അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാനത്ത് തെരഞ്ഞെടുപ്പ് പ്രചാരണം ഉച്ചസ്ഥായിയിൽ നിൽക്കെ, മുഖ്യമന്ത്രി പിണറായി വിജയൻ ഇന്ന് പാലക്കാട് ജില്ലയിൽ എത്തും. ജില്ലയിലെ നാല് പ്രധാന മണ്ഡലങ്ങളിലായി നിശ്ചയിച്ചിട്ടുള്ള പൊതുയോഗങ്ങളിൽ അദ്ദേഹം സംസാരിക്കും. രാവിലെ പത്ത് മണിക്ക് പാലക്കാട് മാധ്യമങ്ങളെ കാണുന്നതോടെയാണ് മുഖ്യമന്ത്രിയുടെ ഇന്നത്തെ പരിപാടികൾക്ക് തുടക്കമാകുന്നത്.
വാർത്താസമ്മേളനത്തിന് ശേഷം മലമ്പുഴ, ഒറ്റപ്പാലം, പട്ടാമ്പി, തൃത്താല എന്നീ മണ്ഡലങ്ങളിലെ പ്രചാരണ പരിപാടികളിലാണ് മുഖ്യമന്ത്രി പങ്കെടുക്കുക. ഇതിൽ ഒറ്റപ്പാലത്തെ പ്രസംഗത്തിനാണ് രാഷ്ട്രീയ നിരീക്ഷകർ വലിയ പ്രാധാന്യം കൽപ്പിക്കുന്നത്. സംസ്ഥാന രാഷ്ട്രീയത്തിൽ വൻ ചർച്ചയായി മാറിയ ‘ഡീൽ വിവാദങ്ങൾ’ കത്തിനിൽക്കുന്ന സാഹചര്യത്തിൽ, പാലക്കാട്ടെ മണ്ണിൽ നിന്ന് മുഖ്യമന്ത്രി എന്ത് മറുപടി നൽകും എന്നതിൽ അണികൾക്കിടയിലും രാഷ്ട്രീയ എതിരാളികൾക്കിടയിലും ഒരുപോലെ ആകാംക്ഷ നിലനിൽക്കുന്നുണ്ട്.
പാലക്കാട് മുഖ്യമന്ത്രി കളം നിറയുമ്പോൾ, തലസ്ഥാന നഗരിയിൽ യുഡിഎഫ് തങ്ങളുടെ ശക്തിപ്രകടനം നടത്താനുള്ള ഒരുക്കത്തിലാണ്. പ്രതിപക്ഷ നേതാവ് വി.ഡി. സതീശൻ നയിക്കുന്ന യുഡിഎഫിന്റെ ആവേശകരമായ നൈറ്റ് റോഡ് ഷോ ഇന്ന് തിരുവനന്തപുരത്ത് നടക്കും. അങ്ങേയറ്റം വാശിയേറിയ പ്രചാരണമാണ് മുന്നണികൾ കാഴ്ചവെക്കുന്നത്. ഇതിനിടയിൽ, എൻഡിഎ സ്ഥാനാർത്ഥികൾക്കായി വോട്ട് ചോദിക്കാൻ പ്രധാനമന്ത്രി നരേന്ദ്ര മോദി നാളെ കേരളത്തിലെത്തുന്നു എന്നതും രാഷ്ട്രീയ ചൂട് വർദ്ധിപ്പിക്കുന്നു.
