അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അമേരിക്കൻ ഉൽപ്പാദകരെ സംരക്ഷിക്കുന്നതിനായി ഇന്ത്യയിൽ നിന്നുള്ള അരി ഇറക്കുമതിക്കും കാനഡയിൽ നിന്നുള്ള വളം ഇറക്കുമതിക്കും പുതിയ തീരുവകൾ ഏർപ്പെടുത്തുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ഇരു രാജ്യങ്ങളുമായുള്ള വ്യാപാര ചർച്ചകളിൽ കാര്യമായ പുരോഗതിയില്ലാത്തതിനിടെയാണ് ട്രംപിന്റെ ഈ ശക്തമായ നിലപാട്. അമേരിക്കൻ കർഷകർക്ക് കോടിക്കണക്കിന് ഡോളറിന്റെ സഹായ പാക്കേജും അദ്ദേഹം പ്രഖ്യാപിച്ചു.
ഇറക്കുമതി തീരുവകളിലൂടെ ലഭിക്കുന്ന വരുമാനം ഉപയോഗിച്ച് അമേരിക്കൻ കർഷകർക്ക് 12 ബില്യൺ ഡോളറിന്റെ സാമ്പത്തിക സഹായം നൽകുമെന്ന് ട്രംപ് വ്യക്തമാക്കി. ഏഷ്യൻ രാജ്യങ്ങളിൽ നിന്നുള്ള ഇറക്കുമതി അമേരിക്കൻ ഉൽപ്പാദകരെ പ്രതിസന്ധിയിലാക്കുന്നുവെന്ന് അദ്ദേഹം ആരോപിച്ചു. രാജ്യത്തെ ഉൽപ്പാദകരെ സംരക്ഷിക്കുന്നതിനായി തീരുവകൾ കർശനമായി ഉപയോഗിക്കാനാണ് തന്റെ ഉദ്ദേശ്യമെന്നും അദ്ദേഹം ആവർത്തിച്ചു.
കർഷകരുടെ സാമ്പത്തിക സ്ഥിരത നിലനിർത്താൻ ഈ സഹായം അത്യാവശ്യമാണെന്നും, കർഷകർ അമേരിക്കയുടെ “നട്ടെല്ലാണ്” എന്നും ട്രംപ് അഭിപ്രായപ്പെട്ടു. തീരുവ സമ്മർദ്ദം കൃഷിയെ പുനരുജ്ജീവിപ്പിക്കുന്നതിനുള്ള തന്റെ തന്ത്രത്തിന്റെ കേന്ദ്രബിന്ദുവാണെന്നും അദ്ദേഹം കൂട്ടിച്ചേർത്തു.
അരി ഇറക്കുമതിയെക്കുറിച്ചുള്ള ചർച്ചയ്ക്കിടെയാണ് ഇന്ത്യ ഒരു പ്രധാന ഉദാഹരണമായി ഉയർന്നുവന്നത്. അരി ഇറക്കുമതി തെക്കൻ പ്രദേശങ്ങളിലെ കർഷകർക്ക് നാശം വിതയ്ക്കുന്നുവെന്ന് ലൂസിയാനയിൽ നിന്നുള്ള ഒരു കർഷകൻ ആരോപിച്ചു. അമേരിക്കയിലെ റീട്ടെയിൽ അരി വിപണിയിലെ മുൻനിര ബ്രാൻഡുകളിൽ രണ്ടെണ്ണം ഇന്ത്യൻ സ്ഥാപനങ്ങളുടേതാണെന്നും അദ്ദേഹം ചൂണ്ടിക്കാട്ടി.
ഇതിന് മറുപടിയായി ട്രംപ് ഇങ്ങനെ പറഞ്ഞു: “ഇന്ത്യ അവരുടെ അരി യുഎസിലേക്ക് തള്ളിവിടാൻ പാടില്ല. മറ്റുള്ളവരിൽ നിന്ന് ഞാൻ അത് കേട്ടിട്ടുണ്ട്. ഇന്ത്യ ഒരിക്കലും അങ്ങനെ ചെയ്യാൻ പാടില്ല. അത് പരിഹരിക്കാൻ വളരെ എളുപ്പമാണ് – തീരുവകൾ. രണ്ട് മിനിറ്റിനുള്ളിൽ പ്രശ്നം പരിഹരിക്കാൻ തീരുവകൾക്കാവും.”
കാനഡയിൽ നിന്നുള്ള വൻതോതിലുള്ള വളം ഇറക്കുമതിക്ക് തീരുവ ഏർപ്പെടുത്തി പ്രാദേശിക ഉൽപ്പാദനം പ്രോത്സാഹിപ്പിക്കാനുള്ള സാധ്യതയും ട്രംപ് നിർദ്ദേശിച്ചു. കാനഡയിൽ നിന്ന് വലിയ തോതിൽ വളം യുഎസിലേക്ക് ഇറക്കുമതി ചെയ്യുന്ന സാഹചര്യത്തിൽ, “നമ്മൾ ഇവിടെ വളർച്ച പ്രോത്സാഹിപ്പിക്കേണ്ടതിനാൽ” കഠിനമായ തീരുവകൾ ഏർപ്പെടുത്തേണ്ടിവരുമെന്ന് അദ്ദേഹം പറഞ്ഞു.
