അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അമേരിക്കയ്ക്ക് ഇന്ത്യയോളം പ്രധാനപ്പെട്ട മറ്റൊരു രാജ്യമില്ലെന്ന് ഇന്ത്യയിലെ യുഎസ് സ്ഥാനപതി സെർജിയോ ഗോർ വ്യക്തമാക്കി. ലോകത്തിലെ ഏറ്റവും വലിയ രണ്ട് ജനാധിപത്യ രാജ്യങ്ങൾ തമ്മിലുള്ള ബന്ധം ഉന്നത തലത്തിലുള്ള സൗഹൃദത്താലും പരസ്പരം പങ്കിടുന്ന താൽപ്പര്യങ്ങളാലും കൂടുതൽ ദൃഢമാവുകയാണെന്നും അദ്ദേഹം പറഞ്ഞു.
ഇന്ത്യയും യുഎസും തമ്മിലുള്ള വ്യാപാര ചർച്ചകളുടെ അടുത്ത ഘട്ടം ചൊവ്വാഴ്ച മുതൽ പുനരാരംഭിക്കാൻ തയ്യാറെടുക്കുന്നതിനിടെയാണ് ഗോറിന്റെ സുപ്രധാന പ്രസ്താവന. നിലവിലെ വാണിജ്യപരമായ അഭിപ്രായവ്യത്യാസങ്ങൾക്കിടയിലും, അടുത്ത വർഷം യുഎസ് പ്രസിഡന്റ് ഡൊണാൾഡ് ട്രംപ് ഇന്ത്യ സന്ദർശിക്കാനുള്ള സാധ്യത അദ്ദേഹം സൂചിപ്പിച്ചു. ട്രംപും പ്രധാനമന്ത്രി നരേന്ദ്ര മോദിയും തമ്മിലുള്ള സൗഹൃദം യഥാർത്ഥമാണ്. യഥാർത്ഥ സുഹൃത്തുക്കൾക്ക് അവരുടെ അഭിപ്രായവ്യത്യാസങ്ങൾ പരിഹരിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
യുഎസ് എംബസിയിലെ ദക്ഷിണ മധ്യ ഏഷ്യയിലെ പ്രത്യേക പ്രതിനിധി കൂടിയായ സെർജിയോ ഗോർ, ഇന്ത്യയിലെ യുഎസ് സ്ഥാനപതിയായി ചുമതലയേറ്റ ശേഷം നടത്തിയ പ്രസംഗത്തിലാണ് ഇരു രാജ്യങ്ങളും തമ്മിലുള്ള ബന്ധത്തിന്റെ പ്രാധാന്യം ഊന്നിപ്പറഞ്ഞത്. വ്യാപാരമാണ് ഇന്ത്യ-യുഎസ് ബന്ധത്തിലെ പ്രധാന ഘടകമെങ്കിലും, സുരക്ഷ, ഭീകരവാദ വിരുദ്ധ പ്രവർത്തനങ്ങൾ, ഊർജ്ജം, സാങ്കേതികവിദ്യ, വിദ്യാഭ്യാസം, ആരോഗ്യം തുടങ്ങിയ സുപ്രധാന മേഖലകളിലും ഇരു രാജ്യങ്ങളും അടുത്ത സഹകരണം നിലനിർത്തുന്നുണ്ടെന്നും അദ്ദേഹം ചൂണ്ടിക്കാട്ടി.
ഇന്ത്യൻ വിദേശകാര്യ മന്ത്രാലയം ഈ വിഷയത്തിൽ ഇതുവരെ പ്രതികരണം അറിയിച്ചിട്ടില്ല.
