനിമയവുമാണ് വിജയത്തിനായുള്ള പ്രധാന ആയുധമെന്ന് മനസിലാക്കി ഓരോ സ്ഥാനാർത്ഥിയും ‘ഇളകിയ വോട്ടുകൾ’ ഉറപ്പാക്കാനുള്ള ശ്രമത്തിലാണ്. കൂട്ടരും അനുയായികളും ഒപ്പം നിന്നുകൊണ്ട് വീടുവീടായി സജീവ പ്രചാരണമാണ് തുടരുന്നത്.
