അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നടൻ ദിലീപുമായി സിനിമ ചെയ്യുന്നുവെന്ന വാർത്തയിൽ പ്രതികരണവുമായി സംവിധായകൻ ചിദംബരം. ചവറ് വാർത്തകൾ പങ്കുവയ്ക്കുന്നതിനു മുമ്പ് ശരിയാണോ എന്നു ഉറപ്പു വരുത്തണമെന്നും താനൊരു സർവൈവൽ സ്പെഷലിസ്റ്റ് അല്ല എന്നും സംവിധായകൻ പറഞ്ഞു.
ദിലീപും മഞ്ഞുമ്മല് ബോയ്സ് സംവിധായകന് ചിദംബരവും ഒരു സിനിമയ്ക്കായി ഒരുമിക്കുന്നുവെന്നും ഇതൊരു സര്വൈര് ത്രില്ലര് ആയിരിക്കും എന്നുമായിരുന്നു വാര്ത്ത. ഈ വാര്ത്ത പങ്കുവച്ചു കൊണ്ടാണ് ഇതിൽ സത്യമില്ലെന്ന് ചിദംബരം അറിയിച്ചത്.
‘‘ചവറ് പോസ്റ്റ് ചെയ്യുന്നതിന് മുമ്പ് ദയവ് ചെയ്ത് ശരിയാണോ എന്ന് പരിശോധിക്കുക. പിന്നെ, ഞാനൊരു സര്വൈവല് ത്രില്ലര് സ്പെഷലിസ്റ്റല്ല’’ ചിദംബരം ഇന്സ്റ്റഗ്രാം സ്റ്റോറിയായി കുറിച്ചു. ഇതോടെ ദിലീപ് ചിത്രവുമായി ബന്ധപ്പെട്ട അഭ്യൂഹങ്ങളും അവസാനിച്ചിരിക്കുകയാണ്.
‘മഞ്ഞുമ്മല് ബോയ്സ്’ ആണ് ചിദംബരം അവസാനമായി സംവിധാനം ചെയ്ത ചിത്രം. ‘ബാലന്’ ആണ് ചിദംബരത്തിന്റെ പുതിയ ചിത്രം. ‘ആവേശം’ സംവിധായകന് ജിത്തു മാധവന് ആണ് സിനിമയുടെ രചന.
