അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പിതാവിൽ നിന്ന് ജീവന് ഭീഷണിയുണ്ടെന്നും ദുരഭിമാനക്കൊലയ്ക്ക് ഇരയായേക്കുമെന്നും ഭയന്ന് യുവതി സംരക്ഷണം തേടി കർണാടക ഹൈക്കോടതിയിൽ. ബെംഗളൂരു വൈറ്റ്ഫീൽഡിൽ താമസിക്കുന്ന കാജൽ രാജ് പുരോഹിതാണ് പിതാവ് അശോക് പുരോഹിതിനെതിരെ കോടതിയെ സമീപിച്ചത്. യുവതിയുടെ ഹർജി പരിഗണിച്ച കോടതി, കാജലിന് അടിയന്തരമായി പോലീസ് സംരക്ഷണം ഉറപ്പാക്കാൻ വൈറ്റ്ഫീൽഡ് പോലീസിന് കർശന നിർദേശം നൽകി.
തനിക്ക് താല്പര്യമില്ലാത്ത വിവാഹത്തിന് പിതാവ് നിർബന്ധിക്കുന്നതായും ഇഷ്ടപ്പെട്ട വ്യക്തിയെ വിവാഹം കഴിക്കാൻ അനുവദിക്കുന്നില്ലെന്നുമാണ് കാജലിന്റെ വാദം. സ്വന്തം ഇഷ്ടപ്രകാരം ജീവിതപങ്കാളിയെ തിരഞ്ഞെടുക്കാനുള്ള അവകാശത്തിന് മേൽ പിതാവ് കടന്നുകയറുന്നതായും എതിർത്താൽ വധിക്കുമെന്ന് ഭീഷണിയുണ്ടെന്നും യുവതി കോടതിയെ അറിയിച്ചു. രാജ്യം ചർച്ച ചെയ്ത പല ദുരഭിമാനക്കൊലകളുടെയും പശ്ചാത്തലം ചൂണ്ടിക്കാട്ടിയാണ് തനിക്കും സമാനമായ വിധി ഉണ്ടായേക്കാമെന്ന ആശങ്ക കാജൽ പങ്കുവെച്ചത്.
യുവതിയുടെ പരാതിയിലെ ഗൗരവം കണക്കിലെടുത്ത കർണാടക ഹൈക്കോടതി ഭരണഘടനാപരമായ വ്യക്തിസ്വാതന്ത്ര്യം ഉയർത്തിപ്പിടിച്ചാണ് ഉത്തരവിട്ടത്. യുവതിയുടെ ജീവനും സ്വത്തിനും സംരക്ഷണം നൽകേണ്ടത് പോലീസിന്റെ ഉത്തരവാദിത്തമാണെന്ന് കോടതി വ്യക്തമാക്കി. വൈറ്റ്ഫീൽഡ് പോലീസ് സ്റ്റേഷൻ പരിധിയിൽ താമസിക്കുന്ന കാജലിന് ആവശ്യമായ സുരക്ഷാ ക്രമീകരണങ്ങൾ ഒരുക്കാൻ ബന്ധപ്പെട്ട ഉദ്യോഗസ്ഥർക്ക് കോടതി നിർദേശം നൽകി.
