അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ജില്ലാ ആശുപത്രിയിൽ പ്രസവ ശസ്ത്രക്രിയയ്ക്ക് പിന്നാലെ നവജാതശിശു മരിച്ച സംഭവത്തിൽ ഗൈനക്കോളജിസ്റ്റിനെ സസ്പെൻഡ് ചെയ്തതിൽ പ്രതിഷേധിച്ച് ഡോക്ടർമാർ സമരം ശക്തമാക്കുന്നു. ഇന്ന് നെടുമങ്ങാട് ജില്ലാ ആശുപത്രിയിൽ ഒപി ബഹിഷ്കരിക്കാനാണ് ഡോക്ടർമാരുടെ സംഘടനയായ കെ.ജി.എം.ഒ.എ (KGMOA) തീരുമാനിച്ചിരിക്കുന്നത്. ഇതോടെ ആശുപത്രിയുടെ പ്രവർത്തനം ഭാഗികമായി തടസ്സപ്പെടുമെന്ന് ഉറപ്പായി.
പ്രതിഷേധത്തിന്റെ ഭാഗമായി അടിയന്തര ശസ്ത്രക്രിയകൾ ഒഴികെയുള്ളവ നിർത്തിവയ്ക്കാനാണ് ഡോക്ടർമാരുടെ തീരുമാനം. പുതിയ രോഗികളെ വാർഡുകളിൽ പ്രവേശിപ്പിക്കില്ലെന്നും മറ്റ് ആശുപത്രികളിൽ നിന്നുള്ള റഫറൽ കേസുകൾ സ്വീകരിക്കില്ലെന്നും പ്രതിഷേധക്കാർ വ്യക്തമാക്കിയിട്ടുണ്ട്. നെടുമങ്ങാട് താലൂക്കിലെയും പരിസരപ്രദേശങ്ങളിലെയും സാധാരണക്കാരായ രോഗികൾ ഇതോടെ കടുത്ത ദുരിതത്തിലാകും.
ആരോപണവിധേയയായ ഡോ. ബിന്ദു സുന്ദറിന്റെ സസ്പെൻഷൻ പിൻവലിക്കണമെന്നാണ് ഡോക്ടർമാരുടെ പ്രധാന ആവശ്യം. നിലവിൽ നെടുമങ്ങാട് കേന്ദ്രീകരിച്ചുള്ള പ്രതിഷേധം വരും ദിവസങ്ങളിൽ തിരുവനന്തപുരം ജില്ലയിലാകെ വ്യാപിപ്പിക്കാനാണ് സംഘടനയുടെ നീക്കം. ഇതുസംബന്ധിച്ച അന്തിമ തീരുമാനമെടുക്കാൻ നാളെ ഡോക്ടർമാരുടെ അടിയന്തര ജനറൽ ബോഡി യോഗം ചേരും.
