അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മദ്ധ്യപൂര്വ്വേഷ്യയില് യുദ്ധം നടക്കുന്നതുമായി ബന്ധപ്പെട്ട് ഗാര്ഹിക മേഖലയിലും വാണിജ്യ മേഖലയിലും LPG ചരക്കുനീക്കം തടസ്സപ്പെട്ട സാഹചര്യത്തില് രാജ്യത്തിനകത്ത് LPG വിതരണത്തിന് കേന്ദ്ര സര്ക്കാര് നിയന്ത്രണം ഏര്പ്പെടുത്തിയിട്ടുണ്ട്. ഇതുമൂലം ഉണ്ടായിരിക്കുന്ന ഗുരുതര സാഹചര്യത്തെ നേരിടാന് ഭക്ഷ്യ മന്ത്രിയുടെയും മുഖ്യമന്ത്രിയുടെയും അധ്യക്ഷതയില് ഉന്നത ഉദ്യോഗസ്ഥരുടെയും ഓയില് കമ്പനികളുടെയും (IOC, BPCL, HPCL) യോഗം ചേരുകയും സ്ഥിതിഗതികള് വിലയിരുത്തുകയും പ്രതിസന്ധിയെ നേരിടുന്നതിന് അടിയന്തര നടപടികള് സ്വീകരിക്കാന് തീരുമാനിക്കുകയും ചെയ്തു. സിവില് സപ്ലൈസ് കമ്മീഷണറേറ്റില് ഇതിനായി ഒരു വാര് റൂം സജ്ജമാക്കി.
ഉപഭോക്തൃ സംസ്ഥാനമായ കേരളത്തിന്റെ സവിശേഷ സാഹചര്യം പരിഗണിച്ച് വാണിജ്യ ആവശ്യത്തിനുള്ള ഗ്യാസ് സിലണ്ടര് വിതരണത്തിലെ നിയന്ത്രണത്തില് ആവശ്യമായ ഇളവുകള് നല്കണമെന്ന് ഓയില് കമ്പനികളോട് സംസ്ഥാന സര്ക്കാര് ആവശ്യപ്പെട്ടു. ഇക്കാര്യം അഭ്യര്ത്ഥിച്ചുകൊണ്ട് കേന്ദ്ര പെട്രോളിയം – പ്രകൃതിവാതക വകുപ്പ് മന്ത്രി ഹര്ദീപ് സിംഗ് പുരിയ്ക്ക് മന്ത്രി ജി.ആര്. അനില് കത്ത് നല്കി. മുന്ഗണനാ മേഖലകളായ വൃദ്ധസദനങ്ങള്, ആശുപത്രികള്, അനാഥാലയങ്ങള്, സ്കൂളുകള്, ജനകീയ / സുഭിക്ഷാ ഹോട്ടലുകള് എന്നിവിടങ്ങളിലും സ്കൂള്, കോളേജ് ഹോസ്റ്റലുകളിലും ഹോസ്റ്റലുകളോട് ചേര്ന്നുള്ള ഹോട്ടലുകളിലും ഗസ്റ്റ് ഹൗസുകള്, സര്ക്കാര് – പൊതുമേഖല ഓഫീസ് ക്യാമ്പസിലെ ക്യാന്റീനുകള് എന്നിവയിലും മുന്ഗണന നല്കി വാണിജ്യ ആവശ്യത്തിനുള്ള സിലിണ്ടറുകള് വിതരണം ചെയ്യാന് തയ്യാറാകണമെന്നുള്ള സര്ക്കാരിന്റെ അഭ്യര്ത്ഥന അനുകൂലമായി പരിഗണിക്കാമെന്ന് ഓയില് കമ്പനികള് അറിയിച്ചു.
ഇതിലേക്കായി മുന്ഗണനാ മേഖലകളുടെയും സ്ഥാപനങ്ങളുടെയും പട്ടിക പൊതുവിതരണ വകുപ്പ് അംഗീകരിച്ച് ഓയില് കമ്പനികള്ക്ക് കൈമാറണമെന്നും യോഗം തീരുമാനിച്ചു. ഓയില് കമ്പനികള് നോണ്-ഡൊമസ്റ്റിക് ഉപഭോക്താക്കളുടെ ഡാറ്റാബേസ് ഉടന് തന്നെ വകുപ്പിന് കൈമാറുകയും സിവില് സപ്ലൈസ് വാര് റൂം, IT Mission ടീമിന്റെ പിന്തുണയോടെ ഡാറ്റ വിശകലനം ചെയ്ത് എസന്ഷ്യല് കാറ്റഗറികളില്പ്പെടുന്ന നോണ്-ഡൊമസ്റ്റിക് ഉപഭോക്താക്കളുടെ പട്ടിക തയ്യാറാക്കുകയും ചെയ്യും. പൊതുമേഖലാ ഗ്യാസ് ഏജന്സികളുടെ സ്റ്റോക്ക്, വരവ്, വിതരണം, നീക്കിയിരിപ്പ് അടക്കമുള്ള വിവരങ്ങള് എല്ലാ ദിവസവും 11 മണിക്ക് മുന്പായി ജില്ലാ ഭരണകൂടത്തിനും പൊതുവിതരണ വകുപ്പിനും ലഭ്യമാക്കാന് ആവശ്യമായ നടപടികള് ഓയില് കമ്പനികള് സ്വീകരിക്കണമെന്നും തീരുമാനിച്ചിട്ടുണ്ട്.
