അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊല്ക്കത്ത: അര്ജന്റീന ഫുട്ബോൾ ഇതിഹാസം ലയണൽ മെസ്സിയെ കാണാൻ ആവശ്യത്തിന് സമയം ലഭിച്ചില്ലെന്ന് ആരോപിച്ച് സ്റ്റേഡിയത്തിൽ പ്രതിഷേധവുമായി ആരാധകർ. കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ സംഘടിപ്പിച്ച പരിപാടിയില് മെസ്സി പങ്കെടുത്തയുടനെ തന്നെ വേദി വിട്ടതാണ് പ്രതിഷേധത്തിനിടയാക്കിയത്. ‘മെസ്സി10 മിനിറ്റ് വന്ന് പോയി. ഇത്രയധികം പണവും സമയവും നഷ്ടപ്പെട്ടു’ എന്നാണ് ആരാധകർ പറയുന്നത്.
#WATCH | Kolkata, West Bengal: Angry fans threw bottles and chairs from the stands at Kolkata's Salt Lake Stadium
Star footballer Lionel Messi has left the Salt Lake Stadium in Kolkata.
More details awaited. pic.twitter.com/mcxi6YROyr
— ANI (@ANI) December 13, 2025
മെസ്സിയെ ഒരുനോക്ക് കാണാനായില്ലെന്ന് ആരോപിച്ച് കാണികള് സ്റ്റേഡിയത്തിലെ സീറ്റുകള് തല്ലിത്തകര്ക്കുകയും മൈതാനത്ത് കുപ്പികള് എറിയുകയും ചെയ്തു. ആരാധകര് കടുത്ത രോഷം പ്രകടിപ്പിക്കുകയും ചെയ്തു. കൊല്ക്കത്തയ്ക്ക് ഇന്ന് കറുത്തദിനമെന്നാണ് ആരാധകരുടെ പ്രതികരണം.
“മുഴുവൻ ഗതാഗതക്കുരുക്ക്. മാനേജ്മെന്റ്, അധികാരികൾ. വളരെ മോശമായിരുന്നു. ഇവിടെ നിങ്ങൾ കാണുന്ന എല്ലാവർക്കും ഫുട്ബോളിനോട് സ്നേഹമുണ്ട്. ഞങ്ങളെല്ലാവരും മെസ്സിയെ കാണാൻ ആഗ്രഹിച്ചു. പക്ഷെ ഇത് വലിയ തട്ടിപ്പായിരുന്നു. ഞങ്ങൾക്ക് പണം തിരികെ വേണം.. മാനേജ്മെന്റ് വളരെ മോശമായിരുന്നു. കൊൽക്കത്തക്ക് ഇത് ഒരു കറുത്ത ദിനമാണ്. കൊൽക്കത്ത ഫുട്ബോളിന് പേരുകേട്ടതാണ്, ഞങ്ങൾ ഫുട്ബോളിനെ സ്നേഹിക്കുന്നു, അർജന്റീനയെ സ്നേഹിക്കുന്നു, പക്ഷെ ഇത് തട്ടിപ്പാണ്. മന്ത്രിമാർ അവരുടെ കുട്ടികളുമായി അവിടെയുണ്ടായിരുന്നു. മറ്റുള്ളവർക്ക് ഒന്നും കാണാൻ കഴിഞ്ഞില്ല. ഞങ്ങൾ വളരെ ദുഃഖിതരാണ്.-” ഒരു ആരാധകൻ പറഞ്ഞു.
#WATCH | Kolkata, West Bengal: Angry fans resort to vandalism at the Salt Lake Stadium in Kolkata, alleging poor management of the event.
Star footballer Lionel Messi has left the Salt Lake Stadium in Kolkata.
