അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശബരിമല യുവതീ പ്രവേശനവുമായി ബന്ധപ്പെട്ട പുനഃപരിശോധനാ ഹർജികൾ സുപ്രീം കോടതിയുടെ പരിഗണനയ്ക്ക് എത്തുമ്പോൾ വിഷയത്തിൽ അതീവ ജാഗ്രതയോടെയുള്ള നിലപാടാണ് സി.പി.എം സ്വീകരിക്കുന്നത്. കോടതി എന്ത് തീരുമാനമെടുത്താലും അത് നടപ്പിലാക്കുമെന്നും, കോടതിയുടെ നിലപാടാണ് പാർട്ടിക്കുള്ളതെന്നും സി.പി.എം സംസ്ഥാന സെക്രട്ടറി എം.വി. ഗോവിന്ദൻ വ്യക്തമാക്കി. വിശ്വാസികളോട് ഏറ്റവും കൂടുതൽ കൂറുള്ളത് ഇടതുപക്ഷത്തിനാണെന്നും അദ്ദേഹം കൂട്ടിച്ചേർത്തു.
നേരത്തെ യുവതീ പ്രവേശനത്തെ അനുകൂലിച്ച് സുപ്രീം കോടതി വിധി വന്നപ്പോൾ അത് നടപ്പിലാക്കാൻ സർക്കാർ സന്നദ്ധമായിരുന്നു. “കോടതി കയറ്റാൻ പറഞ്ഞപ്പോൾ കയറ്റി, വേണ്ടെന്ന് വെച്ചാൽ കയറ്റില്ല” എന്ന നിലപാടാണ് ഇപ്പോൾ എം.വി. ഗോവിന്ദൻ മുന്നോട്ട് വെക്കുന്നത്. വിശ്വാസികളുടെ വികാരം വ്രണപ്പെടുത്താതെയും അതേസമയം ഭരണഘടനാപരമായ ഉത്തരവാദിത്തം മറക്കാതെയുമുള്ള ഒരു സമവായ പാതയാണ് പാർട്ടി ഇപ്പോൾ ലക്ഷ്യമിടുന്നത്.
2018-ലെ സുപ്രീം കോടതി വിധിയെ തുടർന്നുണ്ടായ സംഭവവികാസങ്ങൾ 2019-ലെ ലോക്സഭാ തിരഞ്ഞെടുപ്പിൽ എൽ.ഡി.എഫിന് വലിയ തിരിച്ചടിയായിരുന്നു. ഈ പശ്ചാത്തലത്തിൽ, വൈകാരികമായ ഈ വിഷയത്തെ രാഷ്ട്രീയമായി കൈകാര്യം ചെയ്യുന്നതിൽ പാർട്ടി വലിയ മാറ്റങ്ങൾ വരുത്തിയിട്ടുണ്ട്. യുവതീ പ്രവേശനത്തിന് അനുകൂലമായ പഴയ കർക്കശ നിലപാടിൽ നിന്ന് മാറി, വിഷയം അനാവശ്യമായി ചർച്ചയാക്കാതെ ഒതുക്കിത്തീർക്കാനാണ് സർക്കാരും മുന്നണിയും ശ്രമിക്കുന്നത്.
