അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശബരിമലയിലെ സ്വർണ്ണക്കവർച്ചാ കേസിലെ മുഖ്യപ്രതി ഉണ്ണികൃഷ്ണൻ പോറ്റി സമർപ്പിച്ച ജാമ്യാപേക്ഷയിൽ കൊല്ലം വിജിലൻസ് കോടതി വ്യാഴാഴ്ച വിധി പ്രസ്താവിക്കും. കട്ടിള പാളി മോഷണ കേസുമായി ബന്ധപ്പെട്ട് നൽകിയ ഹർജിയിൽ വാദം പൂർത്തിയായതിനെത്തുടർന്നാണ് കോടതി വിധി പറയാൻ മാറ്റിവെച്ചത്.
ജുഡീഷ്യൽ കസ്റ്റഡിയിൽ 90 ദിവസം പിന്നിട്ടിട്ടും അന്വേഷണസംഘം കുറ്റപത്രം സമർപ്പിക്കാത്ത സാഹചര്യത്തിൽ, തനിക്ക് സ്വാഭാവിക ജാമ്യത്തിന് അർഹതയുണ്ടെന്നാണ് പോറ്റിയുടെ വാദം. കഴിഞ്ഞ തിങ്കളാഴ്ചയാണ് ഇത് ചൂണ്ടിക്കാട്ടി പ്രതി കോടതിയെ സമീപിച്ചത്. ഇരുഭാഗത്തുനിന്നും വിശദമായ വാദപ്രതിവാദങ്ങൾ കേട്ട കോടതി കേസ് വിധി പറയാനായി മാറ്റുകയായിരുന്നു.
നേരത്തെ, ദ്വാരപാലക ശില്പത്തിലെ സ്വർണ്ണം അപഹരിച്ചതുമായി ബന്ധപ്പെട്ട കേസിൽ ഉണ്ണികൃഷ്ണൻ പോറ്റിക്ക് ജനുവരി 21-ന് സ്വാഭാവിക ജാമ്യം ലഭിച്ചിരുന്നു. എന്നാൽ കട്ടിള പാളി കേസിലെ നടപടികൾ തുടരുന്നതിനാൽ പ്രതിക്ക് ജയിലിന് പുറത്തിറങ്ങാൻ കഴിഞ്ഞിരുന്നില്ല. അന്വേഷണം ഇഴഞ്ഞുനീങ്ങുന്നത് പ്രതിഭാഗം കോടതിയിൽ പ്രധാന ആയുധമാക്കുന്നുണ്ട്.
അതിനിടെ, നിലവിലുള്ള റിമാൻഡ് കാലാവധി അവസാനിച്ചതിനെത്തുടർന്ന് ബുധനാഴ്ച പോറ്റിയെ കോടതിയിൽ ഹാജരാക്കിയിരുന്നു. പ്രതിയുടെ റിമാൻഡ് കാലാവധി കോടതി 14 ദിവസത്തേക്ക് കൂടി ദീർഘിപ്പിച്ചു.
