അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ദേശീയ തലസ്ഥാനത്തെ കർത്തവ്യപഥിൽ നടക്കുന്ന റിപ്പബ്ലിക് ദിന പരേഡിൽ കേരളത്തിന്റെ അഭിമാനമുയർത്താൻ എൻസിസി ബാൻഡ് സംഘം തയ്യാറെടുക്കുന്നു. ചരിത്രത്തിലാദ്യമായാണ് കേരളത്തിൽ നിന്നുള്ള ആൺകുട്ടികളുടെ ബാൻഡ് സംഘം ദേശീയ പരേഡിൽ അണിനിരക്കുന്നത് എന്നത് ഈ നേട്ടത്തിന്റെ തിളക്കം വർധിപ്പിക്കുന്നു.
കേരളത്തെയും ലക്ഷദ്വീപിനെയും പ്രതിനിധീകരിച്ച് ഇത്തവണ 174 കേഡറ്റുകളാണ് ഡൽഹിയിലെ ക്യാമ്പിലുള്ളത്. ഇതിൽ വാദ്യോപകരണങ്ങളിൽ വിസ്മയം തീർക്കുന്ന 45 അംഗ സംഘമാണ് ബാൻഡ് പരേഡിൽ പങ്കെടുക്കുന്നത്.
ഡൽഹിയിലെ കഠിനമായ തണുപ്പിനെ അവഗണിച്ചുകൊണ്ട് മാസങ്ങളായി തുടരുന്ന കഠിന പരിശീലനത്തിന് ഒടുവിലാണ് ഈ സ്വപ്ന നേട്ടം ഇവരെ തേടിയെത്തിയത്. ഈ സംഘത്തിലെ 29 പേരും തൊടുപുഴ ന്യൂമാൻ കോളേജിലെ വിദ്യാർത്ഥികളാണ് എന്നത് ഇടുക്കി ജില്ലയ്ക്കും കോളേജിനും വലിയ അഭിമാനമായി മാറി.
പരേഡിന് മുന്നോടിയായി ദേശീയ യുദ്ധസ്മാരകത്തിൽ (National War Memorial) ഈ മിടുക്കന്മാർ ബാൻഡ് അവതരിപ്പിച്ച് ധീരജവാന്മാർക്ക് മ്യൂസിക്കൽ സല്യൂട്ട് അർപ്പിച്ചു.
കഴിഞ്ഞ വർഷം കേരളത്തിൽ നിന്നുള്ള പെൺകുട്ടികളുടെ ബാൻഡ് സംഘം പരേഡിൽ പങ്കെടുത്ത് ശ്രദ്ധ നേടിയിരുന്നു. അതിന്റെ തുടർച്ചയെന്നോണമാണ് ഇത്തവണ ആൺകുട്ടികളുടെ സംഘവും ചരിത്രത്തിന്റെ ഭാഗമാകുന്നത്. രാജ്യത്തിന്റെ വിവിധ ഭാഗങ്ങളിൽ നിന്നായി എത്തിയ അഞ്ച് ബാൻഡ് സംഘങ്ങളിൽ ഒന്നായാണ് കേരള സംഘം തിരഞ്ഞെടുക്കപ്പെട്ടത്.
