അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കോഴിക്കോട് കോർപ്പറേഷൻ സ്റ്റാൻഡിങ് കമ്മിറ്റി തിരഞ്ഞെടുപ്പിലുണ്ടായ രാഷ്ട്രീയ തിരിച്ചടി കോൺഗ്രസിനുള്ളിൽ വൻ പൊട്ടിത്തെറിക്ക് വഴിതുറക്കുന്നു. കോർപ്പറേഷനിൽ 14 അംഗബലമുണ്ടായിട്ടും ഒരു അധ്യക്ഷ പദവി പോലും നേടിയെടുക്കാൻ കഴിയാത്തത് പാർട്ടിക്ക് വലിയ നാണക്കേടുണ്ടാക്കിയെന്നാണ് വിലയിരുത്തൽ.
സംഭവത്തിൽ തിരഞ്ഞെടുപ്പ് ചുമതലയുണ്ടായിരുന്ന കെപിസിസി ജനറൽ സെക്രട്ടറി അഡ്വക്കേറ്റ് പി.എം. നിയാസിനെതിരെ ഗുരുതരമായ ആരോപണങ്ങളുമായി മുതിർന്ന നേതാക്കൾ തന്നെ രംഗത്തെത്തിയിരിക്കുകയാണ്.
മുൻ ഡിസിസി പ്രസിഡന്റ് കെ.സി. അബു ആണ് ഈ വിഷയത്തിൽ പരസ്യമായ നിലപാടെടുത്തത്. ബിജെപിക്ക് കോഴിക്കോട് കോർപ്പറേഷന്റെ ചരിത്രത്തിൽ ആദ്യമായി ഒരു സ്റ്റാൻഡിങ് കമ്മിറ്റി ചെയർമാൻ സ്ഥാനം ലഭിക്കാൻ പി.എം. നിയാസിന്റെ വീഴ്ചകൾ കാരണമായെന്ന് അദ്ദേഹം ആരോപിക്കുന്നു.
ഇക്കാര്യം ചൂണ്ടിക്കാട്ടി എഐസിസി ജനറൽ സെക്രട്ടറിമാരായ കെ.സി. വേണുഗോപാൽ, ദീപാ ദാസ് മുൻഷി, പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല എന്നിവർക്ക് അദ്ദേഹം ഔദ്യോഗികമായി പരാതി നൽകി.
തിരഞ്ഞെടുപ്പ് നിയന്ത്രിക്കാൻ എത്തിയ നിയാസ് പാർട്ടിയിലെ ഗ്രൂപ്പ് പോരിന്റെ പേരിൽ പ്രതികാരം തീർക്കുകയാണെന്നാണ് പരാതിയിലെ പ്രധാന ആരോപണം. 35 അംഗങ്ങളുള്ള ഇടതുമുന്നണി തന്ത്രപരമായി നീങ്ങി പ്രധാനപ്പെട്ട ആറ് കമ്മിറ്റികളിലും വിജയിച്ചു.
എന്നാൽ വെറും 13 അംഗങ്ങൾ മാത്രമുള്ള ബിജെപിക്ക് ഒരു സ്റ്റാൻഡിങ് കമ്മിറ്റി ചെയർമാൻ സ്ഥാനം ലഭിച്ചപ്പോൾ, അവരേക്കാൾ അംഗബലമുള്ള കോൺഗ്രസിന് (14 പേർ) ഒരു സീറ്റുപോലും ലഭിക്കാത്തത് നേതൃത്വത്തിന്റെ പിടിപ്പുകേടാണെന്ന് കത്തിൽ ചൂണ്ടിക്കാട്ടുന്നു.
വോട്ട് ഏകോപിപ്പിക്കുന്നതിൽ വന്ന പാളിച്ച ബിജെപിക്ക് അനുകൂലമായത് വരും ദിവസങ്ങളിൽ കോഴിക്കോട്ടെ കോൺഗ്രസ് രാഷ്ട്രീയത്തിൽ വലിയ വാഗ്വാദങ്ങൾക്ക് കാരണമാകും. പാർട്ടിക്കുള്ളിലെ വിഭാഗീയതയും ഏകോപനമില്ലായ്മയും ബിജെപിക്ക് വളമിട്ടു നൽകി എന്ന പരാതി ഹൈക്കമാൻഡ് ഗൗരവമായി പരിഗണിക്കുമെന്നാണ് വിമത വിഭാഗത്തിന്റെ പ്രതീക്ഷ.
