അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരഞ്ഞെടുപ്പ് രാഷ്ട്രീയത്തിൽ എസ്ഡിപിഐയുമായി സിപിഎം ഒരു തരത്തിലുള്ള വിട്ടുവീഴ്ചയ്ക്കും തയ്യാറായിട്ടില്ലെന്ന് സിപിഎം നേതാവ് എം.എ ബേബി. അവരുടെ പ്രവർത്തനശൈലി ജനാധിപത്യത്തിന് ഗുണകരമല്ലെന്നതാണ് പാർട്ടിയുടെ കൃത്യമായ നിലപാടെന്നും അദ്ദേഹം വ്യക്തമാക്കി. അതേസമയം, പിഡിപി നിലവിൽ നൽകുന്ന പിന്തുണയെ സ്വാഗതം ചെയ്ത അദ്ദേഹം, അബ്ദുൾ നാസർ മഅദനി തന്നെ തന്റെ നിലപാടുകളിൽ മാറ്റം വരുത്തിയതായി അറിയിച്ചിട്ടുണ്ടെന്നും കൂട്ടിച്ചേർത്തു.
ബിജെപിയുടെ അയ്യായിരത്തോളം വോട്ട് തങ്ങൾക്ക് ലഭിക്കുമെന്ന് യുഡിഎഫിന്റെ ഒരു മുതിർന്ന നേതാവ് പരസ്യമായി പറഞ്ഞത് ഗൗരവകരമാണെന്ന് എം.എ ബേബി ചൂണ്ടിക്കാട്ടി. ഇത്തരം പ്രസ്താവനകളിലൂടെ കോൺഗ്രസും ബിജെപിയും തമ്മിലുള്ള അവിശുദ്ധ കൂട്ടുകെട്ടാണ് പുറത്തുവരുന്നത്. ഇത്തരം രാഷ്ട്രീയ ‘ഡീലുകൾ’ വോട്ടർമാർ തിരിച്ചറിയുമെന്നും അദ്ദേഹം പറഞ്ഞു.
സീറ്റ് ലഭിക്കാത്തതിന്റെ പേരിൽ പ്രസ്ഥാനത്തെ തള്ളിപ്പറഞ്ഞ് പുറത്തുപോകുന്നവർ രാഷ്ട്രീയമായി അധഃപതിക്കുകയാണെന്ന് അദ്ദേഹം വിമർശിച്ചു. രക്തസാക്ഷികളുടെ പ്രസ്ഥാനത്തിൽ പ്രവർത്തിച്ചിട്ട്, ആ രക്തസാക്ഷികളെ അരുംകൊല ചെയ്തവർക്കൊപ്പം ചേരുന്നത് അംഗീകരിക്കാനാവില്ല. ചുരുക്കം ചിലരിൽ പാർലമെന്ററി മോഹം അതിശക്തമാണെന്നും അത്തരക്കാരാണ് ഇത്തരം ചുവടുമാറ്റങ്ങൾ നടത്തുന്നതെന്നും അദ്ദേഹം പരിഹസിച്ചു.
പയ്യന്നൂർ ഏരിയ കമ്മിറ്റിക്കെതിരെ ഉയരുന്ന രക്തസാക്ഷി ഫണ്ട് തട്ടിപ്പ് ആരോപണങ്ങൾ അടിസ്ഥാനരഹിതമാണെന്ന് എം.എ ബേബി പറഞ്ഞു. പാർട്ടിയുടെ ഫണ്ട് വിനിയോഗത്തിൽ എന്തെങ്കിലും വീഴ്ചകൾ ശ്രദ്ധയിൽപ്പെട്ടാൽ കർശനമായ നടപടി സ്വീകരിക്കുന്ന പാരമ്പര്യമാണ് സിപിഎമ്മിനുള്ളത്. പയ്യന്നൂരിലെ കാര്യത്തിൽ പ്രചരിക്കുന്ന ആക്ഷേപങ്ങൾ വസ്തുതാവിരുദ്ധമാണെന്നും അദ്ദേഹം വിശദീകരിച്ചു.
