അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരഞ്ഞെടുപ്പ് ചട്ടങ്ങൾ ലംഘിച്ച് വോട്ടർമാരെ സ്വാധീനിക്കാൻ ശ്രമിച്ച പോളിംഗ് ഓഫീസറെ അടിയന്തരമായി ചുമതലയിൽ നിന്ന് നീക്കി. മാനന്തവാടി മണ്ഡലത്തിലെ ചെറുകാട്ടൂർ സെന്റ് ജോസഫ് സ്കൂളിലെ 199-ാം നമ്പർ ബൂത്തിലാണ് ജനാധിപത്യ പ്രക്രിയയെ അട്ടിമറിക്കാനുള്ള ശ്രമം നടന്നത്. പരാതിയിൽ പ്രാഥമികമായി കഴമ്പുണ്ടെന്ന് കണ്ടെത്തിയതിനെ തുടർന്നാണ് തിരഞ്ഞെടുപ്പ് അധികൃതരുടെ നടപടി.
വോട്ട് രേഖപ്പെടുത്താനായി ക്യൂവിൽ നിന്നിരുന്ന വോട്ടർമാരോടും ബൂത്തിനകത്ത് പ്രവേശിച്ച മുതിർന്ന പൗരന്മാരോടും ബിജെപിക്ക് വോട്ട് ചെയ്യാൻ ഉദ്യോഗസ്ഥൻ പരസ്യമായി നിർദ്ദേശിച്ചതാണ് വിവാദത്തിന് കാരണമായത്. താമര ചിഹ്നത്തിൽ വോട്ട് ചെയ്യണമെന്ന് ഇയാൾ ആവശ്യപ്പെട്ടതായി വോട്ടർമാർ പരാതിപ്പെട്ടു.സംഭവം ശ്രദ്ധയിൽപ്പെട്ട ഉടൻ തന്നെ കോൺഗ്രസ് പ്രവർത്തകർ തിരഞ്ഞെടുപ്പ് കമ്മീഷനും ബന്ധപ്പെട്ട ഉദ്യോഗസ്ഥർക്കും പരാതി നൽകുകയായിരുന്നു. പരാതി ഗൗരവകരമാണെന്ന് ബോധ്യപ്പെട്ടതോടെ വരണാധികാരി ഇടപെടുകയും വിവാദത്തിലായ ഉദ്യോഗസ്ഥനെ തൽസ്ഥാനത്തുനിന്ന് നീക്കം ചെയ്യുകയുമായിരുന്നു. ഇയാൾക്ക് പകരം പുതിയ ഉദ്യോഗസ്ഥനെ ബൂത്തിൽ നിയമിച്ച് വോട്ടെടുപ്പ് പുനരാരംഭിച്ചു.
തിരഞ്ഞെടുപ്പ് ഡ്യൂട്ടിയിലുള്ള ഉദ്യോഗസ്ഥർ പാലിക്കേണ്ട രാഷ്ട്രീയ നിഷ്പക്ഷതയുടെ ലംഘനമാണ് ഇവിടെ നടന്നതെന്ന് അധികൃതർ വ്യക്തമാക്കി. ഡ്യൂട്ടിയിൽ വീഴ്ച വരുത്തിയ ഉദ്യോഗസ്ഥനെതിരെ വരും ദിവസങ്ങളിൽ വകുപ്പുതല അന്വേഷണം ഉണ്ടാകുമെന്നും സൂചനയുണ്ട്.
സംഭവത്തെത്തുടർന്ന് ബൂത്ത് പരിസരത്ത് രാഷ്ട്രീയ പ്രവർത്തകർ തമ്മിൽ നേരിയ വാക്കേറ്റവും സംഘർഷാവസ്ഥയും ഉടലെടുത്തിരുന്നു. സംഭവം എങ്കിലും പുതിയ ഉദ്യോഗസ്ഥൻ ചുമതല ഏറ്റെടുത്തതോടെ വോട്ടെടുപ്പ് സുഖമായി തുടരുകയാണ്.
