അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇന്ത്യൻ സിനിമാരംഗത്ത് ഒരുപാട് ദുരൂഹതകൾ നിഴലിച്ചു നിൽപ്പുണ്ട്. പലപ്പോഴും ആ രഹസ്യങ്ങൾ മറനീക്കി പുറത്തുവരാതെ ഇരുട്ടിൽ മറഞ്ഞിരിക്കുകയായിരിക്കും. പ്രശസ്തിയുടെ കൊടുമുടിയിൽ നിൽക്കുമ്പോഴാണ് ഈ ദുരന്തങ്ങളെല്ലാം സംഭവിക്കുന്നത്.
ജീവിതം തുടങ്ങുകയും സ്വപ്നങ്ങൾ ശോഭിക്കുകയും ചെയ്യുമ്പോൾ, മരണം എന്ന കറുത്ത നിഴൽ അവരെ വന്നു മൂടുന്നു. സുശാന്ത് സിംഗ് രജ്പുത്, ശ്രീദേവി തുടങ്ങിയ പ്രിയപ്പെട്ട താരങ്ങളുടെ മരണം ഇന്നും കൊലപാതകമാണോ സ്വാഭാവിക മരണമാണോ എന്ന് തിരിച്ചറിയാനാവാതെ ജനങ്ങളുടെ മനസ്സിൽ അവശേഷിക്കുകയാണ്.
ഈ ദുരൂഹ മരണങ്ങളുടെ പട്ടികയിൽ എന്നും ഉത്തരം കിട്ടാത്ത ഒരു ചോദ്യമായി നിലനിൽക്കുന്ന ഒന്നുകൂടി ഉണ്ടായിരുന്നു. സ്വപ്നങ്ങൾ നെയ്തുകൂട്ടി ചിറകുകൾ വിരിച്ച് പറക്കാൻ തുടങ്ങിയിട്ടേ ഉണ്ടായിരുന്നുള്ളൂ, വെറും 19 വയസ്സുകാരിയായ ദിവ്യ ഭാരതിയുടെ മരണം.
ജീവിതത്തിലെ എല്ലാ സന്തോഷങ്ങളും നേടിയിട്ടും, മരണം എന്ന വലയം അവളുടെ എല്ലാ സ്വപ്നങ്ങളെയും തകർത്തു. കൊലപാതകമാണോ അതോ ഒരു സാധാരണ അപകടമരണമോ എന്ന് ഇതുവരെ തിരിച്ചറിയാൻ സാധിക്കാത്ത ആ ദുരൂഹതയാണ് 1993-ൽ മുംബൈ നഗരത്തെ ഞെട്ടിച്ചത്.
1974 ഫെബ്രുവരി 25-ന് മുംബൈയിൽ ദിവ്യ ജനിച്ചത്. ചെറുപ്പം മുതലേ സുന്ദരിയായിരുന്നു അവൾ. ആ സൗന്ദര്യം തന്നെയാണ് അവളെ പതിനാറാം വയസ്സിൽ തെലുങ്ക് സിനിമയുടെ ലോകത്തേക്ക് എത്തിച്ചത്. പിന്നീട് ബോളിവുഡിലേക്കുള്ള ദിവ്യയുടെ വരവ് ഒരു കൊടുങ്കാറ്റുപോലെയായിരുന്നു.
“സാത് സമന്ദർ പാർ” എന്ന ഒരൊറ്റ ഗാനം മതിയായിരുന്നു, ഇന്ത്യ മുഴുവൻ ആ ചിരിക്കുന്ന മുഖം ഏറ്റെടുക്കാൻ. 1992-ൽ ഷാരൂഖ് ഖാനോടൊപ്പം ‘ദീവാന’യിൽ അഭിനയിച്ചതോടെ ബോളിവുഡിലെ ഏറ്റവും തിളക്കമുള്ള താരമായി അവൾ മാറി. വെറും മൂന്ന് വർഷം കൊണ്ട് 14 സിനിമകൾ! 90-കളിലെ ഏറ്റവും തിരക്കുള്ള നായികയായി ദിവ്യ മാറുകയായിരുന്നു.
കരിയറിന്റെ കൊടുമുടിയിൽ നിൽക്കുമ്പോഴും ദിവ്യയുടെ സ്വകാര്യ ജീവിതം രഹസ്യങ്ങളുടെ കൂടാരമായിരുന്നു. ‘ഷോല ഔർ ശബ്നം’ എന്ന സിനിമയുടെ സെറ്റിൽ വെച്ച് നിർമ്മാതാവ് സാജിദ് നദിയാദ്വാലയുമായി തുടങ്ങിയ സൗഹൃദം പിന്നീട് പ്രണയമായി മാറി. വിവാഹം കരിയറിന് തിരിച്ചടിയാകുമോ എന്ന ഭയം കാരണം, 1992 മെയ് 10-ന് അതീവ രഹസ്യമായി അവർ വിവാഹിതരായി.
ഇസ്ലാം മതം സ്വീകരിച്ചാണ് ദിവ്യ സാജിദിന്റെ ജീവിതസഖിയായത്. എന്നാൽ ലോകത്തിന് മുന്നിൽ ഭർത്താവില്ലാത്ത, സ്വപ്നങ്ങളിലേക്ക് പറന്നുയരുന്ന നായികയായി അവൾ അഭിനയിച്ചു.
