അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നിയമസഭാ തിരഞ്ഞെടുപ്പിന് തൊട്ടുമുൻപ് പാലക്കാട് മണ്ഡലത്തിൽ ഉയർന്നുവന്ന ‘വോട്ടിന് പണം’ ആരോപണത്തിൽ അന്വേഷണം ഊർജ്ജിതമാകുന്നു. സംഭവത്തിൽ കൂടുതൽ പേരുടെ മൊഴി രേഖപ്പെടുത്തേണ്ടതുണ്ടെന്നും അതിനാൽ അന്വേഷണം പൂർത്തിയാക്കാൻ കൂടുതൽ സമയം അനുവദിക്കണമെന്നും ആർഡിഒ ജില്ലാ കളക്ടറോട് ആവശ്യപ്പെട്ടു. ആർഡിഒയുടെ ഈ ആവശ്യം കളക്ടർ അംഗീകരിച്ചിട്ടുണ്ട്.
വിവാദവുമായി ബന്ധപ്പെട്ട് എൻഡിഎ സ്ഥാനാർത്ഥി ശോഭാ സുരേന്ദ്രന്റെ മൊഴി തിരഞ്ഞെടുപ്പ് കമ്മീഷൻ കഴിഞ്ഞ ദിവസം രേഖപ്പെടുത്തിയിരുന്നു. പാലക്കാട് കണ്ണാടി പഞ്ചായത്തിലെ ഒരു വയോധികയ്ക്ക് വോട്ട് ഉറപ്പിക്കാനായി പണം നൽകിയെന്നാണ് ബിജെപിക്കെതിരെ ഉയർന്നിട്ടുള്ള പ്രധാന പരാതി. ഈ വിഷയത്തിൽ വിശദമായ അന്വേഷണ റിപ്പോർട്ട് സമർപ്പിക്കാനാണ് കളക്ടർ ആർഡിഒയ്ക്ക് നിർദ്ദേശം നൽകിയിരിക്കുന്നത്.
വോട്ടെടുപ്പിന് മണിക്കൂറുകൾ മാത്രം ബാക്കിനിൽക്കെയാണ് ബിജെപിയെ പ്രതിരോധത്തിലാക്കിയ ഈ ആരോപണം പുറത്തുവന്നത്. കണ്ണാടി പഞ്ചായത്തിലെ തരുവാക്കുറിശ്ശിയിൽ ശോഭാ സുരേന്ദ്രനും സംഘവും വോട്ടർമാരെ സ്വാധീനിക്കാൻ ശ്രമിച്ചുവെന്നാരോപിച്ച് കോൺഗ്രസ് ആണ് ദൃശ്യങ്ങൾ പുറത്തുവിട്ടത്.
