അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പാസ്പോർട്ട് സേവാ കേന്ദ്രങ്ങളുടെ മാതൃകയിൽ സംസ്ഥാനത്തുടനീളം എം.വി.ഡി സേവാ കേന്ദ്രങ്ങൾ സ്ഥാപിക്കുന്നതിനുള്ള നടപടികൾ സർക്കാർ പരിശോധിച്ചു വരികയാണെന്ന് ഗതാഗത മന്ത്രി സി.പി ജോൺ നിയമസഭയെ അറിയിച്ചു. ഗതാഗത കമ്മിഷണർ സമർപ്പിച്ച പ്രൊപ്പോസൽ പ്രകാരം മോട്ടോർ വാഹന വകുപ്പ് നൽകിവരുന്ന സേവനങ്ങൾ കൂടുതൽ വേഗത്തിലും സുതാര്യമായും പൊതുജനങ്ങൾക്ക് ലഭ്യമാക്കുകയാണ് ഇതിലൂടെ ലക്ഷ്യമിടുന്നത്. പി.പി.പി മാതൃകയിലോ അക്ഷയ, സി.എസ്.സി കേന്ദ്രങ്ങളുമായി സംയോജിപ്പിച്ചോ ആയിരിക്കും ഈ വിപുലമായ പദ്ധതി നടപ്പിലാക്കുക.
പുതിയ കേന്ദ്രങ്ങൾ വരുന്നതോടെ ഡ്രൈവിങ് ലൈസൻസ്, വാഹന രജിസ്ട്രേഷൻ, നികുതി അടയ്ക്കൽ, പെർമിറ്റ്, ഇ-ചലാൻ തുടങ്ങിയ വിവിധ സേവനങ്ങൾ എളുപ്പത്തിൽ ലഭിക്കും. ഇവയ്ക്ക് പുറമെ പൊതുജന പരാതി പരിഹാര സഹായം, ഡിജിറ്റൽ അസിസ്റ്റൻസ് തുടങ്ങിയ സൗകര്യങ്ങളും എം.വി.ഡി സേവാ കേന്ദ്രങ്ങളിലൂടെ നൽകാനാണ് സർക്കാർ ഉദ്ദേശിക്കുന്നതെന്നും അദ്ദേഹം പറഞ്ഞു.
നിലവിൽ ഓൺലൈൻ അപേക്ഷകൾ നൽകുന്നതിലുൾപ്പെടെയുള്ള സങ്കീർണ്ണതകൾ മുതലെടുക്കുന്ന ഇടനിലക്കാരുടെ ചൂഷണം ഒഴിവാക്കുന്നതിനായി മോട്ടോർ വാഹന വകുപ്പിന്റെ നിയന്ത്രണത്തിൽ തന്നെ ചില സംവിധാനങ്ങൾ ഏർപ്പെടുത്തിയിട്ടുണ്ട്. ഇതിന്റെ ഭാഗമായി കുടുംബശ്രീയുടെ സഹായത്തോടെ 47 ആർ.ടി.ഒ, സബ് ആർ.ടി.ഒ ഓഫിസുകളിൽ ഇ-സേവാ കേന്ദ്രങ്ങൾ ഇപ്പോൾ പ്രവർത്തിക്കുന്നുണ്ട്. പൊതുജനങ്ങൾക്ക് ഓൺലൈനായി അപേക്ഷകൾ തയ്യാറാക്കുന്നതിനും ഇ-പേയ്മെന്റ് നടത്തുന്നതിനുമാണ് ഈ കേന്ദ്രങ്ങൾ പ്രധാനമായും പ്രയോജനപ്പെടുന്നതെന്നും മന്ത്രി കൂട്ടിച്ചേർത്തു.
