അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.രാജ്യത്ത് വർദ്ധിച്ചുവരുന്ന ജാതീയമായ വേർതിരിവുകൾക്കെതിരെയും ക്യാമ്പസുകളിലെ വിവേചനങ്ങൾക്കെതിരെയും ശക്തമായ പ്രതികരണവുമായി മുഖ്യമന്ത്രി പിണറായി വിജയൻ. ഭരണഘടനാ ശില്പി ഡോ. ബി.ആർ. അംബേദ്കറുടെ ജന്മദിനത്തിൽ പങ്കുവെച്ച ഫേസ്ബുക്ക് കുറിപ്പിലാണ് കേരളത്തെ നടുക്കിയ അഞ്ചരക്കണ്ടി മെഡിക്കൽ കോളേജ് വിദ്യാർത്ഥിയുടെ ആത്മഹത്യയെ പരാമർശിച്ച് മുഖ്യമന്ത്രി തന്റെ നിലപാട് വ്യക്തമാക്കിയത്.
ജീവിതം മുഴുവൻ ജാതീയ വേർതിരിവുകൾക്കെതിരെ പോരാടിയ മഹാനാണ് ഡോ. ബി.ആർ. അംബേദ്കർ എന്ന് മുഖ്യമന്ത്രി അനുസ്മരിച്ചു. വിവേചനരഹിതമായ ഒരു സമൂഹം കെട്ടിപ്പടുക്കാനാണ് അംബേദ്കർ വിഭാവനം ചെയ്തതെങ്കിലും, ആധുനിക കാലഘട്ടത്തിലും ഉന്നത വിദ്യാഭ്യാസ സ്ഥാപനങ്ങളിൽ ജാതിയുടെ പേരിൽ വിവേചനങ്ങൾ തുടരുന്നത് അത്യന്തം ഗൗരവകരമാണെന്ന് അദ്ദേഹം ചൂണ്ടിക്കാട്ടി.
മിടുക്കനായ ഒരു വിദ്യാർത്ഥിയെ മരണത്തിലേക്ക് തള്ളിവിട്ടത് ആരായാലും അത് മാപ്പർഹിക്കാത്ത കുറ്റമാണെന്ന് മുഖ്യമന്ത്രി കർശനമായ ഭാഷയിൽ പറഞ്ഞു. അഞ്ചരക്കണ്ടി ഡെന്റൽ കോളേജിലെ നിതിൻ രാജിന്റെ ആത്മഹത്യയെ മുൻനിർത്തിയായിരുന്നു അദ്ദേഹത്തിന്റെ പരാമർശം. “കേരളമാകെ നിതിൻ രാജിന്റെ കുടുംബത്തിനൊപ്പമുണ്ട്. പുരോഗമന കേരളത്തിന് ഇത്തരം വാർത്തകൾ ഒട്ടും ഭൂഷണമല്ല” – മുഖ്യമന്ത്രി കുറിച്ചു.
നമ്മുടെ സമൂഹം നാളിതുവരെ ആർജിച്ചെടുത്ത മാനവിക മൂല്യങ്ങൾ കൈമോശം വന്നോ എന്ന് ഗൗരവമായി പരിശോധിക്കേണ്ട ഘട്ടമാണിതെന്ന് അദ്ദേഹം ഓർമ്മിപ്പിച്ചു. ജാതി ചിന്തകൾക്കും വിവേചനങ്ങൾക്കും മുകളിൽ തുല്യതയും നീതിയും ഉറപ്പാക്കുന്ന ഒരു നവകേരളം കെട്ടിപ്പടുക്കാൻ ഓരോരുത്തരും പ്രതിജ്ഞാബദ്ധരാകണമെന്നും മുഖ്യമന്ത്രി ആഹ്വാനം ചെയ്തു.
