അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അഞ്ച് ലക്ഷം രൂപ കൈക്കൂലി വാങ്ങുന്നതിനിടെ കർണാടകയിലെ ഷിരഹട്ടി മണ്ഡലത്തിൽ നിന്നുള്ള ബിജെപി എംഎൽഎ ചന്ദ്രു ലമാനിയെയും രണ്ട് സഹായികളെയും ലോകായുക്ത പോലീസ് അറസ്റ്റ് ചെയ്തു. ചെറുകിട ജലസേചന വകുപ്പിന്റെ പദ്ധതിക്ക് അനുമതി നൽകുന്നതിനായി കരാറുകാരനിൽ നിന്ന് പണം വാങ്ങുമ്പോഴാണ് എംഎൽഎ പിടിയിലായത്. കൃത്യമായ തെളിവുകളുടെ അടിസ്ഥാനത്തിൽ ലോകായുക്ത പോലീസ് നടത്തിയ മിന്നൽ പരിശോധനയിലാണ് ഇവർ കുടുങ്ങിയത്.
ഗദഗിലെ ഒരു കരാറുകാരൻ നൽകിയ പരാതിയാണ് അറസ്റ്റിലേക്ക് നയിച്ചത്. പദ്ധതിയുമായി ബന്ധപ്പെട്ട ക്ലിയറൻസ് നൽകുന്നതിനായി എംഎൽഎ 11 ലക്ഷം രൂപയാണ് പ്രതിഫലമായി ആവശ്യപ്പെട്ടത്. കരാറുകാരൻ ഈ വിവരം ലോകായുക്തയെ അറിയിക്കുകയും അവരുടെ നിർദ്ദേശപ്രകാരം കെണിയൊരുക്കുകയുമായിരുന്നു. ആദ്യ ഗഡുവായ അഞ്ച് ലക്ഷം രൂപ കൈമാറുന്നതിനിടെയാണ് നാടകീയമായ നീക്കത്തിലൂടെ പോലീസ് സംഘം ഇവരെ പിടികൂടിയത്.
അറസ്റ്റിലായ എംഎൽഎയെയും സഹായികളെയും നിലവിൽ ചോദ്യം ചെയ്തുവരികയാണ്. ഇവരിൽ നിന്നും പിടിച്ചെടുത്ത പണം കോടതിയിൽ ഹാജരാക്കും.