A fan of star footballer Lionel Messi said, "Absolutely terrible… pic.twitter.com/TOf2KYeFt9
— ANI (@ANI) December 13, 2025
“ഇവിടെ ഒരു ഗ്ലാസ് തണുത്ത പാനീയത്തിന് 150-200 രൂപയാണ് വില. എന്നിട്ടും ഞങ്ങൾക്ക് മെസ്സിയെ ഒന്ന് കാണാൻ പോലും കഴിഞ്ഞില്ല. ആളുകൾ അദ്ദേഹത്തെ കാണാൻ ഒരു മാസത്തെ ശമ്പളം ചെലവഴിച്ചു. ടിക്കറ്റിനായി ഞാൻ 5,000 രൂപ നൽകി, മെസ്സിയെ കാണാനാണ് ഞാൻ എന്റെ മകനോടൊപ്പം വന്നത്, രാഷ്ട്രീയക്കാരെ കാണാനല്ല. പോലീസും സൈനികരും സെൽഫിയെടുക്കുകയായിരുന്നു, ഇതിനെല്ലാം മാനേജ്മെന്റ് ആണ് കുറ്റക്കാർ. കുടിക്കാൻ വെള്ളം പോലും ഉണ്ടായിരുന്നില്ല.- ദേഷ്യത്തോടെ അജയ് ഷാ എന്നയാൾ പിടിഐയോട് പറഞ്ഞു.
തികച്ചും മോശം അനുഭവമാണെന്ന് മറ്റൊരു ആരാധകൻ പ്രതികരിച്ചു. അദ്ദേഹം വെറും 10 മിനിറ്റ് മാത്രമേ വന്നുള്ളൂ. എല്ലാ നേതാക്കളും മന്ത്രിമാരും അദ്ദേഹത്തെ വളഞ്ഞു. ഞങ്ങൾക്ക് ഒന്നും കാണാൻ കഴിഞ്ഞില്ല. അദ്ദേഹം ഒരു കിക്ക് പോലും എടുത്തില്ല, ഒരു പെനാൽറ്റി പോലും എടുത്തില്ല. ഷാരൂഖ് ഖാനെയും കൊണ്ടുവരുമെന്ന് അവർ പറഞ്ഞു. ആരെയും കൊണ്ടുവന്നില്ല. അദ്ദേഹം 10 മിനിറ്റ് വന്ന് പോയി. ഇത്രയധികം പണവും സമയവും നഷ്ടപ്പെട്ടു. ഞങ്ങൾക്ക് ഒന്നും കാണാൻ കഴിഞ്ഞില്ല…”- മറ്റൊരു ആരാധകൻ പ്രതികരിച്ചു.
സാൾട്ട് ലേക്കിൽ ആരാധകരെ അഭിസംബോധന ചെയ്യാതെയാണ് മെസ്സി ഗ്രൗണ്ട് വിട്ടത്. ഇതോടെ പ്രകോപിതരായ കാണികള് കുപ്പി ഉള്പ്പെടെ കൈയിലുണ്ടായിരുന്നവ സ്റ്റേഡിയത്തിലേക്ക് എറിയുകയും കസേരകള് തല്ലിത്തകര്ക്കുകയും ചെയ്തു. ഇതിന്റെ ദൃശ്യങ്ങള് സാമൂഹിക മാധ്യമങ്ങളില് പ്രചരിക്കുന്നു. മോഹന് ബഗാന്-ഡയമണ്ട് ഹാര്ബര് മത്സരത്തിന്റെ രണ്ടാം പകുതിയിലാണ് മെസ്സി സ്റ്റേഡിയത്തിലെത്തിയത്. സുരക്ഷാ ഉദ്യോഗസ്ഥര് ഉള്പ്പെടെ മെസ്സിയെ പിന്തുടരുകയായിരുന്നു. ഇതോടെ അക്ഷമരായ ആരാധകര് പലതവണ മെസ്സിയെ സ്വതന്ത്രനാക്കാന് ആവശ്യപ്പെട്ട് ആര്ത്തുവിളിച്ചെങ്കിലും അംഗീകരിച്ചില്ല. സംഘാടകനായ സതാദ്രു ദത്തയും ബംഗാള് മന്ത്രി അരൂപ് ബിശ്വാസും മെസ്സിയുടെ കൂടെയുണ്ടായിരുന്നു. ആളുകള് കൂടിനിന്നതിനാല് പ്രസ് ബോക്സില്നിന്ന് പോലും മെസ്സിയെ കാണാന് കഴിഞ്ഞില്ലെന്നാണ് ഫോട്ടോഗ്രാഫര്മാര് പറയുന്നത്.