ഇതിലേക്കായി ഒരു ഡാഷ്ബോര്ഡ് സംവിധാനം തയ്യാറാക്കുന്നതിനായി ഐ.ടി മിഷനെ ചുമതലപ്പെടുത്തി. അത് സജ്ജമാകുന്നതുവരെ പൊതുവിതരണ വകുപ്പ് ലഭ്യമാക്കുന്ന ഗൂഗിള് ഷീറ്റില് ഓയില് കമ്പനികള് വിവരം ലഭ്യമാക്കുന്നതാണ്. കൂടാതെ, ബോട്ടിലിംഗ് പ്ലാന്റിന്റെ പ്രതിദിന ഉല്പ്പാദനം, നീക്കിയിരിപ്പ് എന്നിവ സംബന്ധിച്ച വിവരം സംസ്ഥാന സിവില് സപ്ലൈസ് കമ്മീഷണറുടെ കാര്യാലയത്തിലേക്ക് ദിവസേന മോണിറ്റര് ചെയ്യാന് കഴിയുന്ന വിധത്തില് ഓയില് കമ്പനികള് ലഭ്യമാക്കുന്നതാണ്. പ്രൈവറ്റ് ഗ്യാസ് ഏജന്സികളുടെ സ്റ്റോക്ക് പൊസിഷന്, വിതരണം എന്നിവ സംബന്ധിച്ച വിവരം എല്ലാ ദിവസവും താലൂക്ക് സപ്ലൈ ആഫീസര്മാര് ശേഖരിച്ച് വിശകലനം ചെയ്യുന്നതാണ്. വാണിജ്യാവശ്യത്തിന് വേണ്ടി കണക്റ്റ് ചെയ്ത് ഉപയോഗിക്കുന്ന സിലിണ്ടറുകള് കൂടാതെ പരമാവധി 5 സിലിണ്ടറുകളില് കൂടുതല് അധികമായി സംഭരിച്ച് സൂക്ഷിക്കുവാന് പാടില്ലായെന്നും കര്ശന നിര്ദ്ദേശം നല്കിയിട്ടുണ്ട്.
അനധികൃതമായി ഗാര്ഹിക പാചക വാതക സിലിണ്ടറുകള് ഹോട്ടലുകളിലേക്ക് കടത്തി ഉപയോഗിക്കുന്നതായി കണ്ടെത്തിയാല് 1955 ലെ അവശ്യസാധനനിയമത്തിന്റെ അടിസ്ഥാനത്തിലുള്ള LPG നിയന്ത്രണ ഉത്തരവ് പ്രകാരം ആയത് പിടിച്ചെടുത്ത് കേസ് രജിസ്റ്റര് ചെയ്യുവാനും ആവശ്യമായ നിയമനടപടികള് സ്വീകരിക്കാനും സിവില് സപ്ലൈസ് വകുപ്പിനെ ചുമതലപ്പെടുത്തിയിട്ടുണ്ട്. ഇതിന്റെ അടിസ്ഥാനത്തില് 84 ഗ്യാസ് ഏജന്സികളിലും 252 ഹോട്ടലുകളിലും പരിശോധന നടത്തുകയുണ്ടായി. അനധികൃതമായി വിതരണം ചെയ്ത 57 ഗ്യാസ് സിലിണ്ടറുകള് കോട്ടയം ജില്ലയിലും 7 എണ്ണം തിരുവനന്തപുരം ജില്ലയിലും പിടിച്ചെടുത്തിട്ടുണ്ട്. കരിഞ്ചന്തയും പൂഴ്തിവയ്പ്പും നടക്കാനുള്ള സാധ്യത കണ്ടെത്തി തടയാന് അവധി ദിവസങ്ങളിലടക്കം സ്ക്വാഡുകള് രൂപീകരിച്ച് കര്ശന പരിശോധന നടത്താന് നിര്ദ്ദേശം നല്കിയിട്ടുണ്ട്.
