അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരളം മാറ്റത്തിന്റെ പാതയിലാണെന്നും പാലക്കാട് ബിജെപിക്ക് സംസ്ഥാനത്തേക്കുള്ള പ്രവേശന കവാടമാണെന്നും പ്രധാനമന്ത്രി നരേന്ദ്ര മോദി. എൻഡിഎ സ്ഥാനാർത്ഥികളുടെ തിരഞ്ഞെടുപ്പ് പ്രചാരണത്തിന്റെ ഭാഗമായി പാലക്കാട് കോട്ടമൈതാനത്ത് സംഘടിപ്പിച്ച കൂറ്റൻ ജനസമ്മേളനത്തിൽ സംസാരിക്കുകയായിരുന്നു അദ്ദേഹം. സംസ്ഥാനത്ത് ബിജെപി ഏറ്റവും കൂടുതൽ വിജയപ്രതീക്ഷ പുലർത്തുന്ന പാലക്കാട് മണ്ഡലം ഇത്തവണ പിടിച്ചെടുക്കുമെന്ന ആത്മവിശ്വാസത്തോടെയാണ് പ്രധാനമന്ത്രി പ്രവർത്തകരെ അഭിസംബോധന ചെയ്തത്.
ഹെലികോപ്റ്റർ മാർഗ്ഗം പാലക്കാട് മേഴ്സി കോളേജ് ഗ്രൗണ്ടിൽ ഇറങ്ങിയ പ്രധാനമന്ത്രിയെ വൻ ജനക്കൂട്ടമാണ് വരവേറ്റത്. തുടർന്ന് അവിടെനിന്നും തുറന്ന വാഹനത്തിൽ അദ്ദേഹം കോട്ടമൈതാനത്തേക്ക് യാത്ര തിരിച്ചു. മിഷൻ സ്കൂൾ ജംഗ്ഷൻ മുതൽ എസ്.ബി.ഐ ജംഗ്ഷൻ വരെ റോഡിന് ഇരുവശവും തടിച്ചുകൂടിയ ആയിരക്കണക്കിന് പ്രവർത്തകരെ അദ്ദേഹം റോഡ് ഷോയിലൂടെ അഭിവാദ്യം ചെയ്തു. പുഷ്പവൃഷ്ടി നടത്തിയും ജയ് വിളികളുയർത്തിയുമാണ് പാലക്കാടൻ ജനത പ്രധാനമന്ത്രിയെ സ്വീകരിച്ചത്.
റോഡ് ഷോയ്ക്ക് ശേഷം കോട്ടമൈതാനത്ത് നടന്ന പൊതുസമ്മേളനത്തിൽ സംസാരിക്കവെ, കേരളത്തിലെ നിലവിലെ രാഷ്ട്രീയ സാഹചര്യങ്ങളെ അദ്ദേഹം രൂക്ഷമായി വിമർശിച്ചു. മാറ്റത്തിന്റെ കാറ്റ് സംസ്ഥാനത്ത് വീശിയടിച്ചു തുടങ്ങിയെന്നും ബിജെപിയുടെ വികസന രാഷ്ട്രീയത്തിന് കേരളം കൈകൊടുക്കുമെന്നും അദ്ദേഹം പറഞ്ഞു. പാലക്കാട്ടെ എൻഡിഎ സ്ഥാനാർത്ഥി ശോഭ സുരേന്ദ്രൻ ഉൾപ്പെടെയുള്ള നേതാക്കൾ പ്രധാനമന്ത്രിക്കൊപ്പം വേദി പങ്കിട്ടു.
