അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇന്ത്യയും അമേരിക്കയും തമ്മിലുള്ള വ്യാപാര കരാർ യാഥാർത്ഥ്യമായെന്ന പ്രഖ്യാപനത്തിന് പിന്നാലെ കേന്ദ്ര സർക്കാരിനെതിരെ കടുത്ത വിമർശനവുമായി കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ. റഷ്യയിൽ നിന്നുള്ള എണ്ണ ഇറക്കുമതി ഇന്ത്യ അവസാനിപ്പിക്കുമെന്നും പകരം അമേരിക്കയിൽ നിന്ന് കൂടുതൽ എണ്ണ വാങ്ങുമെന്നുമുള്ള ഡൊണാൾഡ് ട്രംപിന്റെ പ്രസ്താവന ഇന്ത്യൻ പരമാധികാരത്തിന്മേലുള്ള കടന്നുകയറ്റമാണെന്ന് പ്രതിപക്ഷം ആരോപിക്കുന്നു.
പ്രധാനമന്ത്രി നരേന്ദ്ര മോദിയുടെ മേൽ പ്രസിഡന്റ് ട്രംപിന് വ്യക്തമായ സ്വാധീനമുണ്ടെന്നും മിസ്റ്റർ മോദി ഒടുവിൽ ട്രംപിന് മുന്നിൽ കീഴടങ്ങിയെന്നും കോൺഗ്രസ് നേതാവ് ജയറാം രമേശ് കുറ്റപ്പെടുത്തി. ഇന്ത്യയുടെ ആഭ്യന്തര നയങ്ങളും നയതന്ത്ര തീരുമാനങ്ങളും ഇന്ത്യൻ സർക്കാരിന് പകരം ട്രംപാണ് പ്രഖ്യാപിക്കുന്നതെന്ന് അദ്ദേഹം പരിഹസിച്ചു. ഓപ്പറേഷൻ സിന്ദൂർ അവസാനിപ്പിച്ചത് മുതൽ റഷ്യൻ എണ്ണ ഇറക്കുമതി നിയന്ത്രിക്കുന്നത് വരെയുള്ള കാര്യങ്ങൾ അമേരിക്കൻ പ്രസിഡന്റിൽ നിന്നാണ് രാജ്യം അറിയുന്നതെന്നും ഇത് ലജ്ജാകരമാണെന്നും അദ്ദേഹം എക്സിൽ കുറിച്ചു.
റഷ്യയിൽ നിന്നുള്ള എണ്ണ വാങ്ങുന്നത് ഇന്ത്യ നിർത്തുകയാണെന്നും അമേരിക്കയിൽ നിന്നും വെനസ്വേലയിൽ നിന്നും കൂടുതൽ എണ്ണ വാങ്ങാൻ ധാരണയായെന്നും ട്രംപ് വെളിപ്പെടുത്തിയിരുന്നു. ഇറാനിൽ നിന്നുള്ള എണ്ണ വാങ്ങുന്നതിനും ട്രംപ് നിയന്ത്രണം നിർദ്ദേശിച്ചതായാണ് റിപ്പോർട്ടുകൾ. ഇന്ത്യയുടെ ഊർജ്ജ സുരക്ഷയെ ബാധിക്കുന്ന ഇത്തരം നിർണ്ണായക തീരുമാനങ്ങൾ അമേരിക്കൻ താൽപ്പര്യങ്ങൾ സംരക്ഷിക്കാനാണെന്നാണ് പ്രതിപക്ഷത്തിന്റെ പ്രധാന ആരോപണം.
പ്രധാനമന്ത്രിയും ട്രംപും തമ്മിൽ നടത്തിയ ഫോൺ സംഭാഷണത്തിന്റെ വിവരങ്ങൾ പോലും ഇന്ത്യൻ വിദേശകാര്യ മന്ത്രാലയത്തിന് പകരം യുഎസ് അംബാസിഡറാണ് നൽകിയതെന്നത് ഗുരുതരമായ വീഴ്ചയാണെന്ന് പ്രതിപക്ഷം ചൂണ്ടിക്കാട്ടുന്നു. സർക്കാരിന്റെ പ്രവർത്തനങ്ങളെക്കുറിച്ച് അറിയാൻ ട്രംപിലോ അദ്ദേഹം നിയമിച്ചവരിലോ അഭയം പ്രാപിക്കേണ്ടി വരുന്നത് പതിവായി മാറിയിരിക്കുകയാണെന്നും കോൺഗ്രസ് വിമർശിച്ചു.
