അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രമുഖ ഗായിക ചിന്മയി ശ്രീപദക്ക് സോഷ്യൽ മീഡിയ അക്കൗണ്ടിലൂടെ മോർഫ് ചെയ്ത ചിത്രം ലഭിച്ചതുമായി ബന്ധപ്പെട്ട് പ്രതികരണവുമായി രംഗത്ത്. കഴിഞ്ഞ ഏതാനും ആഴ്ചകളായി സാമൂഹിക മാധ്യമങ്ങളിൽ തനിക്കെതിരെ നടക്കുന്ന ഓൺലെെൻ ഭീഷണികളെക്കുറിച്ചുള്ള വീഡിയോ ചിന്മയി എക്സ് പ്ലാറ്റ്ഫോമിൽ പങ്കുവെച്ചു. ലഭിച്ച ചിത്രത്തെക്കുറിച്ചുള്ള വിവരങ്ങൾ ഹൈദരാബാദ് സിറ്റി പൊലീസ് കമ്മീഷണർക്ക് കൈമാറിയതായും നിയമനടപടി ആവശ്യപ്പെട്ടതായും ചിന്മയി അറിയിച്ചു.
തന്റെ ഭർത്താവും നടനും സംവിധായകനുമായ രാഹുൽ രവീന്ദ്രൻ അടുത്തിടെ മംഗല്യസൂത്രത്തെക്കുറിച്ച് അഭിപ്രായം പറഞ്ഞതിന് പിന്നാലെയാണ് തനിക്കെതിരായ ട്രോളിങ്ങും സൈബർ ആക്രമണങ്ങളും ശക്തമായതെന്ന് ചിന്മയി പറയുന്നു.
“ഒരു പേജിൽ നിന്ന് എനിക്ക് ഇന്ന് ഒരു മോർഫ് ചെയ്ത ചിത്രം ലഭിക്കുകയും ഞാൻ പൊലീസിനെ ടാഗ് ചെയ്യുകയും ചെയ്തു. നിയമപരമായ നടപടി ഉണ്ടാകുമോ ഇല്ലയോ എന്നതിലുപരി ഇവിടെ വിഷയം ഞാൻ അധിക്ഷേപിക്കപ്പെട്ടു എന്നതാണ്,” ചിന്മയി കുറിച്ചു.
ഓൺലൈൻ ആക്രമണങ്ങളുടെ തീവ്രതയെക്കുറിച്ചും ഗായിക വീഡിയോയിൽ വിശദീകരിക്കുന്നു. “എന്റെ കുട്ടികൾക്ക് നേരെ വധഭീഷണി ഉണ്ടായി. തങ്ങൾക്ക് ഇഷ്ടമില്ലാത്ത സ്ത്രീകൾക്ക് കുട്ടികൾ ഉണ്ടാകരുത്, ഇനി ഉണ്ടായാൽ തന്നെ അവർ മരിക്കണം എന്ന് പറഞ്ഞ കുറച്ചുപേർക്കെതിരെ ഞാൻ പൊലീസിൽ പരാതി നൽകിയിട്ടുണ്ട്.
ഇതിന് കയ്യടിച്ച് ചിരിക്കുന്ന പുരുഷന്മാരുണ്ടായിരുന്നു,” ചിന്മയി വെളിപ്പെടുത്തി. തന്നെ ധാരാളം ആളുകൾ അധിക്ഷേപിച്ചുവെന്നും ഇതിന് രാഷ്ട്രീയ ഗ്രൂപ്പുകളിൽ നിന്ന് അവർക്ക് പണം ലഭിച്ചിട്ടുണ്ട് എന്നും അവർ കൂട്ടിച്ചേർത്തു.
ഇത്തരം മോർഫ് ചെയ്ത ചിത്രങ്ങൾ പങ്കുവെക്കുന്നത് സ്ത്രീകൾക്കിടയിൽ അവബോധം സൃഷ്ടിക്കാനാണെന്നും ചിന്മയി വ്യക്തമാക്കി. “ഇത്തരം കാര്യങ്ങൾ സംഭവിക്കുന്നുണ്ടെന്ന് സ്ത്രീകൾ അറിയാനാണ് ഞാൻ ഇത് പങ്കുവെക്കുന്നത്. പൊതു ഇടങ്ങളിൽ നിന്ന് ഞങ്ങളെ പുറത്താക്കാൻ പുരുഷന്മാർ ഇത് ചെയ്യുന്നു. സ്ത്രീകളെ അപമാനിക്കാനും ഭീഷണിപ്പെടുത്താനും ശ്രമിക്കുന്ന വ്യക്തികൾ കൂടുതൽ പേരെ ലക്ഷ്യമിട്ടേക്കാം,” ഗായിക പറഞ്ഞു.
ദ്വേഷമുള്ള പുരുഷന്മാർ ഡീപ് ഫെയ്ക്, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യകൾ ഉപയോഗിച്ച് സ്ത്രീകളെ ബുദ്ധിമുട്ടിക്കാൻ ശ്രമിക്കുന്നതിനെക്കുറിച്ച് കൂടുതൽ മനസ്സിലാക്കാൻ ഇത്തരത്തിലുള്ള സംഭവങ്ങൾ സഹായിക്കുമെന്നും ചിന്മയി അഭിപ്രായപ്പെട്ടു. എന്നാൽ ഇത്തരം പ്രശ്നങ്ങളിൽ തളരുന്ന സ്ത്രീ അല്ല താനെന്നും, ഇത്തരം കുറ്റവാളികൾക്കെതിരെ നിയമനടപടി സ്വീകരിക്കാൻ മടിക്കരുതെന്നും അഭ്യർത്ഥിച്ചുകൊണ്ടാണ് ചിന്മയി തന്റെ വീഡിയോ അവസാനിപ്പിച്ചത്.