1993 ഏപ്രിൽ 5. ഹൈദരാബാദിലെ ഷൂട്ടിംഗ് കഴിഞ്ഞ് ഒരുപാട് സന്തോഷത്തോടെയാണ് ദിവ്യ മുംബൈയിലെ വെർസോവയിലുള്ള തന്റെ ‘തുളസി അപ്പാർട്ട്മെന്റിൽ’ തിരിച്ചെത്തിയത്. സ്വന്തമായി അധ്വാനിച്ചുണ്ടാക്കിയ പണത്താൽ വാങ്ങിയ ആ ഫ്ലാറ്റ്, അവളുടെ അഭിമാനമായിരുന്നു. അന്ന് രാത്രി അവിടെ ചെറിയൊരു വിരുന്ന് നടന്നു. ദിവ്യയോടൊപ്പം കോസ്റ്റ്യൂം ഡിസൈനറായ നീത ലുല്ലയും ഭർത്താവ് ശ്യാം ലുല്ലയും മാത്രം. ഭർത്താവ് സാജിദ് അപ്പോൾ വീട്ടിൽ ഉണ്ടായിരുന്നില്ല.
സമയം രാത്രി 11 മണി. അൽപം മദ്യത്തിന്റെ ലഹരിയിൽ, അഞ്ചാം നിലയിലെ ഗ്രില്ലില്ലാത്ത തുറന്ന ബാൽക്കണിയിലേക്ക് ദിവ്യ നടന്നു. കൈയിൽ ഒരു ഗ്ലാസ്സുമായി ബാൽക്കണിയുടെ അരമതിലിൽ അവൾ ഇരുന്നു. അകത്തിരിക്കുന്ന നീതയോട് സംസാരിക്കാനായി തിരിയുന്നതിനിടയിൽ, ആ ദുരന്തം സംഭവിച്ചു.
നിയന്ത്രണം നഷ്ടപ്പെട്ട ദിവ്യ താഴേക്ക് പതിച്ചു. ആ ശബ്ദം കേട്ട് ഓടിയെത്തിയവർ കണ്ടത് രക്തത്തിൽ കുളിച്ചു കിടക്കുന്ന യുവതാരത്തെയാണ്. കൂപ്പർ ഹോസ്പിറ്റലിലേക്ക് കുതിച്ചെങ്കിലും, ആ 19-കാരിയുടെ ജീവൻ രക്ഷിക്കാൻ ഡോക്ടർമാർക്ക് സാധിച്ചില്ല. ബോളിവുഡിന്റെ പറന്നുയർന്ന നക്ഷത്രം നിമിഷങ്ങൾക്കകം പൊലിഞ്ഞു.
ദിവ്യയുടെ മരണം ഒരു അപകടമായി എഴുതിത്തള്ളാൻ ആരാധകർക്കോ മാധ്യമങ്ങൾക്കോ കഴിഞ്ഞില്ല. മരണത്തെ ചുറ്റിപ്പറ്റിയുള്ള സംശയങ്ങൾ പിന്നീട് ഭീകരമായ ദുരൂഹതയിലേക്ക് വഴിമാറി. അന്ന് ആ ഫ്ലാറ്റിൽ നടന്ന സംഭവങ്ങൾക്ക് ദൃക്സാക്ഷിയായിരുന്ന വീട്ടുജോലിക്കാരി അമൃത, ദിവ്യ മരിച്ച് കൃത്യം 30 ദിവസത്തിനുള്ളിൽ ദുരൂഹമായ സാഹചര്യത്തിൽ മരണപ്പെട്ടതോടെ സംശയങ്ങൾ ബലപ്പെട്ടു.
അമൃതയുടെ മരണം ഹൃദയാഘാതമാണെന്ന് വിധിയെഴുതിയെങ്കിലും, സത്യം അറിയാമായിരുന്ന ഒരേയൊരു സാക്ഷി ഇല്ലാതായത് എന്തിനെന്ന് ആരും ചോദിച്ചുപോയി. മാത്രമല്ല, മുംബൈ അധോലോകവുമായി സാജിദ് നദിയാദ്വാലയ്ക്ക് ബന്ധമുണ്ടായിരുന്നോ എന്ന ചോദ്യങ്ങളും ഉയർന്നു വന്നു. ദിവ്യയുടേത് കൊലപാതകമായിരുന്നോ? ഭർത്താവിന് പങ്കുണ്ടായിരുന്നോ? അതോ വെറും ബാലൻസ് തെറ്റിയ ഒരപകടം മാത്രമായിരുന്നോ?
1998-ൽ മുംബൈ പോലീസ് ഈ കേസ് ‘ആക്സിഡന്റൽ ഡെത്ത്’ എന്ന് പറഞ്ഞ് അവസാനിപ്പിച്ചു. പക്ഷേ, ജനങ്ങളുടെ മനസ്സിലെ സംശയങ്ങൾക്ക് അപ്പോഴും വിരാമമായില്ല. വെള്ളിത്തിരയിൽ ഇനിയുമെത്രയോ ദൂരം സഞ്ചരിക്കേണ്ടിയിരുന്ന ഒരു മഹാനടി, എന്തിനാണ് ഇത്ര വേഗത്തിൽ വിടവാങ്ങിയതെന്ന ചോദ്യം ഇന്നും ബാക്കിയാണ്.
ഇന്നും, തുളസി അപ്പാർട്ട്മെന്റിലെ ആ അഞ്ചാം നിലയിലേക്ക് നോക്കുമ്പോൾ പലരുടെയും മനസ്സിൽ വേദനയോടെ ഒരു ചിത്രം തെളിയും: 19-ാം വയസ്സിൽ ചിറകറ്റുവീണ ആ സുന്ദരി. ഉത്തരം കിട്ടാത്ത ഒരുപാട് ചോദ്യങ്ങൾ ബാക്കിയാക്കി, ദിവ്യ ഭാരതി എന്ന നക്ഷത്രം ഇന്ത്യൻ സിനിമയുടെ ചരിത്രത്തിലെ മായാത്ത ഒരു ദുരന്തമായി നിലനിൽക്കുന്നു.
