അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ആന്ധ്രപ്രദേശിലെ കാക്കിനാഡ ജില്ലയിലുണ്ടായ അതിശക്തമായ സ്ഫോടനത്തിൽ 18 പേർ കൊല്ലപ്പെട്ടു. വെറ്റിലപ്പാലം ഗ്രാമത്തിന് സമീപം പ്രവർത്തിക്കുന്ന ‘സൂര്യ ഫയർ വർക്സ്’ എന്ന പടക്കനിർമ്മാണ ശാലയിലാണ് ശനിയാഴ്ച ഉച്ചയോടെ നാടിനെ നടുക്കിയ ദുരന്തമുണ്ടായത്. മരിച്ചവരിൽ ഭൂരിഭാഗവും നിർമ്മാണശാലയിലെ തൊഴിലാളികളാണെന്നാണ് പ്രാഥമിക വിവരം.
ശനിയാഴ്ച ഉച്ചയ്ക്ക് രണ്ട് മണിയോടെയാണ് അപകടം നടന്നത്. പടക്കങ്ങൾ നിർമ്മിക്കുന്നതിനിടെയുണ്ടായ തീപിടുത്തം വലിയ സ്ഫോടനത്തിലേക്ക് നയിക്കുകയായിരുന്നു. അഞ്ച് കിലോമീറ്റർ ചുറ്റളവിൽ വരെ സ്ഫോടനത്തിന്റെ ശബ്ദം കേട്ടതായി പ്രദേശവാസികൾ പറഞ്ഞു. സ്ഫോടനത്തെത്തുടർന്ന് കിലോമീറ്ററുകളോളം കറുത്ത പുകപടലങ്ങൾ ആകാശത്തേക്ക് ഉയർന്നത് ജനങ്ങളിൽ പരിഭ്രാന്തി പരത്തി.
സ്ഫോടനത്തിന്റെ ആഘാതം അതിശക്തമായിരുന്നു. നിർമ്മാണശാല പൂർണ്ണമായും തകർന്നു എന്ന് മാത്രമല്ല, സമീപത്തെ സ്കൂൾ കെട്ടിടത്തിന് വരെ വിള്ളലുകൾ രൂപപ്പെട്ടിട്ടുണ്ട്. അപകടസമയത്ത് സ്കൂളിൽ കുട്ടികൾ കുറവായിരുന്നതിനാൽ വലിയൊരു ദുരന്തം ഒഴിവായി.
സംഭവത്തിൽ എട്ടുപേർക്ക് ഗുരുതരമായി പരിക്കേറ്റിട്ടുണ്ട്. ഇവരെ ഉടൻ തന്നെ സമീപത്തെ ആശുപത്രിയിലേക്ക് മാറ്റി. പരിക്കേറ്റവരിൽ ചിലരുടെ നില അതീവ ഗുരുതരമായി തുടരുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്ന് ആരോഗ്യവകുപ്പ് അധികൃതർ ആശങ്ക പ്രകടിപ്പിച്ചു.
