അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പാർലമെന്റിൽ നാടകം കളിച്ച് സഭ തടസ്സപ്പെടുത്തുന്നതിനെ വിമർശിച്ച പ്രധാനമന്ത്രി നരേന്ദ്ര മോദിയുടെ പരാമർശങ്ങൾക്ക് കോൺഗ്രസ് നേതാവ് പ്രിയങ്ക ഗാന്ധി ശക്തമായ മറുപടി നൽകി. ജനങ്ങളെ നേരിട്ട് ബാധിക്കുന്ന വായു മലിനീകരണം, സമഗ്ര വോട്ടർപട്ടിക പരിഷ്കരണം (എസ്ഐആർ) പോലുള്ള വിഷയങ്ങൾ പാർലമെന്റിൽ ചർച്ച ചെയ്യേണ്ടത് അത്യാവശ്യമാണെന്ന് പ്രിയങ്ക വ്യക്തമാക്കി.
പാർലമെന്റ് ഒരു നാടകവേദിയല്ലെന്നും പ്രശ്നങ്ങളെക്കുറിച്ച് സംസാരിക്കുന്നത് നാടകമല്ലെന്നും പ്രിയങ്ക തിരിച്ചടിച്ചു. “പാർലമെന്റ് എന്തിനാണ്? ഇത് നാടകമല്ല. പ്രശ്നങ്ങളെക്കുറിച്ച് സംസാരിക്കുന്നത് നാടകമല്ല. ജനങ്ങളെ ബാധിക്കുന്ന വിഷയങ്ങളെക്കുറിച്ച് ജനാധിപത്യപരമായ ചർച്ച നടത്താൻ അനുവദിക്കാത്തതാണ് യഥാർത്ഥ നാടകം,” പ്രിയങ്ക ഗാന്ധി പറഞ്ഞു.
ശീതകാല സമ്മേളനത്തിന് മുന്നോടിയായി നടത്തിയ വാർത്താ സമ്മേളനത്തിലാണ് പ്രധാനമന്ത്രി നരേന്ദ്ര മോദി പ്രതിപക്ഷത്തിനെതിരെ രൂക്ഷ വിമർശനം ഉന്നയിച്ചത്. പാർലമെന്റ് നാടകത്തിനുള്ള വേദിയല്ലെന്നും, പ്രതിപക്ഷം അവരുടെ ഉത്തരവാദിത്തം നിറവേറ്റണമെന്നും മോദി ആവശ്യപ്പെട്ടിരുന്നു. കൂടാതെ, ബിഹാർ തിരഞ്ഞെടുപ്പിലെ തോൽവി ചില പാർട്ടികൾക്ക് ഇപ്പോഴും അംഗീകരിക്കാൻ കഴിഞ്ഞിട്ടില്ലെന്നും, അതിന്റെ നിരാശ പാർലമെന്റിൽ പ്രകടിപ്പിക്കരുതെന്നും പ്രധാനമന്ത്രി കൂട്ടിച്ചേർത്തു.
അതേസമയം, പ്രധാനമന്ത്രിയുടെ വിമർശനങ്ങളോട് പ്രതികരിക്കാൻ കോൺഗ്രസ് നേതാവ് രാഹുൽ ഗാന്ധി തയ്യാറായില്ല. പാർലമെന്റിനുള്ളിലെ പ്രതിപക്ഷത്തിന്റെ പ്രതിഷേധങ്ങളും ഭരണകക്ഷിയുടെ വിമർശനങ്ങളും ശീതകാല സമ്മേളനം ആരംഭിക്കാനിരിക്കെ ചൂടുപിടിച്ച രാഷ്ട്രീയ ചർച്ചകൾക്ക് വഴിയൊരുക്കിയിരിക്കുകയാണ്
