പാലസ്തീന് ഇന്ത്യയുടെ ഉറച്ച പിന്തുണ; അറബ് രാഷ്ട്രങ്ങളുമായുള്ള ബന്ധം പുതുക്കി പ്രധാനമന്ത്രി

പാലസ്തീൻ ജനതയോടുള്ള ഇന്ത്യയുടെ ഐക്യദാർഢ്യവും പിന്തുണയും ആവർത്തിച്ച് പ്രധാനമന്ത്രി നരേന്ദ്ര മോദി. ശനിയാഴ്ച തലസ്ഥാനത്ത് നടന്ന രണ്ടാമത് ഇന്ത്യ-അറബ് വിദേശകാര്യ മന്ത്രിമാരുടെ യോഗത്തിലാണ് മേഖലയിലെ സമാധാന ശ്രമങ്ങൾക്ക് ഇന്ത്യയുടെ പൂർണ്ണ പിന്തുണ പ്രധാനമന്ത്രി പ്രഖ്യാപിച്ചത്.

ഗാസയിലെ സംഘർഷം അവസാനിപ്പിക്കാൻ യുഎസ് പ്രസിഡന്റ് ഡൊണാൾഡ് ട്രംപ് മുന്നോട്ടുവെച്ച സമാധാന പദ്ധതിയെയും അദ്ദേഹം യോഗത്തിൽ പരാമർശിച്ചു.

​പാലസ്തീൻ ജനതയുടെ അവകാശങ്ങൾക്കും ഗാസയിൽ സമാധാനം പുനഃസ്ഥാപിക്കാനുമുള്ള എല്ലാ ക്രിയാത്മക നീക്കങ്ങളെയും ഇന്ത്യ സ്വാഗതം ചെയ്യുന്നതായി പ്രധാനമന്ത്രി വ്യക്തമാക്കി. പശ്ചിമേഷ്യയിൽ സ്ഥിരത ഉറപ്പാക്കുന്നതിൽ ‘ലീഗ് ഓഫ് അറബ് സ്റ്റേറ്റ്സ്’ വഹിക്കുന്ന നിർണ്ണായക പങ്കിനെ അദ്ദേഹം അഭിനന്ദിച്ചു. സമാധാന ചർച്ചകൾക്ക് അറബ് രാജ്യങ്ങൾ നൽകുന്ന നേതൃത്വം മേഖലയുടെ പുരോഗതിക്ക് അനിവാര്യമാണെന്നും പ്രധാനമന്ത്രിയുടെ ഓഫീസ് (PMO) പുറത്തിറക്കിയ പ്രസ്താവനയിൽ പറയുന്നു.

​ഇന്ത്യയും അറബ് ലോകവും തമ്മിലുള്ള ചരിത്രപരമായ ബന്ധത്തെക്കുറിച്ച് വാചാലനായ പ്രധാനമന്ത്രി, നൂറ്റാണ്ടുകൾ പഴക്കമുള്ള ഈ നാഗരിക ബന്ധമാണ് ഇരുപക്ഷവും തമ്മിലുള്ള സഹകരണത്തിന് ഊർജ്ജം പകരുന്നതെന്ന് ചൂണ്ടിക്കാട്ടി. വരും വർഷങ്ങളിൽ അറബ് രാഷ്ട്രങ്ങളുമായുള്ള പങ്കാളിത്തം കൂടുതൽ വിപുലമാക്കാനാണ് ഇന്ത്യ ലക്ഷ്യമിടുന്നത്. വ്യാപാരം, ഊർജ്ജ സുരക്ഷ, സാങ്കേതിക വിദ്യ എന്നീ മേഖലകളിൽ പുതിയ സഹകരണ മാതൃകകൾ അദ്ദേഹം വിഭാവനം ചെയ്തു.

​അറബ് പ്രതിനിധികൾക്കൊപ്പമുള്ള ചിത്രം പങ്കുവെച്ചുകൊണ്ട് ‘എക്സി’ലൂടെയും (X) പ്രധാനമന്ത്രി തന്റെ നിലപാട് വ്യക്തമാക്കി. “അറബ് ലോകം ഇന്ത്യയുടെ വിശാലമായ അയൽപക്കത്തിന്റെ അവിഭാജ്യ ഘടകമാണ്. സമാധാനം, പുരോഗതി, സ്ഥിരത എന്നിവയോടുള്ള പൊതുവായ പ്രതിബദ്ധത ഞങ്ങൾ പങ്കിടുന്നു,” അദ്ദേഹം കുറിച്ചു. സാങ്കേതികവിദ്യയിലും നവീകരണത്തിലും കൈകോർക്കുന്നത് ഇരുപക്ഷത്തെയും കൂടുതൽ ഉയരങ്ങളിലെത്തിക്കുമെന്നും അദ്ദേഹം കൂട്ടിച്ചേർത്തു.