അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വേനൽച്ചൂടിന്റെ തീക്ഷ്ണതയിൽ വെന്തുരുകുന്ന കേരളത്തിന് ആശ്വാസവാർത്തയുമായി കാലാവസ്ഥാ നിരീക്ഷണ കേന്ദ്രം. സംസ്ഥാനത്ത് നാളെ മുതൽ വ്യാപകമായി വേനൽമഴ ലഭിക്കുമെന്നാണ് പ്രവചനം. ചിലയിടങ്ങളിൽ മഴ ലഭിച്ചു തുടങ്ങിയതോടെ താപനിലയിൽ നേരിയ കുറവുണ്ടായിട്ടുണ്ടെങ്കിലും പകുതിയോളം ജില്ലകളിൽ ഇപ്പോഴും ഉഷ്ണതരംഗത്തിന് സമാനമായ സാഹചര്യമാണ് തുടരുന്നത്.
വരുന്ന ദിവസങ്ങളിൽ മഴ ശക്തമാകുമെന്ന സൂചനയെത്തുടർന്ന് വിവിധ ജില്ലകളിൽ ജാഗ്രതാനിർദ്ദേശം നൽകിയിട്ടുണ്ട്. ഏപ്രിൽ 29-ന് പത്തനംതിട്ട, ഇടുക്കി, കണ്ണൂർ, കാസർഗോഡ് എന്നീ ജില്ലകളിൽ ശക്തമായ മഴയ്ക്കുള്ള സാധ്യത മുൻനിർത്തി യെല്ലോ അലർട്ട് പ്രഖ്യാപിച്ചു. ഉച്ചയ്ക്ക് ശേഷമുള്ള ഇടിമിന്നലോടു കൂടിയ മഴ ചൂടിന് ഗണ്യമായ കുറവുണ്ടാക്കുമെന്നാണ് പ്രതീക്ഷിക്കുന്നത്.
സംസ്ഥാനത്ത് ഏറ്റവും ഉയർന്ന ചൂട് ഇപ്പോഴും തുടരുന്നത് പാലക്കാട്ടും പുനലൂരുമാണ്. കഴിഞ്ഞ ദിവസം ഈ രണ്ട് കേന്ദ്രങ്ങളിലും 38.8 ഡിഗ്രി സെൽഷ്യസ് താപനില രേഖപ്പെടുത്തി. പുനലൂരിലും പാലക്കാട്ടും ശരാശരി താപനിലയേക്കാൾ 5 ഡിഗ്രി വരെ അധികമാണ് നിലവിലെ ചൂട്. കോട്ടയത്ത് താപനില 38.3 ഡിഗ്രിയിലെത്തി. ഇന്ന് പാലക്കാട് ജില്ലയിൽ ചൂട് 40 ഡിഗ്രി വരെ ഉയർന്നേക്കാമെന്നാണ് സൂചന. കൊല്ലത്ത് 39 ഡിഗ്രിയും, തൃശ്ശൂർ, കോഴിക്കോട്, കാസർകോട് ജില്ലകളിൽ 38 ഡിഗ്രി വരെയും ചൂട് അനുഭവപ്പെടാൻ സാധ്യതയുണ്ട്.
കേരളത്തിന് മുകളിൽ നിലനിന്നിരുന്ന, ചൂട് വർദ്ധിപ്പിക്കാൻ കാരണമായ പ്രതിചക്രവാതച്ചുഴി നിലവിൽ മഹാരാഷ്ട്രയ്ക്ക് മുകളിലേക്ക് നീങ്ങിയിരിക്കുകയാണ്. ഇപ്പോൾ ഇത് കേരളത്തെ ബാധിക്കുന്നില്ല.
