അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പാലക്കാട് പെരിങ്ങോട്ടുകുറിശ്ശി ഗ്രാമപഞ്ചായത്തിൽ സ്വതന്ത്ര ജനാധിപത്യ മുന്നണിക്ക് (ഐഡിഎഫ്) നേരിട്ട പരാജയത്തിൽ സി.പി.എമ്മിനെതിരെ രൂക്ഷവിമർശനവുമായി ഐഡിഎഫ് നേതാവ് എ.വി. ഗോപിനാഥ് രംഗത്ത്.
മുന്നണി ധാരണകൾ പാലിക്കാതെ, ഐ.ഡി.എഫിന്റെ സീറ്റുകൾ കുറയ്ക്കാനും ഒറ്റയ്ക്ക് ഭൂരിപക്ഷം നേടാനുമുള്ള തന്ത്രമാണ് സി.പി.എം പ്രാദേശികമായി സ്വീകരിച്ചതെന്ന് അദ്ദേഹം കുറ്റപ്പെടുത്തി.
മുന്നണിയായി മത്സരിച്ചപ്പോഴും സി.പി.എം സ്വയം നേട്ടം ലക്ഷ്യമിട്ട് പ്രവർത്തിച്ചെന്നാണ് ഗോപിനാഥിന്റെ പ്രധാന ആരോപണം. “മുന്നണിയായി മത്സരിക്കുമ്പോഴും ഒറ്റയ്ക്ക് ഭൂരിപക്ഷം ഉണ്ടാക്കാനും ഐ.ഡി.എഫിന്റെ സീറ്റുകൾ കുറയ്ക്കാനുമുള്ള തന്ത്രമാണ് സി.പി.എം പ്രാദേശികമായി സ്വീകരിച്ചത്,” എ.വി. ഗോപിനാഥ് തുറന്നടിച്ചു. നാല് പതിറ്റാണ്ടിലേറെക്കാലം കോൺഗ്രസ് ഭരിച്ച പെരിങ്ങോട്ടുകുറിശ്ശിയിൽ സി.പി.എം ഭരണസമിതി വരുന്ന സാഹചര്യം ഉണ്ടാക്കിയതിൽ കോൺഗ്രസിനും പങ്കുണ്ടെന്ന് അദ്ദേഹം അഭിപ്രായപ്പെട്ടു.
ഐ.ഡി.എഫ് നേതൃത്വത്തെ പരാജയപ്പെടുത്തുക എന്ന ഒറ്റ അജണ്ടയായിരുന്നു സി.പി.എമ്മിനും സി.പി.ഐക്കും ഉണ്ടായിരുന്നത്. “ഐ.ഡി.എഫിനെ തകർക്കാൻ സി.പി.എമ്മും സി.പി.ഐയും കരുക്കൾ നീക്കി. എ.വി. ഗോപിനാഥും കൂടെയുള്ളവരും വിജയിക്കരുത് എന്ന ഒരൊറ്റ അജണ്ടയായിരുന്നു അവർക്ക്,” ഗോപിനാഥ് വ്യക്തമാക്കി. ഈ വിഷയത്തിൽ രാഷ്ട്രീയപരമായ ചർച്ചകൾക്ക് ഐ.ഡി.എഫ് തയ്യാറാണെന്നും അദ്ദേഹം അറിയിച്ചു.
പെരിങ്ങോട്ടുകുറിശ്ശിയിൽ സംഭവിച്ച കാര്യങ്ങൾ ഐ.ഡി.എഫ് നേതൃത്വം വിശദമായി ചർച്ച ചെയ്യും. ഇടതുപക്ഷം തങ്ങളുടെ നയവും നിലപാടും വ്യക്തമാക്കാൻ തയ്യാറാവണം. ആരുമായും ചർച്ചയ്ക്ക് തയ്യാറാണെന്നും സംവാദത്തിനുള്ള വാതിലുകൾ അടച്ചിടുന്നില്ലെന്നും എ.വി. ഗോപിനാഥ് കൂട്ടിച്ചേർത്തു.
