അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഗവർണറുടെ നയപ്രഖ്യാപനത്തിൽ സുപ്രധാന പ്രഖ്യാപനം. സ്കൂള് വിദ്യാർത്ഥിനികൾക്ക് 3 ദിവസത്തെ ആർത്തവ അവധി നൽകുമെന്നാണ് പ്രഖ്യാപനം. യുഡിഎഫ് സർക്കാരിൻ്റെ ആദ്യ നയപ്രഖ്യാപന പ്രസംഗത്തിലാണ് ഗവർണർ ഇക്കാര്യം വ്യക്തമാക്കിയിരിക്കുന്നത്. യുഡിഎഫ് സർക്കാർ നയപ്രഖ്യാപനത്തെ പ്രശംസിച്ച് ഫാത്തിമ തഹ്ലിയ എംഎൽഎ. ഫേസ്ബുക്ക് കുറിപ്പിലൂടെയാണ് പ്രശംസ.ആർത്തവ വേദന സഹിച്ച് സ്കൂൾ ബാഗ് ചുമന്ന് ബസിൽ കയറി, ഒരു ദിവസം മുഴുവൻ ചിരിച്ചുനിൽക്കാൻ ശ്രമിക്കുന്ന എത്രയോ പെൺകുട്ടികളുണ്ട് നമുക്കിടയിൽ. ഇത് സാധാരണ കാര്യമാണ് എന്ന സ്ഥിരം വാക്കുകൾ കേട്ട്, ശരീരം തളർന്നാലും മിണ്ടാതിരിക്കേണ്ടി വരുന്നവർ. കടുത്ത വേദനയും ക്ഷീണവും കാരണം ക്ലാസിൽ പോലും ശ്രദ്ധ കേന്ദ്രീകരിക്കാനാകാതെ, ചിലപ്പോൾ ഒറ്റയ്ക്ക് മാറിനിൽക്കേണ്ടി വരുന്നവർ.
ആർത്തവ ദിവസങ്ങളിൽ ഉണ്ടാകുന്ന അസ്വസ്ഥത, അപ്രതീക്ഷിതമായ ദുഃഖം, ദേഷ്യം, മാനസിക സമ്മർദം എന്നിവയും പല പെൺകുട്ടികളേയും ബാധിക്കാറുണ്ട്. ഒരു പെൺകുട്ടി ആർത്തവ സമയത്ത് അനുഭവിക്കുന്നത് വെറും “വേദന” മാത്രമല്ല. ശരീര തളർച്ചയും, മാനസിക അസ്വസ്ഥതയും, പറഞ്ഞറിയിക്കാനാകാത്ത അസൗകര്യങ്ങളും കൂടിയാണ്. അത് സ്ത്രീ എന്ന അവരുടെ വ്യക്തിത്വത്തോടുള്ള ബഹുമാനത്തെ പോലും മുറിവേൽപ്പിക്കാം.എന്തുകൊണ്ടാണ് താൻ ഇങ്ങനെ മാറിപ്പോകുന്നതെന്ന് പോലും മനസ്സിലാകാതെ, ഉള്ളിൽ തകർന്നുകൊണ്ട് സാധാരണ പോലെ പെരുമാറാൻ ശ്രമിക്കുന്ന അത്തരത്തിലുള്ള ഒരുപാട് പേർ നമുക്ക് ചുറ്റുമുണ്ട്. ആ ദിവസങ്ങളിൽ അവർക്ക് കുറച്ച് വിശ്രമം ലഭിക്കുക, അവരെ പരിഗണിക്കുക എന്നത് ഒരു ആനുകൂല്യമല്ല, ഒരു കരുതലാണ്. അവരുടെ ആരോഗ്യത്തെയും മനസ്സിനെയും മനസ്സിലാക്കുന്ന ഒരു സമൂഹത്തിന്റെ ഉത്തരവാദിത്തമാണ്.
ലോകത്തിലെ പല രാജ്യങ്ങളും ഇന്ന് ആർത്തവവുമായി ബന്ധപ്പെട്ട ബുദ്ധിമുട്ടുകളെ ഒരു “സ്വകാര്യ വിഷയം” എന്നതിലുപരി, ആരോഗ്യത്തോടും മാനവികതയോടും വിദ്യാഭ്യാസാവകാശത്തോടും ബന്ധപ്പെട്ട പ്രധാന വിഷയമായി കാണാൻ തുടങ്ങിയിട്ടുണ്ട്. ഒരു പെൺകുട്ടിക്ക് അങ്ങനെ ആത്മവിശ്വാസത്തോടെ സ്കൂളിൽ പഠിക്കാൻ കഴിയുക എന്നത് അവളുടെ മാത്രം പോരാട്ട വിജയമല്ല. അത് അവളെ മനസ്സിലാക്കുന്ന അധ്യാപകരുടെയും കുടുംബത്തിന്റെയും സമൂഹത്തിന്റെയും അടയാളമാണ്. അങ്ങനെ എല്ലാവരേയും ഉൾക്കൊണ്ട് ഈ ജനകീയ സർക്കാർ മുന്നോട്ടെന്നും ഫാത്തിമ തഹ്ലിയ കുറിച്ചു.
Story Highlights : fathima thahliya about udf three day menstrual leave for school girls
