ചാറ്റ്ജിപിടിക്ക് ഇനി സ്വന്തമായി ‘ആപ്പ് സ്റ്റോർ’; തേർഡ്-പാർട്ടി സേവനങ്ങൾ സംയോജിപ്പിക്കാൻ ഓപ്പൺഎഐ

ചാറ്റ്ജിപിടിയിൽ തേർഡ്-പാർട്ടി സേവനങ്ങളെ സംയോജിപ്പിക്കുന്നതിൽ ഓപ്പൺഎഐ ശ്രദ്ധ കേന്ദ്രീകരിക്കുന്നതിനിടെ, ആപ്പിൾ ആപ്പ് സ്റ്റോറിനോടും ഗൂഗിൾ പ്ലേ സ്റ്റോറിനോടും സമാനമായ ചാറ്റ്ജിപിടിയുടെ ആപ്പ് ഡയറക്‌ടറി ഔദ്യോഗികമായി പ്രവർത്തനക്ഷമമായി. ഒരാഴ്ച മുമ്പ് അഡോബ്, ഫോട്ടോഷോപ്പ്, എക്‌സ്പ്രസ്, അക്രോബാറ്റ് തുടങ്ങിയ സേവനങ്ങൾ ചാറ്റ്ബോട്ടിനായി ലഭ്യമാക്കിയിരുന്നു.

പുതിയ സംവിധാനം വരുന്നതോടെ ചാറ്റ്ജിപിടി സംഭാഷണങ്ങളെ വിപുലീകരിക്കുകയും, പല കാര്യങ്ങൾക്കായുള്ള പുതിയ പശ്ചാത്തലം കൊണ്ടുവരികയും, പലതരം പ്രവർത്തികൾ ചെയ്യാൻ ഉപയോക്താക്കളെ അനുവദിക്കുകയും ചെയ്യും. ഉദാഹരണത്തിന്, പലചരക്ക് സാധനങ്ങൾ ഓർഡർ ചെയ്യുക, ഒരു രൂപരേഖയെ സ്ലൈഡ് ഡെക്ക് ആക്കി മാറ്റുക, അല്ലെങ്കിൽ ഒരു അപ്പാർട്ട്മെന്റ് തിരയുക തുടങ്ങിയ കാര്യങ്ങൾ ഇനി ചാറ്റ്ജിപിടിയിലൂടെ എളുപ്പത്തിൽ സാധിക്കും.

​പുതിയ ആപ്പ് ഡയറക്‌ടറി വഴി ഉപയോക്താക്കൾക്ക് ഫീച്ചർ ചെയ്ത ആപ്പുകൾ ബ്രൗസ് ചെയ്യാനും, ഇഷ്ടപ്പെട്ട ആപ്പുകൾക്കായി തിരയാനും, ഒറ്റ ക്ലിക്കിലൂടെ ‘ഇൻസ്റ്റാൾ’ ചെയ്യാനും സാധിക്കും. വെബ്സൈറ്റിൽ chatgpt.com/apps സന്ദർശിച്ചോ അല്ലെങ്കിൽ ആൻഡ്രോയിഡ്, iOS, വിൻഡോസ് എന്നിവയിലെ ചാറ്റ്ജിപിടി ആപ്പുകളിൽ ഇടത് സൈഡ്ബാറിലെ ‘Apps’ ബട്ടണിൽ ക്ലിക്കുചെയ്തോ ഈ പുതിയ ആപ്പ് സ്റ്റോർ ലഭ്യമാക്കാം.

ആപ്പുകൾ നേരിട്ട് ഇൻസ്റ്റാൾ ചെയ്യുന്നതിന് പകരം, ഉപയോക്താക്കൾ ‘Connect’ ബട്ടണിൽ ടാപ്പുചെയ്യുകയും ചാറ്റ്ജിപിടിയിൽ ആപ്പ് ഉപയോഗിക്കാൻ അനുമതി നൽകുകയുമാണ് വേണ്ടത്. നിലവിൽ, ‘Feature’, ‘Lifestyle’, ‘Productivity’ എന്നിങ്ങനെ മൂന്ന് വിഭാഗങ്ങളിലാണ് ആപ്പുകൾ ക്രമീകരിച്ചിരിക്കുന്നത്. @canva create a 2025 wrap presentation for my class എന്നതുപോലെയുള്ള പ്രോംപ്റ്റുകളിൽ ആപ്പിന്റെ പേര് നൽകിക്കൊണ്ട് സംഭാഷണങ്ങൾക്കിടയിൽ ആപ്പുകൾ ഉപയോഗിക്കാനാകും.

​സംഭാഷണ പശ്ചാത്തലം, ആപ്പ് ഉപയോഗ പാറ്റേണുകൾ, ഉപയോക്തൃ മുൻഗണനകൾ എന്നിവ ഉപയോഗിച്ച് സംഭാഷണങ്ങൾക്കിടയിൽ പ്രസക്തമായ ആപ്പുകൾ നേരിട്ട് നൽകാനുള്ള വഴികൾ ഓപ്പൺഎഐ പരീക്ഷിക്കുന്നുണ്ടെന്നും അറിയിച്ചിട്ടുണ്ട്. ചാറ്റ്ജിപിടിയുടെ ‘മെമ്മറി’ ഫീച്ചർ പ്രവർത്തനക്ഷമമാക്കിയിട്ടുണ്ടെങ്കിൽ, അതിൽ നിന്നുള്ള വിവരങ്ങൾ ഉപയോഗിക്കാനും, ‘എല്ലാവർക്കും വേണ്ടി മോഡൽ മെച്ചപ്പെടുത്തുക’ എന്ന ചെക്ക്ബോക്‌സ് ഓപ്ഷൻ എനേബിൾ ചെയ്താൽ ഭാവിയിലെ AI മോഡലുകളെ പരിശീലിപ്പിക്കാൻ ഉപയോക്താവിന്റെ വിവരങ്ങൾ ഉപയോഗിക്കാനും ആപ്പുകൾക്ക് കഴിഞ്ഞേക്കുമെന്ന് കമ്പനി വ്യക്തമാക്കുന്നു.

സഹായ രേഖയിൽ, ഗൂഗിൾ ഡ്രൈവ് അല്ലെങ്കിൽ ഡ്രോപ്പ്ബോക്സ് പോലുള്ള ‘കണക്റ്റർ’ ആപ്പുകൾ ഇനിമുതൽ ‘ആപ്പുകൾ’ എന്ന് അറിയപ്പെടുമെന്നും ഓപ്പൺഎഐ അറിയിച്ചു. ഇതനുസരിച്ച്, ചാറ്റ് കണക്റ്ററുകൾ ‘apps with file search’ എന്നും, ഡീപ് റിസർച്ച് കണക്റ്ററുകൾ ‘apps with deep research’ എന്നും, സിങ്ക്ഡ് കണക്റ്ററുകൾ ‘apps with sync’ എന്നും പുനർനാമകരണം ചെയ്യപ്പെടും