അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വെനസ്വേലൻ പ്രസിഡന്റ് നിക്കോളാസ് മഡുറോയെയും ഭാര്യ സിലിയ ഫ്ലോർസിനെയും പിടികൂടി രാജ്യത്തുനിന്ന് പുറത്തേക്ക് കടത്തിയതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലി’ലൂടെയാണ് ട്രംപ് ലോകരാഷ്ട്രങ്ങൾക്കിടയിൽ വലിയ ചലനം സൃഷ്ടിക്കാൻ സാധ്യതയുള്ള ഈ സൈനിക നീക്കത്തെക്കുറിച്ചുള്ള വെളിപ്പെടുത്തൽ നടത്തിയത്.
മഡുറോയെയും ഭാര്യയെയും നിലവിൽ വെനസ്വേലയിൽ നിന്ന് വിമാനമാർഗം പുറത്തെത്തിച്ചതായും അദ്ദേഹം അറിയിച്ചു. ഓപ്പറേഷന്റെ വിശദാംശങ്ങൾ പങ്കുവെക്കുന്നതിനായി ഫ്ലോറിഡയിലെ മാർ-എ-ലാഗോയിൽ ട്രംപ് പ്രത്യേക വാർത്താ സമ്മേളനം വിളിച്ചിട്ടുണ്ട്.
മഡുറോയെ കസ്റ്റഡിയിലെടുക്കുന്നതിന് മുന്നോടിയായി വെനസ്വേലൻ സൈനിക താവളങ്ങൾ ലക്ഷ്യമിട്ട് അമേരിക്ക വ്യോമാക്രമണം നടത്തി. ശനിയാഴ്ച പുലർച്ചെ പ്രാദേശിക സമയം 1.50 ഓടെയാണ് തലസ്ഥാനമായ കാരക്കാസിൽ ഉൾപ്പെടെ ഉഗ്രസ്ഫോടനങ്ങൾ ഉണ്ടായത്. കാരക്കാസ്, മിറാൻഡ, ആരഗുവ, ലാഗുവൈറെ എന്നീ സംസ്ഥാനങ്ങളിലെ സൈനിക, സിവിലിയൻ കേന്ദ്രങ്ങളിലാണ് ആക്രമണം നടന്നതെന്നാണ് വെനസ്വേലൻ പ്രസ്താവനയിൽ അറിയിച്ചത്.
കുറഞ്ഞത് ഏഴ് സ്ഫോടനങ്ങൾ റിപ്പോർട്ട് ചെയ്യപ്പെട്ടു. സ്ഫോടനങ്ങൾക്ക് പിന്നാലെ യുദ്ധവിമാനങ്ങളുടെ ശബ്ദം കേട്ടതായും റിപ്പോർട്ടുകളുണ്ട്. രാജ്യത്തെ വിവിധ പ്രദേശങ്ങളിൽ വൈദ്യുതി ബന്ധം വിച്ഛേദിക്കപ്പെട്ട നിലയിലാണ്. വ്യോമാക്രമണത്തിന് പിന്നാലെ വെനസ്വേലയിൽ അടിയന്തരാവസ്ഥ പ്രഖ്യാപിച്ചു. രാജ്യത്തുടനീളം സൈന്യത്തെ വിന്യസിക്കാൻ വെനസ്വേലൻ പ്രതിരോധമന്ത്രി വ്ലാഡിമിർ പാഡ്രിനോ ലോപ്പസ് നിർദേശം നൽകിയിട്ടുണ്ട്.
നിക്കോളാസ് മഡുറോയുടെ സർക്കാരിനെ താഴെയിറക്കാനുള്ള ശ്രമങ്ങളുടെ ഭാഗമായി ട്രംപ് നേരത്തെ തന്നെ രഹസ്യാന്വേഷണ വിഭാഗമായ സിഐഎയ്ക്ക് അനുമതി നൽകിയിരുന്നു. കരീബിയൻ കടലിൽ അമേരിക്കൻ നാവികസേനാ വിന്യാസവും നടത്തി. മഡുറോയ്ക്ക് രാജ്യം വിടാൻ ട്രംപ് അന്ത്യശാസനം നൽകിയതായും റിപ്പോർട്ടുകൾ വന്നിരുന്നു.
മഡുറോയെ പിടികൂടുന്നതിലേക്ക് നയിച്ച യുഎസ് ആക്രമണങ്ങൾക്കു പിന്നിൽ മികച്ച ആസൂത്രണം ഉണ്ടായിരുന്നതായി ട്രംപ് ന്യൂയോർക്ക് ടൈംസിനോട് പറഞ്ഞു. മഡുറോ നടത്തിയ കുറ്റകൃത്യങ്ങൾക്ക് വിചാരണ നേരിടണമെന്ന് യുഎസ് അധികൃതർ ആവശ്യപ്പെട്ടു.
വെനസ്വേലയിലെ സാഹചര്യങ്ങൾ സൂക്ഷ്മമായി നിരീക്ഷിക്കുകയാണെന്ന് ഇറ്റാലിയൻ പ്രധാനമന്ത്രി ജോർജ മെലോനി പ്രതികരിച്ചു. മഡുറോയെ പിടികൂടിയ സാഹചര്യത്തിൽ വെനസ്വേലയ്ക്കെതിരെ കൂടുതൽ നടപടികൾ ഉണ്ടാകില്ലെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞതായി റിപ്പബ്ലിക്കൻ സെനറ്റർ മൈക്ക് ലീ അറിയിച്ചു.
അതേസമയം, “പ്രസിഡന്റും ഭാര്യയും ജീവനോടെ ഉണ്ടെന്നതിന്റെ തെളിവുകൾ ഉടൻ പുറത്തുവിടണം” എന്ന് വെനസ്വേലൻ വൈസ് പ്രസിഡന്റ് ഡെൽസി റോഡ്രിഗസ് ആവശ്യപ്പെട്ടിട്ടുണ്ട്.
ഈ സൈനിക നീക്കത്തോടെ വെനസ്വേലയിലെ രാഷ്ട്രീയ സംഘർഷങ്ങൾ പുതിയൊരു തലത്തിലേക്ക് എത്തിയിരിക്കുകയാണ്. വരാനിരിക്കുന്ന വാർത്താ സമ്മേളനത്തിൽ അമേരിക്കയുടെ ഈ കടുത്ത നടപടിയുടെ കാരണങ്ങളും ഭാവി നീക്കങ്ങളും വ്യക്തമാകുമെന്നാണ് പ്രതീക്ഷ.
