അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മധ്യപ്രദേശിലെ ഖണ്ഡ്വ ജില്ലയിൽ തൊണ്ണൂറ് വയസ്സുകാരിയെ നാലംഗ സംഘം ചേർന്ന് കൂട്ടബലാത്സംഗം ചെയ്തു. വ്യാഴാഴ്ച രാത്രി കൃഷിയിടത്തിലെ കുടിലിൽ വിശ്രമിക്കുകയായിരുന്ന വയോധികയെ മുഖംമൂടി ധരിച്ചെത്തിയ സംഘം ക്രൂരമായി ആക്രമിക്കുകയായിരുന്നു. രാജ്യത്തെ നടുക്കിയ സംഭവത്തിൽ പ്രതികളെ പിടികൂടാൻ പ്രത്യേക അന്വേഷണ സംഘം രംഗത്തിറങ്ങിയിട്ടുണ്ട്.
കൃഷിയിടത്തിലെ വിജനമായ കുടിലിൽ ഒറ്റയ്ക്കായിരുന്നു വയോധിക താമസിച്ചിരുന്നത്. രാത്രിയുടെ മറവിൽ മുഖം മറച്ചെത്തിയ നാലുപേർ ചേർന്ന് ഇവരെ പീഡിപ്പിക്കുകയായിരുന്നു. ക്രൂരമായ അതിക്രമത്തിന് ശേഷം പ്രതികൾ സ്ഥലത്തുനിന്നും രക്ഷപ്പെട്ടു. പിറ്റേദിവസം രാവിലെ സമീപ ഗ്രാമത്തിൽ താമസിക്കുന്ന മകളെ വിവരം അറിയിച്ചതോടെയാണ് പുറംലോകം ഈ ക്രൂരതയെക്കുറിച്ച് അറിയുന്നത്. ഉടൻതന്നെ ബന്ധുക്കളെത്തി ഇവരെ ജില്ലാ ആശുപത്രിയിൽ പ്രവേശിപ്പിച്ചു.
സംഭവത്തിൽ ജില്ലാ പോലീസ് സൂപ്രണ്ടിന്റെ നേതൃത്വത്തിൽ മൂന്ന് പ്രത്യേക സംഘങ്ങളായി തിരിഞ്ഞാണ് അന്വേഷണം നടക്കുന്നത്. പ്രതികളെക്കുറിച്ച് കൃത്യമായ സൂചന നൽകുന്നവർക്ക് 10,000 രൂപ പാരിതോഷികം പ്രഖ്യാപിച്ചിട്ടുണ്ട്. പ്രദേശത്തെ സിസിടിവി ദൃശ്യങ്ങളും സംശയാസ്പദമായ സാഹചര്യത്തിൽ കണ്ട ആളുകളെയും കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.
ആശുപത്രിയിൽ ചികിത്സയിൽ കഴിയുന്ന വയോധികയുടെ ആരോഗ്യനില നിലവിൽ തൃപ്തികരമാണെന്ന് പോലീസ് അറിയിച്ചു. ഇവർ അപകടനില തരണം ചെയ്തതായും കൃത്യമായ വൈദ്യസഹായം ഉറപ്പാക്കുന്നുണ്ടെന്നും മെഡിക്കൽ സംഘം വ്യക്തമാക്കി. മധ്യപ്രദേശിലെ സ്ത്രീസുരക്ഷയെക്കുറിച്ച് വീണ്ടും ഗൗരവമായ ചർച്ചകൾക്ക് ഈ സംഭവം വഴിവെച്ചിരിക്കുകയാണ്.
