അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നടന് രാജേഷ് കേശവ് ഹൃദാഘാതം മൂലം വീണതിനു പിന്നാലെ നടത്തിയ ചികിത്സകള് ഫലം കണ്ടതോടെ സി.എം.സി വെല്ലൂരില് നിന്നും തിരുവനന്തപുരത്തേക്ക് ഷിഫ്റ്റ് ചെയ്യുകയാണ്. സാധാരണ ജീവിതത്തിലേക്ക് മടക്കി കൊണ്ടുവരാനുള്ള പ്രയത്നങ്ങള് കുടുംബവും സുഹൃത്തുക്കളും തുടരുകയാണ്. പ്രതീക്ഷയോടെയുള്ള ദിവസങ്ങള്ക്കാണ് ഇനി കാത്തിരിപ്പ്. ഇതിനിടയില് രാജേഷ് കേശവിന്റെ ആരോഗ്യ വിവരങ്ങള് തൊട്ട്, എല്ലാ കാര്യങ്ങളും കൃത്യമായി ഫേസ്ബുക്ക് പോസ്റ്റിലൂടെ അറിയിക്കുന്ന സുഹൃത്ത് പ്രതാപ് ജയലക്ഷ്മിയുടെ പോസ്റ്റ് വീണ്ടും വൈാറലാവുകയാണ്. രാജേഷ് കേശവ് തലചുറ്റി വീണ് വേഗത്തില് ആശുപത്രിയില് എത്തിച്ചതു മുതലുള്ള കാര്യങ്ങള് ഇന്നും പ്രതാപ് ജയലക്ഷ്മി എഫ്.ബി. പോസ്റ്റിലൂടെ അറിയിക്കുന്നുണ്ട്. സുരേഷ് ഗോപിയും രാജേശ് കേശവിന്റെ ചികിത്സയെ കുറിച്ച് ഡോക്ടര്മാരുമായി സംസാരിക്കുകയും ചെയ്തിട്ടുണ്ട്. തിരുവനന്തപുരത്തെ ചികിത്സയ്ക്കും വേണ്ടുന്ന കാര്യങ്ങള് സുരേഷ്ഗോപി ചെയ്യുന്നുണ്ട്.
പോസ്റ്റിന്റെ പൂര്ണ്ണ രൂപം
പ്രിയ സുഹൃത്ത് രാജേഷിനെ Rajesh Keshav കഴിഞ്ഞ 6 മാസത്തെ ചികിത്സകള്ക്ക് ശേഷം പിറന്ന നാട്ടിലേക്ക് കൊണ്ട് വന്നു. ഇനി കുറച്ചു നാള് തിരുവനന്തപുരം കിംസ് ആശുപത്രിയില് ചികിത്സയില് തുടരുകയും ശേഷം വീട്ടില് തന്നെ തുടര് ചികിത്സകള് ഏകോപിക്കാനുമാണ് തീരുമാനിച്ചിരിക്കുന്നത്. കഴിഞ്ഞ 6 മാസത്തിനിടയില് വളരെ സങ്കീര്ണ്ണമായ ചികിത്സാ രീതികളിലൂടെ രാജേഷിനെ തിരികെ കൊണ്ട് വരാനുള്ള എല്ലാ ശ്രമങ്ങളും CMC വെല്ലൂര് ഹോസ്പിറ്റലില് ചെയ്തിരുന്നു. അവിടുത്തെ PMR ഡിപ്പാര്ട്മെന്റ് ന്റെ നേതൃത്വത്തില് നടത്തിയ ചികിത്സയില് നല്ല മാറ്റങ്ങള് അത് പതുക്കെയാണെങ്കിലും കണ്ടു തുടങ്ങിയത് നമുക്ക് ഏറെ പ്രതീക്ഷ നല്കിയിട്ടുണ്ട്.
ഇനിയും ഈ രീതികള് നാട്ടില് തുടരാനാണ് തീരുമാനം. വെല്ലൂര് ആശുപത്രിയിലെ നാലു ചുമരുകള്ക്ക് അപ്പുറം നാട്ടിലെ പച്ചപ്പും, വീട്ടിലെ ഗന്ധവും, സുഹൃത്തുക്കളുടെയും പ്രിയപ്പെട്ടവരുടെയും സാമീപ്യവും അവനില് കൂടുതല് ഊര്ജവും റിസള്ട്ടും ഉണ്ടാകുമെന്നു ഡോക്ടര്മാര് വിലയിരുത്തിയതിന്റെ അടിസ്ഥാനത്തിലാണ് ഇപ്പോള് അനന്തപുരിയിലേക്ക് രാജേഷ് എത്തുന്നത്. ആശുപത്രിയില് എത്തി രാജേഷിനോടൊപ്പം സമയം ചിലവഴിച്ച കുറച്ചു നല്ല മനസ്സുകളെ ഹൃദയം കൊണ്ട് നമിക്കുന്നു. ഭാരിച്ച തിരക്കുകള് ഇടയിലും ഒരു ദിവസം മുഴുവന് രാജേഷിനൊപ്പം സമയം ചിലവഴിച്ചു, ഡോക്ടര്മാരുടെ പാനലുമായി ചികിത്സാ കാര്യങ്ങള് ഏകോപിച്ച ശ്രീ സുരേഷ് ഗോപിയോട് Suressh Gopi തീര്ത്താല് തീരാത്ത കടപ്പാട്. R Sreekandan Nair Krishnamoorthy S R എന്നിവരോടും തീരാത്ത നന്ദി. രാജേഷിന്റെ ക്ലാസ്സിലെ ചില സുഹൃത്തുക്കള്, മുന്പ് കൂടെ ജോലി ചെയ്തിരുന്നവരില് ചിലരൊക്കെ ആശുപത്രിയില് വരികയും പഴയ ഓര്മ്മകളിലേക്ക് അവനെ കൂട്ടികൊണ്ട് പോകുകയും ചെയ്തു.
അവിടെ എത്തിയത് മുതല് ഇന്നുവരെയും ഞങ്ങളെ ചേര്ത്ത് നിര്ത്തിയ കുറച്ചു ദൈവ തുല്യരായ ആളുകളുണ്ട്, ഒപ്പം ചെറുതും വലുതുമായി ചികിത്സാ ചിലവുകള്ക്ക് അറിഞ്ഞു സഹായം നല്കിയ ചില വലിയ സുമനസ്സുകളുടെ കാരുണ്യത്തിന് മുന്നില് പറയാന് വാക്കുകളില്ല. ?? ഇത്രയും കാലം കൂടെ നിന്നവരോട്, ചേര്ത്ത് നിര്ത്തിയവരോട്, രാജേഷിന്റെ വിവരങ്ങള് കൃത്യമായി അന്വേഷിക്കുന്നവരോട്… ഇനിയും അവന്റെ യാത്രയില് നിങ്ങള് കൂടെ വേണം, അവനും അവന്റെ കൂടെയുള്ളവരും വീണു പോകാതെ താങ്ങി നിര്ത്താന് നിങ്ങള്ക്ക് എന്തൊക്കെ ചെയ്യാന് പറ്റുമോ അതൊക്കെ ചെയ്യണം.. അറിഞ്ഞു ചെയ്യണം…അവന് തിരിച്ചു വരും.. വന്നേ പറ്റൂ എപ്പോള് എന്നത് ദൈവ നിശ്ചയം.. പ്രാര്ത്ഥനകള് തുടരുക..?? പ്രതീക്ഷയുടെ വെളിച്ചം അകലെയല്ല.
