അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഡബ്ബിങ് ആർട്ടിസ്റ്റും സാമൂഹ്യ പ്രവർത്തകയുമായ ഭാഗ്യലക്ഷ്മി സിനിമ മേഖലയിലെ തൊഴിലാളി സംഘടനയായ ഫെഫ്കയുടെ (FEFKA) ഡയറക്ടേഴ്സ് യൂണിയനിൽ നിന്ന് രാജി പ്രഖ്യാപിച്ചു. നടിയെ ആക്രമിച്ച കേസിൽ പ്രതിസ്ഥാനത്തുണ്ടായിരുന്ന നടൻ ദിലീപിനെ സംഘടനയിലേക്ക് തിരിച്ചെടുക്കാൻ നീക്കങ്ങൾ നടക്കുന്നതിൽ പ്രതിഷേധിച്ചാണ് ഭാഗ്യലക്ഷ്മിയുടെ കടുത്ത തീരുമാനം.
ഇനി ഒരു ചലച്ചിത്ര സംഘടനയിലും താൻ അംഗമാകില്ലെന്നും അവർ വ്യക്തമാക്കിയിട്ടുണ്ട്.
നടിയെ ആക്രമിച്ച കേസിൽ ദിലീപിനെ കുറ്റവിമുക്തനാക്കിക്കൊണ്ടുള്ള കോടതി വിധി വന്നതിന് പിന്നാലെയാണ് വിഷയത്തിൽ ഫെഫ്കയുടെ നിലപാട് വ്യക്തമാക്കിക്കൊണ്ട് ജനറൽ സെക്രട്ടറി ബി. ഉണ്ണികൃഷ്ണൻ രംഗത്തെത്തിയത്. ദിലീപിനെ തിരിച്ചെടുക്കുന്നതുമായി ബന്ധപ്പെട്ട കാര്യങ്ങൾ ഡയറക്ടേഴ്സ് യൂണിയൻ ചർച്ച ചെയ്ത് തീരുമാനിക്കുമെന്നും, കോടതി വിധിന്യായത്തിലേക്ക് എത്തിയ സാഹചര്യങ്ങൾ സംഘടന പരിഗണിക്കുമെന്നും അദ്ദേഹം അറിയിച്ചിരുന്നു.
സംഘടനയുടെ ഈ നിലപാടാണ് ഭാഗ്യലക്ഷ്മിയെ ചൊടിപ്പിച്ചത്. ആക്രമിക്കപ്പെട്ട നടിക്കൊപ്പമാണ് താനെന്ന ഉറച്ച പ്രഖ്യാപനം കൂടിയാണ് ഈ രാജിയിലൂടെ അവർ നടത്തിയത്. സിനിമയിലെ വനിതാ കൂട്ടായ്മയായ WCC അടക്കം പല കോണുകളിൽ നിന്നും ദിലീപിനെ തിരിച്ചെടുക്കാനുള്ള നീക്കത്തിനെതിരെ ശക്തമായ വിമർശനങ്ങൾ ഉയർന്നു വന്നിരുന്നു. ഈ വിഷയത്തിൽ ഫെഫ്കയുടെ നിലപാട് വരും ദിവസങ്ങളിൽ കൂടുതൽ ചർച്ചാവിഷയമാകാൻ സാധ്യതയുണ്ട്.
